౪. పాతాలసుత్తవణ్ణనా

౨౫౨. చతుత్థే పాతాలోతి పాతస్స అలం పరియత్తో, నత్థి ఏత్థ పతిట్ఠాతి పాతాలో. అసన్తం అవిజ్జమానన్తి అసమ్భూతత్తం అపఞ్ఞాయమానత్తం. ఏవం వాచం భాసతీతి అత్థి మహాసముద్దే పాతాలోతి ఏవం వాచం. సో హి యం తం బలవాముఖం మహాసముద్దస్స ఉదకం వేగేన పక్ఖన్దిత్వా చక్కవాళం వా సినేరుం వా ఆహచ్చ యోజనద్వియోజనదసయోజనప్పమాణమ్పి ఉగ్గన్త్వా పున మహాసముద్దే పతతి, యస్స పతితట్ఠానే మహానరకపపాతో వియ హోతి, యం లోకే బలవాముఖన్తి వుచ్చతి. తం సన్ధాయ ఏవం వదతి.

యస్మా పన తత్థ తథారూపానం మచ్ఛకచ్ఛపదేవదానవానం పతిట్ఠాపి హోతి సుఖనివాసోపి, తస్మా అసన్తం అసంవిజ్జమానం తం తం వాచం భాసతి నామ. యస్మా పన సబ్బపుథుజ్జనా సారీరికాయ దుక్ఖవేదనాయ పతిట్ఠాతుం న సక్కోన్తి, తస్మా పాతస్స అలన్తి అత్థేన అయమేవ పాతాలోతి దస్సేన్తో సారీరికానం ఖో ఏతం భిక్ఖవేతిఆదిమాహ.

పాతాలే న పచ్చుట్ఠాసీతి పాతాలస్మిం న పతిట్ఠాసి. గాధన్తి పతిట్ఠం. అక్కన్దతీతి అనిబద్ధం విప్పలాపం విలపన్తో కన్దతి. దుబ్బలోతి దుబ్బలఞాణో. అప్పథామకోతి ఞాణథామస్స పరిత్తతాయ పరిత్తథామకో. ఇమస్మిం సుత్తే అరియసావకోతి సోతాపన్నో. సోతాపన్నో హి ఏత్థ ధురం, బలవవిపస్సకో న తిక్ఖబుద్ధి ఉప్పన్నం వేదనం అననువత్తిత్వా పతిట్ఠాతుం సమత్థో యోగావచరోపి వట్టతి.