౨. రథసుత్తవణ్ణనా

౭౨. దుతియే పఞ్ఞాయతి ఏతేనాతి పఞ్ఞాణం. ధజో రథస్సాతి మహన్తస్మిం హి సఙ్గామసీసే దూరతోవ ధజం దిస్వా ‘‘అసుకరఞ్ఞో నామ అయం రథో’’తి రథో పాకటో హోతి. తేన వుత్తం ‘‘ధజో రథస్స పఞ్ఞాణ’’న్తి. అగ్గిపి దూరతోవ ధూమేన పఞ్ఞాయతి. చోళరట్ఠం పణ్డురట్ఠన్తి ఏవం రట్ఠమ్పి రఞ్ఞా పఞ్ఞాయతి. చక్కవత్తిరఞ్ఞో ధీతాపి పన ఇత్థీ ‘‘అసుకస్స నామ భరియా’’తి భత్తారం పత్వావ పఞ్ఞాయతి. తస్మా ధూమో పఞ్ఞాణమగ్గినోతిఆది వుత్తం. దుతియం.