౯. వికప్పనసిక్ఖాపదవణ్ణనా

౩౭౪. నవమే – తస్స వా అదిన్నన్తి చీవరసామికస్స ‘‘పరిభుఞ్జ వా విస్సజ్జేహి వా యథాపచ్చయం వా కరోహీ’’తి ఏవం వత్వా అదిన్నం. తస్స వా అవిస్ససన్తోతి యేన వినయకమ్మం కతం, తస్స అవిస్సాసేన వా. తేన పన దిన్నం వా తస్స విస్సాసేన వా పరిభుఞ్జన్తస్స అనాపత్తి. సేసమేత్థ తింసకవణ్ణనాయం వుత్తనయత్తా ఉత్తానమేవాతి. కథినసముట్ఠానం – కాయవాచతో కాయవాచాచిత్తతో చ సముట్ఠాతి, కిరియాకిరియం, నోసఞ్ఞావిమోక్ఖం, అచిత్తకం, పణ్ణత్తివజ్జం, కాయకమ్మం, వచీకమ్మం, తిచిత్తం, తివేదనన్తి.

వికప్పనసిక్ఖాపదం నవమం.