౭. అడ్డకరణసుత్తవణ్ణనా

౧౧౮. సత్తమే కామహేతూతి కామమూలకం. కామనిదానన్తి కామపచ్చయా. కామాధికరణన్తి కామకారణా. సబ్బాని హేతాని అఞ్ఞమఞ్ఞవేవచనానేవ. భద్రముఖోతి సున్దరముఖో. ఏకదివసం కిర రాజా అడ్డకరణే నిసీది. తత్థ పఠమతరం లఞ్జం గహేత్వా నిసిన్నా అమచ్చా అస్సామికేపి సామికే కరింసు. రాజా తం ఞత్వా – ‘‘మయ్హం తావ పథవిస్సరస్స సమ్ముఖాపేతే ఏవం కరోన్తి, పరమ్ముఖా కిం నామ న కరిస్సన్తి? పఞ్ఞాయిస్సతి దాని విటటూభో సేనాపతి సకేన రజ్జేన, కిం మయ్హం ఏవరూపేహి లఞ్జఖాదకేహి ముసావాదీహి సద్ధిం ఏకట్ఠానే నిసజ్జాయా’’తి చిన్తేసి. తస్మా ఏవమాహ. ఖిప్పంవ ఓడ్డితన్తి కుమినం వియ ఓడ్డితం. యథా మచ్ఛా ఓడ్డితం కుమినం పవిసన్తా న జానన్తి, ఏవం సత్తా కిలేసకామేన వత్థుకామం వీతిక్కమన్తా న జానన్తీతి అత్థో. సత్తమం.