౨. బ్రహ్మచరియోగధసుత్తవణ్ణనా

౯౯౮. దుతియే యేసం సద్ధాతి పదేన బుద్ధే పసాదో గహితో. సీలన్తి పదేన అరియకన్తాని సీలాని గహితాని. పసాదోతి పదేన సఙ్ఘే పసాదో గహితో. ధమ్మదస్సనన్తి పదేన ధమ్మే పసాదో గహితోతి ఏవం చత్తారి సోతాపత్తియఙ్గాని వుత్తాని. కాలేన పచ్చేన్తీతి కాలేన పాపుణన్తి. బ్రహ్మచరియోగధం సుఖన్తి బ్రహ్మచరియం ఓగాహిత్వా ఠితం ఉపరిమగ్గత్తయసమ్పయుత్తం సుఖం. యో పనేస గాథాయ ఆగతో పసాదో, సో కతరపసాదో హోతీతి. తిపిటకచూళాభయత్థేరో తావ ‘‘మగ్గపసాదో’’తి ఆహ, తిపిటకచూళనాగత్థేరో ‘‘ఆగతమగ్గస్స పచ్చవేక్ఖణప్పసాదో’’తి. ఉభోపి థేరా పణ్డితా బహుస్సుతా, ఉభిన్నం సుభాసితం. మిస్సకప్పసాదో ఏసోతి.