౫-౧౦. సిఖీసుత్తాదివణ్ణనా

౫-౧౦. పఞ్చమాదీసు సిఖిస్స, భిక్ఖవేతిఆదీనం పదానం ‘‘సిఖిస్సపి, భిక్ఖవే’’తి న ఏవం యోజేత్వా అత్థో వేదితబ్బో. కస్మా? ఏకాసనే అదేసితత్తా. నానాఠానేసు హి ఏతాని దేసితాని, అత్థో పన సబ్బత్థ సదిసోయేవ. సబ్బబోధిసత్తానఞ్హి బోధిపల్లఙ్కే నిసిన్నానం న అఞ్ఞో సమణో వా బ్రాహ్మణో వా దేవో వా మారో వా బ్రహ్మా వా ఆచిక్ఖతి – ‘‘అతీతే బోధిసత్తా పచ్చయాకారం సమ్మసిత్వా బుద్ధా జాతా’’తి. యథా పన పఠమకప్పికకాలే దేవే వుట్ఠే ఉదకస్స గతమగ్గేనేవ అపరాపరం వుట్ఠిఉదకం గచ్ఛతి, ఏవం తేహి తేహి పురిమబుద్ధేహి గతమగ్గేనేవ పచ్ఛిమా పచ్ఛిమా గచ్ఛన్తి. సబ్బబోధిసత్తా హి ఆనాపానచతుత్థజ్ఝానతో వుట్ఠాయ పచ్చయాకారే ఞాణం ఓతారేత్వా తం అనులోమపటిలోమం సమ్మసిత్వా బుద్ధా హోన్తీతి పటిపాటియా సత్తసు సుత్తేసు బుద్ధవిపస్సనా నామ కథితాతి.

బుద్ధవగ్గో పఠమో.