౫. కబళవగ్గవణ్ణనా

౬౧౭. అనాహటేతి అనాహరితే; ముఖద్వారం అసమ్పాపితేతి అత్థో.

౬౧౮. సబ్బం హత్థన్తి సకలహత్థం.

౬౧౯. సకబళేనాతి ఏత్థ ధమ్మం కథేన్తో హరీతకం వా లట్ఠిమధుకం వా ముఖే పక్ఖిపిత్వా కథేతి. యత్తకేన వచనం అపరిపుణ్ణం న హోతి, తత్తకే ముఖమ్హి సన్తే కథేతుం వట్టతి.

౬౨౦. పిణ్డుక్ఖేపకన్తి పిణ్డం ఉక్ఖిపిత్వా ఉక్ఖిపిత్వా.

౬౨౧. కబళావచ్ఛేదకన్తి కబళం అవచ్ఛిన్దిత్వా అవచ్ఛిన్దిత్వా.

౬౨౨. అవగణ్డకారకన్తి మక్కటో వియ గణ్డే కత్వా కత్వా.

౬౨౩. హత్థనిద్ధునకన్తి హత్థం నిద్ధునిత్వా నిద్ధునిత్వా.

౬౨౪. సిత్థావకారకన్తి సిత్థాని అవకిరిత్వా అవకిరిత్వా.

౬౨౫. జివ్హానిచ్ఛారకన్తి జివ్హం నిచ్ఛారేత్వా నిచ్ఛారేత్వా.

౬౨౬. చపుచపుకారకన్తి చపు చపూతి ఏవం సద్దం కత్వా కత్వా.

పఞ్చమో వగ్గో.