౧-౨. మాతుగామసుత్తాదివణ్ణనా

౨౮౦-౨౮౧. మాతుగామసంయుత్తస్స పఠమే అఙ్గేహీతి అగుణఙ్గేహి. న చ రూపవాతి న రూపసమ్పన్నో విరూపో దుద్దసికో. న చ భోగవాతి న భోగసమ్పన్నో నిద్ధనో. న చ సీలవాతి న సీలసమ్పన్నో దుస్సీలో. అలసో చాతి కన్తనపచనాదీని కమ్మాని కాతుం న సక్కోతి, కుసీతో ఆలసియో నిసిన్నట్ఠానే నిసిన్నోవ, ఠితఠానే ఠితోవ నిద్దాయతి ఏవ. పజఞ్చస్స న లభతీతి అస్స పురిసస్స కులవంసపతిట్ఠాపకం పుత్తం న లభతి, వఞ్ఝిత్థీ నామ హోతి. సుక్కపక్ఖో వుత్తవిపరియాయేన వేదితబ్బో. దుతియం పఠమే వుత్తనయేనేవ పరివత్తేతబ్బం.