౧. ఆవసథపిణ్డసిక్ఖాపదవణ్ణనా

౨౦౩. భోజనవగ్గస్స పఠమసిక్ఖాపదే – ఆవసథపిణ్డోతి ఆవసథే పిణ్డో. సమన్తా పరిక్ఖిత్తం అద్ధికగిలానగబ్భినిపబ్బజితానం యథానురూపం పఞ్ఞత్తమఞ్చపీఠం అనేకగబ్భపముఖపరిచ్ఛేదం ఆవసథం కత్వా తత్థ పుఞ్ఞకామతాయ పిణ్డో పఞ్ఞత్తో హోతి, యాగుభత్తభేసజ్జాది సబ్బం తేసం తేసం దానత్థాయ ఠపితం హోతీతి అత్థో. హియ్యోపీతి స్వేపి. అపసక్కన్తీతి అపగచ్ఛన్తి. మనుస్సా ఉజ్ఝాయన్తీతి తిత్థియే అపస్సన్తా ‘‘తిత్థియా కుహిం గతా’’‘‘ఇమే పస్సిత్వా పక్కన్తా’’తి సుత్వా ఉజ్ఝాయన్తి. కుక్కుచ్చాయన్తోతి కుక్కుచ్చం కరోన్తో, అకప్పియసఞ్ఞం ఉప్పాదేన్తోతి అత్థో.

౨౦౬. సక్కోతి తమ్హా ఆవసథా పక్కమితున్తి అద్ధయోజనం వా యోజనం వా గన్తుం సక్కోతి. న సక్కోతీతి ఏత్తకమేవ న సక్కోతి. అనోదిస్సాతి ఇమేసంయేవ వా ఏత్తకానంయేవ వాతి ఏకం పాసణ్డం అనుద్దిసిత్వా సబ్బేసం పఞ్ఞత్తో హోతి. యావదత్థోతి భోజనమ్పి ఏత్తకన్తి అపరిచ్ఛిన్దిత్వా యావదత్థో పఞ్ఞత్తో హోతి. సకిం భుఞ్జితబ్బన్తి ఏకదివసం భుఞ్జితబ్బం, దుతియదివసతో పట్ఠాయ పటిగ్గహణే దుక్కటం, అజ్ఝోహారే అజ్ఝోహారే పాచిత్తియం.

అయం పనేత్థ వినిచ్ఛయో – ఏకకులేన వా నానాకులేహి వా ఏకతో హుత్వా ఏకస్మిం ఠానే వా నానాఠానేసు వా ‘‘అజ్జ ఏకస్మిం; స్వే ఏకస్మి’’న్తి ఏవం అనియమితట్ఠానే వా పఞ్ఞత్తం ఏకస్మిం ఠానే ఏకదివసం భుఞ్జిత్వా దుతియదివసే తస్మిం ఠానే అఞ్ఞస్మిం వా భుఞ్జితుం న వట్టతి. నానాకులేహి పన నానాఠానేసు పఞ్ఞత్తం ఏకస్మిం ఠానే ఏకదివసం భుఞ్జిత్వా దుతియదివసే అఞ్ఞత్థ భుఞ్జితుం వట్టతి. పటిపాటిం పన ఖేపేత్వా పున ఆదితో పట్ఠాయ భుఞ్జితుం న వట్టతీతి మహాపచ్చరియం వుత్తం. ఏకపూగనానాపూగఏకగామనానాగామేసుపి ఏసేవ నయో. యోపి ఏకకులస్స వా నానాకులానం వా ఏకతో పఞ్ఞత్తో తణ్డులాదీనం అభావేన అన్తరన్తరా ఛిజ్జతి, సోపి న భుఞ్జితబ్బో. సచే పన ‘‘న సక్కోమ దాతు’’న్తి ఉపచ్ఛిన్దిత్వా పున కల్యాణచిత్తే ఉప్పన్నే దాతుం ఆరభన్తి, ఏతం పున ఏకదివసం భుఞ్జితుం వట్టతీతి మహాపచ్చరియం వుత్తం.

౨౦౮. అనాపత్తి గిలానస్సాతి గిలానస్స అనువసిత్వా భుఞ్జన్తస్స అనాపత్తి. గచ్ఛన్తో వాతి యో గచ్ఛన్తో అన్తరామగ్గే ఏకదివసం గతట్ఠానే చ ఏకదివసం భుఞ్జతి, తస్సాపి అనాపత్తి. ఆగచ్ఛన్తేపి ఏసేవ నయో. గన్త్వా పచ్చాగచ్ఛన్తోపి అన్తరామగ్గే ఏకదివసం ఆగతట్ఠానే చ ఏకదివసం భుఞ్జితుం లభతి. గచ్ఛిస్సామీతి భుఞ్జిత్వా నిక్ఖన్తస్స నదీ వా పూరతి చోరాదిభయం వా హోతి, సో నివత్తిత్వా ఖేమభావం ఞత్వా గచ్ఛన్తో పున ఏకదివసం భుఞ్జితుం లభతీతి సబ్బమిదం మహాపచ్చరియాదీసు వుత్తం. ఓదిస్స పఞ్ఞత్తో హోతీతి భిక్ఖూనంయేవ అత్థాయ ఉద్దిసిత్వా పఞ్ఞత్తో హోతి. న యావదత్థోతి యావదత్థం పఞ్ఞత్తో న హోతి, థోకం థోకం లబ్భతి, తాదిసం నిచ్చమ్పి భుఞ్జితుం వట్టతి. పఞ్చ భోజనాని ఠపేత్వా సబ్బత్థాతి యాగుఖజ్జకఫలాఫలాదిభేదే సబ్బత్థ అనాపత్తి. యాగుఆదీని హి నిచ్చమ్పి భుఞ్జితుం వట్టతి. సేసం ఉత్తానమేవ. ఏళకలోమసముట్ఠానం – కాయతో చ కాయచిత్తతో చ సముట్ఠాతి, కిరియం, నోసఞ్ఞావిమోక్ఖం, అచిత్తకం, పణ్ణత్తివజ్జం, కాయకమ్మం తిచిత్తం, తివేదనన్తి.

ఆవసథపిణ్డసిక్ఖాపదం పఠమం.