౨. రతనసిక్ఖాపదవణ్ణనా

౫౦౨-౩. దుతియే – విస్సరిత్వాతి పముస్సిత్వా. పుణ్ణపత్తం నామ సతతో పఞ్చ కహాపణా. క్యాహం కరిస్సామీతి కిం అహం కరిస్సామి. ఆభరణం ఓముఞ్చిత్వాతి మహాలతం నామ నవకోటిఅగ్ఘనకం అలఙ్కారం అపనేత్వా.

౫౦౪. అన్తేవాసీతి పరిచారకో.

౫౦౬. అపరిక్ఖిత్తస్స ఉపచారోతి ఏత్థ ఉపచారో నామ ఆరామస్స ద్వే లేడ్డుపాతా – ‘‘ఆవసథస్స పన సుప్పపాతో వా ముసలపాతో వా’’తి మహాపచ్చరియం వుత్తం. ఉగ్గణ్హాతి ఆపత్తి పాచిత్తియస్సాతి ఏత్థ జాతరూపరజతం అత్తనో అత్థాయ ఉగ్గణ్హన్తస్స వా ఉగ్గణ్హాపేన్తస్స వా నిస్సగ్గియం పాచిత్తియం, సఙ్ఘగణపుగ్గలచేతియనవకమ్మానం అత్థాయ దుక్కటం, అవసేసం ముత్తాదిరతనం అత్తనో వా సఙ్ఘాదీనం వా అత్థాయ ఉగ్గణ్హన్తస్స వా ఉగ్గణ్హాపేన్తస్స వా దుక్కటం. కప్పియవత్థు వా అకప్పియవత్థు వా హోతు, అన్తమసో మాతు కణ్ణపిళన్ధనతాళపణ్ణమ్పి గిహిసన్తకం భణ్డాగారికసీసేన పటిసామేన్తస్స పాచిత్తియమేవ.

సచే పన మాతాపితూనం సన్తకం అవస్సం పటిసామేతబ్బం కప్పియభణ్డం హోతి, అత్తనో అత్థాయ గహేత్వా పటిసామేతబ్బం. ‘‘ఇదం పటిసామేత్వా దేహీ’’తి వుత్తే పన ‘‘న వట్టతీ’’తి పటిక్ఖిపితబ్బం. సచే ‘‘పటిసామేహీ’’తి పాతేత్వా గచ్ఛన్తి, పలిబోధో నామ హోతి, పటిసామేతుం వట్టతి. విహారే కమ్మం కరోన్తా వడ్ఢకీఆదయో వా రాజవల్లభా వా అత్తనో ఉపకరణభణ్డం వా సయనభణ్డం వా ‘‘పటిసామేత్వా దేథా’’తి వదన్తి, ఛన్దేనపి భయేనపి న కాతబ్బమేవ, గుత్తట్ఠానం పన దస్సేతుం వట్టతి. బలక్కారేన పాతేత్వా గతేసు చ పటిసామేతుం వట్టతి.

అజ్ఝారామే వా అజ్ఝావసథే వాతి ఏత్థ సచే మహావిహారసదిసో మహారామో హోతి, తత్థ పాకారపరిక్ఖిత్తే పరివేణే యత్థ భిక్ఖూహి వా సామణేరేహి వా గహితం భవిస్సతీతి సఙ్కా ఉప్పజ్జతి, తాదిసే ఏవ ఠానే ఉగ్గణ్హిత్వా వా ఉగ్గణ్హాపేత్వా వా ఠపేతబ్బం. మహాబోధిద్వారకోట్ఠకఅమ్బఙ్గణసదిసేసు పన మహాజనసఞ్చరణట్ఠానేసు న గహేతబ్బం, పలిబోధో న హోతి. కురున్దియం పన వుత్తం ‘‘ఏకో మగ్గం గచ్ఛన్తో నిమనుస్సట్ఠానే కిఞ్చి భణ్డం పస్సతి, ఆకిణ్ణమనుస్సేపి జాతే మనుస్సా తమేవ భిక్ఖుం ఆసఙ్కన్తి, తస్మా మగ్గా ఓక్కమ్మ నిసీదితబ్బం. సామికేసు ఆగతేసు తం ఆచిక్ఖితబ్బం. సచే సామికే న పస్సతి పతిరూపం కరిస్సతీ’’తి.

రూపేన వా నిమిత్తేన వా సఞ్ఞాణం కత్వాతి ఏత్థ రూపం నామ అన్తోభణ్డికాయ భణ్డం; తస్మా భణ్డికం ముఞ్చిత్వా గణేత్వా ఏత్తకా కహాపణా వా జాతరూపరజతం వాతి సల్లక్ఖేతబ్బం. నిమిత్తన్తి లఞ్ఛనాది; తస్మా లఞ్ఛితాయ భణ్డికాయ మత్తికాలఞ్ఛనన్తి వా లాఖాలఞ్ఛనన్తి వా నీలపిలోతికాయ భణ్డికా కతాతి వా సేతపిలోతికాయ కతాతి వా ఏవమాది సబ్బం సల్లక్ఖేతబ్బం.

భిక్ఖూ పతిరూపాతి లజ్జినో కుక్కుచ్చకా. లోలజాతికానఞ్హి హత్థే ఠపేతుం న లభతి. యో పన నేవ తమ్హా ఆవాసా పక్కమతి, న సామికే పస్సతి, తేనాపి అత్తనో చీవరాదిమూలం న కాతబ్బం; థావరం పన సేనాసనం వా చేతియం వా పోక్ఖరణీ వా కారేతబ్బా. సచే దీఘస్స అద్ధునో అచ్చయేన సామికో ఆగచ్ఛతి, ‘‘ఉపాసక తవ సన్తకేన ఇదం నామ కతం, అనుమోదాహీ’’తి వత్తబ్బో. సచే అనుమోదతి, ఇచ్చేతం కుసలం; నో చే అనుమోదతి, ‘‘మమ ధనం దేథా’’తి చోదేతియేవ, అఞ్ఞం సమాదపేత్వా దాతబ్బం.

౫౦౭. రతనసమ్మతం విస్సాసం గణ్హాతీతిఆదీసు ఆమాసమేవ సన్ధాయ వుత్తం. అనామాసం న వట్టతియేవ. సేసమేత్థ ఉత్తానమేవ. ఛసముట్ఠానం – కిరియం, నోసఞ్ఞావిమోక్ఖం, అచిత్తకం, పణ్ణత్తివజ్జం, కాయకమ్మం, వచీకమ్మం, తిచిత్తం, తివేదనన్తి.

రతనసిక్ఖాపదం దుతియం.