౫. తలసత్తికసిక్ఖాపదవణ్ణనా

౪౫౪. పఞ్చమే – తలసత్తికం ఉగ్గిరన్తీతి పహారదానాకారం దస్సేత్వా కాయమ్పి కాయపటిబద్ధమ్పి ఉచ్చారేన్తి. తే పహారసముచ్చితా రోదన్తీతి తే పహారపరిచితా పుబ్బేపి లద్ధపహారత్తా ఇదాని చ పహారం దస్సన్తీతి మఞ్ఞమానా రోదన్తీతి అత్థో. ‘‘పహారస్స ముచ్చితా’’తిపి సజ్ఝాయన్తి, తత్థ ‘‘పహారస్స భీతా’’తి అత్థో.

౪౫౭. ఉగ్గిరతి ఆపత్తి పాచిత్తియస్సాతి ఏత్థ సచే ఉగ్గిరిత్వా విరద్ధో పహారం దేతి, అవస్సం ధారేతుం అసక్కోన్తస్స పహారో సహసా పతతి, న పహరితుకామతాయ దిన్నత్తా దుక్కటం. తేన పహారేన హత్థాదీసు యంకిఞ్చి భిజ్జతి, దుక్కటమేవ.

౪౫౮. మోక్ఖాధిప్పాయో తలసత్తికం ఉగ్గిరతీతి ఏత్థ పుబ్బే వుత్తేసు వత్థూసు పురిమనయేనేవ తలసత్తికం ఉగ్గిరన్తస్స అనాపత్తి. సచేపి విరజ్ఝిత్వా పహారం దేతి, అనాపత్తియేవ. సేసం పురిమసదిసమేవ సద్ధిం సముట్ఠానాదీహీతి.

తలసత్తికసిక్ఖాపదం పఞ్చమం.