౩. పుణ్ణోవాదసుత్తవణ్ణనా

౩౯౫. ఏవం మే సుతన్తి పుణ్ణోవాదసుత్తం. తత్థ పటిసల్లానాతి ఏకీభావా. తం చేతి తం చక్ఖుఞ్చేవ రూపఞ్చ. నన్దీసముదయా దుక్ఖసముదయోతి నన్దియా తణ్హాయ సమోధానేన పఞ్చక్ఖన్ధదుక్ఖస్స సమోధానం హోతి. ఇతి ఛసు ద్వారేసు దుక్ఖం సముదయోతి ద్విన్నం సచ్చానం వసేన వట్టం మత్థకం పాపేత్వా దస్సేసి. దుతియనయే నిరోధో మగ్గోతి ద్విన్నం సచ్చానం వసేన వివట్టం మత్థకం పాపేత్వా దస్సేసి. ఇమినా చ త్వం పుణ్ణాతి పాటియేక్కో అనుసన్ధి. ఏవం తావ వట్టవివట్టవసేన దేసనం అరహత్తే పక్ఖిపిత్వా ఇదాని పుణ్ణత్థేరం సత్తసు ఠానేసు సీహనాదం నదాపేతుం ఇమినా చ త్వన్తిఆదిమాహ.

౩౯౬. చణ్డాతి దుట్ఠా కిబ్బిసా. ఫరుసాతి కక్ఖళా. అక్కోసిస్సన్తీతి దసహి అక్కోసవత్థూహి అక్కోసిస్సన్తి. పరిభాసిస్సన్తీతి కిం సమణో నామ త్వం, ఇదఞ్చ ఇదఞ్చ తే కరిస్సామాతి తజ్జేస్సన్తి. ఏవమేత్థాతి ఏవం మయ్హం ఏత్థ భవిస్సతి.

దణ్డేనాతి చతుహత్థేన దణ్డేన వా ఘటికముగ్గరేన వా. సత్థేనాతి ఏకతోధారాదినా. సత్థహారకం పరియేసన్తీతి జీవితహారకం సత్థం పరియేసన్తి. ఇదం థేరో తతియపారాజికవత్థుస్మిం అసుభకథం సుత్వా అత్తభావేన జిగుచ్ఛన్తానం భిక్ఖూనం సత్థహారకపరియేసనం సన్ధాయాహ. దమూపసమేనాతి ఏత్థ దమోతి ఇన్ద్రియసంవరాదీనం ఏతం నామం. ‘‘సచ్చేన దన్తో దమసా ఉపేతో, వేదన్తగూ వుసితబ్రహ్మచరియో’’తి (సం. ని. ౧.౧౯౫; సు. ని. ౪౬౭) ఏత్థ హి ఇన్ద్రియసంవరో దమోతి వుత్తో. ‘‘యది సచ్చా దమా చాగా, ఖన్త్యా భియ్యోధ విజ్జతీ’’తి (సం. ని. ౧.౨౪౬; సు. ని. ౧౯౧) ఏత్థ పఞ్ఞా దమోతి వుత్తో. ‘‘దానేన దమేన సంయమేన సచ్చవజ్జేనా’’తి (దీ. ని. ౧.౧౬౬; మ. ని. ౨.౨౨౬) ఏత్థ ఉపోసథకమ్మం దమోతి వుత్తం. ఇమస్మిం పన సుత్తే ఖన్తి దమోతి వేదితబ్బా. ఉపసమోతి తస్సేవ వేవచనం.

౩౯౭. అథ ఖో ఆయస్మా పుణ్ణోతి కో పనేస పుణ్ణో, కస్మా పనేత్థ గన్తుకామో అహోసీతి. సునాపరన్తవాసికో ఏవ ఏసో, సావత్థియం పన అసప్పాయవిహారం సల్లక్ఖేత్వా తత్థ గన్తుకామో అహోసి.

తత్రాయం అనుపుబ్బికథా – సునాపరన్తరట్ఠే కిర ఏకస్మిం వాణిజకగామే ఏతే ద్వే భాతరో. తేసు కదాచి జేట్ఠో పఞ్చ సకటసతాని గహేత్వా జనపదం గన్త్వా భణ్డం ఆహరతి, కదాచి కనిట్ఠో. ఇమస్మిం పన సమయే కనిట్ఠం ఘరే ఠపేత్వా జేట్ఠభాతికో పఞ్చ సకటసతాని గహేత్వా జనపదచారికం చరన్తో అనుపుబ్బేన సావత్థిం పత్వా జేతవనస్స నాతిదూరే సకటసత్థం నివాసేత్వా భుత్తపాతరాసో పరిజనపరివుతో ఫాసుకట్ఠానే నిసీది.

