౪. ఓక్ఖాసుత్తవణ్ణనా

౨౨౬. చతుత్థే ఓక్ఖాసతన్తి మహాముఖఉక్ఖలీనం సతం. దానం దదేయ్యాతి పణీతభోజనభరితానం మహాఉక్ఖలీనం సతం దానం దదేయ్య. ‘‘ఉక్కాసత’’న్తిపి పాఠో, తస్స దణ్డదీపికాసతన్తి అత్థో. ఏకాయ పన దీపికాయ యత్తకే ఠానే ఆలోకో హోతి, తతో సతగుణం ఠానం సత్తహి రతనేహి పూరేత్వా దానం దదేయ్యాతి అత్థో. గద్దుహనమత్తన్తి గోదుహనమత్తం, గావియా ఏకవారం అగ్గథనాకడ్ఢనమత్తన్తి అత్థో. గన్ధఊహనమత్తం వా, ద్వీహి అఙ్గులీహి గన్ధపిణ్డం గహేత్వా ఏకవారం ఘాయనమత్తన్తి అత్థో. ఏత్తకమ్పి హి కాలం యో పన గబ్భపరివేణవిహారూపచార పరిచ్ఛేదేన వా చక్కవాళపరిచ్ఛేదేన వా అపరిమాణాసు లోకధాతూసు వా సబ్బసత్తేసు హితఫరణం మేత్తచిత్తం భావేతుం సక్కోతి, ఇదం తతో ఏకదివసం తిక్ఖత్తుం దిన్నదానతో మహప్ఫలతరం. చతుత్థం.