౬. అవిజ్జావగ్గవణ్ణనా

౫౩-౬౨. అవిజ్జావగ్గే అవిజ్జాతి చతూసు సచ్చేసు అఞ్ఞాణం. విజ్జాతి అరహత్తమగ్గవిజ్జా. అనిచ్చతో జానతో పస్సతోతి దుక్ఖానత్తవసేనాపి జానతో పస్సతో పహీయతియేవ, ఇదం పన అనిచ్చవసేన కథితే బుజ్ఝనకపుగ్గలస్స అజ్ఝాసయేన వుత్తం. ఏసేవ నయో సబ్బత్థ. అపి చేత్థ సంయోజనాతి దస సంయోజనాని. ఆసవాతి చత్తారో ఆసవా. అనుసయాతి సత్త అనుసయా. సబ్బుపాదానపరిఞ్ఞాయాతి సబ్బేసం చతున్నమ్పి ఉపాదానానం తీహి పరిఞ్ఞాహి పరిజాననత్థాయ. పరియాదానాయాతి ఖేపనత్థాయ. సేసం సబ్బత్థ ఉత్తానమేవాతి.

అవిజ్జావగ్గో ఛట్ఠో.