౩. దుక్ఖసుత్తవణ్ణనా

౪౩. తతియే దుక్ఖస్సాతి వట్టదుక్ఖస్స. సముదయన్తి ద్వే సముదయా ఖణికసముదయో చ పచ్చయసముదయో చ. పచ్చయసముదయం పస్సన్తోపి భిక్ఖు ఖణికసముదయం పస్సతి, ఖణికసముదయం పస్సన్తోపి పచ్చయసముదయం పస్సతి. అత్థఙ్గమోపి అచ్చన్తత్థఙ్గమో భేదత్థఙ్గమోతి దువిధో. అచ్చన్తత్థఙ్గమం పస్సన్తోపి భేదత్థఙ్గమం పస్సతి, భేదత్థఙ్గమం పస్సన్తోపి అచ్చన్తత్థఙ్గమం పస్సతి. దేసేస్సామీతి ఇదం వట్టదుక్ఖస్స సముదయఅత్థఙ్గమం నిబ్బత్తిభేదం నామ దేసేస్సామి, తం సుణాథాతి అత్థో. పటిచ్చాతి నిస్సయవసేన చేవ ఆరమ్మణవసేన చ పచ్చయం కత్వా. తిణ్ణం సఙ్గతి ఫస్సోతి తిణ్ణం సఙ్గతియా ఫస్సో. అయం ఖో, భిక్ఖవే, దుక్ఖస్స సముదయోతి అయం వట్టదుక్ఖస్స నిబ్బత్తి నామ. అత్థఙ్గమోతి భేదో. ఏవఞ్హి వట్టదుక్ఖం భిన్నం హోతి అప్పటిసన్ధియం. తతియం.