౧౧. పఞ్చసతికక్ఖన్ధకం

ఖుద్దానుఖుద్దకసిక్ఖాపదకథా

౪౪౧. పఞ్చసతికక్ఖన్ధకే – చత్తారి పారాజికాని ఠపేత్వా అవసేసాని ఖుద్దానుఖుద్దకానీతి ఏవమాది ఏకసిక్ఖాపదమ్పి అపరిచ్చజిత్వా సబ్బేసం సఙ్గహేతబ్బభావదస్సనత్థం పరియాయేన వుత్తం. ఇదం వో సమణానన్తి ఇదం సమణానం. పదపూరణమత్తే వోకారో.

౪౪౩. ఇదమ్పి తే ఆవుసో ఆనన్ద దుక్కటన్తి ‘‘ఇదం తయా దుట్ఠు కత’’న్తి కేవలం గరహన్తేహి థేరేహి వుత్తం, న ఆపత్తిం సన్ధాయ వుత్తం. న హి తే ఆపత్తానాపత్తిం న జానన్తి. ఇదానేవ చేతం అనుస్సావితం – ‘‘సఙ్ఘో అపఞ్ఞత్తం న పఞ్ఞపేతి, పఞ్ఞత్తం న సముచ్ఛిన్దతీ’’తి. దేసేహి తం దుక్కటన్తి ఇదమ్పి చ ‘‘ఆమ, భన్తే, దుట్ఠు మయా కత’’న్తి ఏవం పటిజానాహి, తం దుక్కటన్తి ఇదం సన్ధాయ వుత్తం, న ఆపత్తిదేసనం. థేరో పన యస్మా అసతియా న పుచ్ఛి న అనాదరేన, తస్మా తత్థ దుట్ఠుకతభావమ్పి అసల్లక్ఖేన్తో ‘‘నాహం తం దుక్కటం పస్సామీ’’తి వత్వా థేరేసు గారవం దస్సేన్తో ‘‘అపిచాయస్మన్తానం సన్ధాయ దేసేమి తం దుక్కట’’న్తి ఆహ. యథా తుమ్హే వదథ, తథా పటిజానామీతి వుత్తం హోతి. ఏసేవ నయో అవసేసేసు చతూసు ఠానేసు. సేసమేత్థ యం వత్తబ్బం సియా, తం నిదానవణ్ణనాయమేవ వుత్తం.

ఖుద్దానుఖుద్దకసిక్ఖాపదకథా నిట్ఠితా.

పఞ్చసతికక్ఖన్ధకవణ్ణనా నిట్ఠితా.