౭. పఞ్చాలచణ్డసుత్తవణ్ణనా

౮౮. సత్తమే సమ్బాధేతి నీవరణసమ్బాధం కామగుణసమ్బాధన్తి ద్వే సమ్బాధా. తేసు ఇధ నీవరణసమ్బాధం అధిప్పేతం. ఓకాసన్తి ఝానస్సేతం నామం. పటిలీననిసభోతి పటిలీనసేట్ఠో. పటిలీనో నామ పహీనమానో వుచ్చతి. యథాహ – ‘‘కథఞ్చ, భిక్ఖవే, భిక్ఖు పటిలీనో హోతి. ఇధ, భిక్ఖవే, భిక్ఖునో అస్మిమానో పహీనో హోతి ఉచ్ఛిన్నమూలో తాలావత్థుకతో అనభావంకతో ఆయతిం అనుప్పాదధమ్మో’’తి (అ. ని. ౪.౩౮; మహాని. ౮౭). పచ్చలత్థంసూతి పటిలభింసు. సమ్మా తేతి యే నిబ్బానపత్తియా సతిం పటిలభింసు, తే లోకుత్తరసమాధినాపి సుసమాహితాతి మిస్సకజ్ఝానం కథితం. సత్తమం.