౧. వతపదసుత్తవణ్ణనా

౨౫౭. దుతియవగ్గస్స పఠమే వతపదానీతి వతకోట్ఠాసాని. సమత్తానీతి పరిపుణ్ణాని. సమాదిన్నానీతి గహితాని. కులే జేట్ఠాపచాయీతి కులజేట్ఠకానం మహాపితా మహామాతా చూళపితా చూళమాతా మాతులో మాతులానీతిఆదీనం అపచితికారకో. సణ్హవాచోతి పియముదుమధురవాచో. ముత్తచాగోతి విస్సట్ఠచాగో. పయతపాణీతి దేయ్యధమ్మదానత్థాయ సదా ధోతహత్థో. వోస్సగ్గరతోతి వోస్సజ్జనే రతో. యాచయోగోతి పరేహి యాచితబ్బారహో, యాచయోగోతి వా యాచయోగేనేవ యుత్తో. దానసంవిభాగరతోతి దానే చ సంవిభాగే చ రతో. పఠమం.