౩. సమణబ్రాహ్మణసుత్తవణ్ణనా

౧౩. తతియే సమణా వా బ్రాహ్మణా వాతి సచ్చాని పటివిజ్ఝితుం అసమత్థా బాహిరకసమణబ్రాహ్మణా. జరామరణం నప్పజానన్తీతిఆదీసు జరామరణం న జానన్తి దుక్ఖసచ్చవసేన, జరామరణసముదయం న జానన్తి సహ తణ్హాయ జాతి జరామరణస్స సముదయోతి సముదయసచ్చవసేన, జరామరణనిరోధం న జానన్తి నిరోధసచ్చవసేన, పటిపదం న జానన్తి మగ్గసచ్చవసేన. జాతిం న జానన్తి దుక్ఖసచ్చవసేన, జాతిసముదయం న జానన్తి సహ తణ్హాయ భవో జాతిసముదయోతి సముదయసచ్చవసేన. ఏవం సహ తణ్హాయ సముదయం యోజేత్వా సబ్బపదేసు చతుసచ్చవసేన అత్థో వేదితబ్బో. సామఞ్ఞత్థం వా బ్రహ్మఞ్ఞత్థం వాతి ఏత్థ అరియమగ్గో సామఞ్ఞఞ్చేవ బ్రహ్మఞ్ఞఞ్చ. ఉభయత్థాపి పన అత్థో నామ అరియఫలం వేదితబ్బం. ఇతి భగవా ఇమస్మిం సుత్తే ఏకాదససు ఠానేసు చత్తారి సచ్చాని కథేసీతి. తతియం.