౯. అన్తరపేయ్యాలం

౧. సత్థుసుత్తాదివణ్ణనా

౭౩. ఇతో పరం ‘‘సత్థా పరియేసితబ్బో’’తిఆదినయప్పవత్తా ద్వాదస అన్తరపేయ్యాలవగ్గా నామ హోన్తి. తే సబ్బేపి తథా తథా బుజ్ఝనకానం వేనేయ్యపుగ్గలానం అజ్ఝాసయవసేన వుత్తా. తత్థ సత్థాతి బుద్ధో వా హోతు సావకో వా, యం నిస్సాయ మగ్గఞాణం లభతి, అయం సత్థా నామ, సో పరియేసితబ్బో. సిక్ఖా కరణీయాతి తివిధాపి సిక్ఖా కాతబ్బా. యోగాదీసు యోగోతి పయోగో. ఛన్దోతి కత్తుకమ్యతాకుసలచ్ఛన్దో. ఉస్సోళ్హీతి సబ్బసహం అధిమత్తవీరియం. అప్పటివానీతి అనివత్తనా. ఆతప్పన్తి కిలేసతాపనవీరియమేవ. సాతచ్చన్తి సతతకిరియం. సతీతి జరామరణాదివసేన చతుసచ్చపరిగ్గాహికా సతి. సమ్పజఞ్ఞన్తి తాదిసమేవ ఞాణం. అప్పమాదోతి సచ్చభావనాయ అప్పమాదో. సేసం సబ్బత్థ ఉత్తానమేవాతి.

అన్తరపేయ్యాలో నవమో.

నిదానసంయుత్తవణ్ణనా నిట్ఠితా.