౧. రహోగతసుత్తవణ్ణనా

౨౫౯. రహోగతవగ్గస్స పఠమే యం కిఞ్చి వేదయితం, తం దుక్ఖస్మిన్తి యం కిఞ్చి వేదయితం, తం సబ్బం దుక్ఖన్తి అత్థో. సఙ్ఖారానంయేవ అనిచ్చతన్తిఆదీసు యా ఏసా సఙ్ఖారానం అనిచ్చతా ఖయధమ్మతా వయధమ్మతా విపరిణామధమ్మతా, ఏతం సన్ధాయ యం కిఞ్చి వేదయితం, తం దుక్ఖన్తి మయా భాసితన్తి దీపేతి. యా హి సఙ్ఖారానం అనిచ్చతా, వేదనానమ్పి సా అనిచ్చతా ఏవ. అనిచ్చతా చ నామేసా మరణం, మరణతో ఉత్తరి దుక్ఖం నామ నత్థీతి ఇమినా అధిప్పాయేన సబ్బా వేదనా దుక్ఖాతి వుత్తా. అథ ఖో పన భిక్ఖు మయాతి ఇదం న కేవలం అహం వేదనానంయేవ నిరోధం పఞ్ఞాపేమి, ఇమేసమ్పి ధమ్మానం నిరోధం పఞ్ఞాపేమీతి దస్సనత్థం ఆరద్ధం. వూపసమో చ పస్సద్ధియో చ ఏవరూపాయ దేసనాయ బుజ్ఝనకానం అజ్ఝాసయేన వుత్తా. సఞ్ఞావేదయితనిరోధగ్గహణేన చేత్థ చత్తారో ఆరుప్పా గహితావ హోన్తీతి వేదితబ్బా.