౫. దుతియసఙ్గామసుత్తవణ్ణనా

౧౨౬. పఞ్చమే అబ్భుయ్యాసీతి పరాజయే గరహప్పత్తో ‘‘ఆరామం గన్త్వా భిక్ఖూనం కథాసల్లాపం సుణాథా’’తి రత్తిభాగే బుద్ధరక్ఖితేన నామ వుడ్ఢపబ్బజితేన ధమ్మరక్ఖితస్స వుడ్ఢపబ్బజితస్స ‘‘సచే రాజా ఇమఞ్చ ఉపాయం కత్వా గచ్ఛేయ్య, పున జినేయ్యా’’తి వుత్తజయకారణం సుత్వా అభిఉయ్యాసి.

యావస్స ఉపకప్పతీతి యావ తస్స ఉపకప్పతి సయ్హం హోతి. యదా చఞ్ఞేతి యదా అఞ్ఞే. విలుమ్పన్తీతి తం విలుమ్పిత్వా ఠితపుగ్గలం విలుమ్పన్తి. విలుమ్పతీతి విలుమ్పియతి. ఠానం హి మఞ్ఞతీతి ‘‘కారణ’’న్తి హి మఞ్ఞతి. యదాతి యస్మిం కాలే. జేతారం లభతే జయన్తి జయన్తో పుగ్గలో పచ్ఛా జేతారమ్పి లభతి. రోసేతారన్తి ఘట్టేతారం. రోసకోతి ఘట్టకో. కమ్మవివట్టేనాతి కమ్మపరిణామేన, తస్స విలుమ్పనకమ్మస్స విపాకదానేన. సో విలుత్తో విలుప్పతీతి సో విలుమ్పకో విలుమ్పియతి. పఞ్చమం.