తేన చ సమయేన సావత్థివాసినో భుత్తపాతరాసా ఉపోసథఙ్గాని అధిట్ఠాయ సుద్ధుత్తరాసఙ్గా గన్ధపుప్ఫాదిహత్థా యేన బుద్ధో యేన ధమ్మో యేన సఙ్ఘో, తన్నిన్నా తప్పోణా తప్పాబ్భారా హుత్వా దక్ఖిణద్వారేన నిక్ఖమిత్వా జేతవనం గచ్ఛన్తి. సో తే దిస్వా ‘‘కహం ఇమే గచ్ఛన్తి’’తి ఏకమనుస్సం పుచ్ఛి. కిం త్వం అయ్యో న జానాసి, లోకే బుద్ధధమ్మసఙ్ఘరతనాని నామ ఉప్పన్నాని, ఇచ్చేస మహాజనో సత్థు సన్తికే ధమ్మకథం సోతుం గచ్ఛతీతి. తస్స బుద్ధోతి వచనం ఛవిచమ్మాదీని ఛిన్దిత్వా అట్ఠిమిఞ్జం ఆహచ్చ అట్ఠాసి. అథ అత్తనో పరిజనపరివుతో తాయ పరిసాయ సద్ధిం విహారం గన్త్వా సత్థు మధురస్సరేన ధమ్మం దేసేన్తస్స పరిసపరియన్తే ఠితో ధమ్మం సుత్వా పబ్బజ్జాయ చిత్తం ఉప్పాదేసి. అథ తథాగతేన కాలం విదిత్వా పరిసాయ ఉయ్యోజితాయ సత్థారం ఉపసఙ్కమిత్వా వన్దిత్వా స్వాతనాయ నిమన్తేత్వా దుతియదివసే మణ్డపం కారేత్వా ఆసనాని పఞ్ఞపేత్వా బుద్ధప్పముఖస్స సఙ్ఘస్స మహాదానం దత్వా భుత్తపాతరాసో ఉపోసథఙ్గాని అధిట్ఠాయ భణ్డాగారికం పక్కోసాపేత్వా, ఏత్తకం భణ్డం విస్సజ్జితం, ఏత్తకం న విస్సజ్జితన్తి సబ్బం ఆచిక్ఖిత్వా – ‘‘ఇమం సాపతేయ్యం మయ్హం కనిట్ఠస్స దేహీ’’తి సబ్బం నియ్యాతేత్వా సత్థు సన్తికే పబ్బజిత్వా కమ్మట్ఠానపరాయణో అహోసి.

అథస్స కమ్మట్ఠానం మనసికరోన్తస్స కమ్మట్ఠానం న ఉపట్ఠాతి. తతో చిన్తేసి – ‘‘అయం జనపదో మయ్హం అసప్పాయో, యంనూనాహం సత్థు సన్తికే కమ్మట్ఠానం గహేత్వా సకట్ఠానమేవ గచ్ఛేయ్య’’న్తి. అథ పుబ్బణ్హసమయే పిణ్డాయ చరిత్వా సాయన్హసమయే పటిసల్లానా వుట్ఠహిత్వా భగవన్తం ఉపసఙ్కమిత్వా కమ్మట్ఠానం కథాపేత్వా సత్త సీహనాదే నదిత్వా పక్కామి. తేన వుత్తం – ‘‘అథ ఖో ఆయస్మా పుణ్ణో…పే… విహరతీ’’తి.

కత్థ పనాయం విహాసీతి? చతూసు ఠానేసు విహాసి, సునాపరన్తరట్ఠం తావ పవిసిత్వా అజ్జుహత్థపబ్బతే నామ పవిసిత్వా వాణిజగామం పిణ్డాయ పావిసి. అథ నం కనిట్ఠభాతా సఞ్జానిత్వా భిక్ఖం దత్వా, ‘‘భన్తే, అఞ్ఞత్థ అగన్త్వా ఇధేవ వసథా’’తి పటిఞ్ఞం కారేత్వా తత్థేవ వసాపేసి.

తతో సముద్దగిరివిహారం నామ అగమాసి. తత్థ అయకన్తపాసాణేహి పరిచ్ఛిన్దిత్వా కతచఙ్కమో అత్థి, తం కోచి చఙ్కమితుం సమత్థో నామ నత్థి. తత్థ సముద్దవీచియో ఆగన్త్వా అయకన్తపాసాణేసు పహరిత్వా మహాసద్దం కరోన్తి. థేరోనం – ‘‘కమ్మట్ఠానం మనసికరోన్తానం ఫాసువిహారో హోతూ’’తి సముద్దం నిస్సద్దం కత్వా అధిట్ఠాసి.

తతో మాతులగిరిం నామ అగమాసి. తత్థ సకుణసఙ్ఘో ఉస్సన్నో, రత్తిఞ్చ దివా చ సద్దో ఏకాబద్ధోవ హోతి, థేరో ఇమం ఠానం అఫాసుకన్తి తతో మకులకారామవిహారం నామ గతో. సో వాణిజగామస్స నాతిదూరో నచ్చాసన్నో గమనాగమనసమ్పన్నో వివిత్తో అప్పసద్దో. థేరో ఇమం ఠానం ఫాసుకన్తి తత్థ రత్తిట్ఠానదివాట్ఠానచఙ్కమనాదీని కారేత్వా వస్సం ఉపగచ్ఛి. ఏవం చతూసు ఠానేసు విహాసి.

అథేకదివసం తస్మింయేవ అన్తోవస్సే పఞ్చ వాణిజసతాని పరసముద్దం గచ్ఛామాతి నావాయ భణ్డం పక్ఖిపింసు. నావారోహనదివసే థేరస్స కనిట్ఠభాతా థేరం భోజేత్వా థేరస్స సన్తికే సిక్ఖాపదాని గహేత్వా వన్దిత్వా గచ్ఛన్తో, – ‘‘భన్తే, మహాసముద్దో నామ అప్పమేయ్యో అనేకన్తరాయో, అమ్హే ఆవజ్జేయ్యాథా’’తి వత్వా నావం ఆరుహి. నావా ఉత్తమజవేన గచ్ఛమానా అఞ్ఞతరం దీపకం పాపుణి. మనుస్సా పాతరాసం కరిస్సామాతి దీపకే ఓతిణ్ణా. తస్మిం దీపే అఞ్ఞం కిఞ్చి నత్థి, చన్దనవనమేవ అహోసి.

అథేకో వాసియా రుక్ఖం ఆకోటేత్వా లోహితచన్దనభావం ఞత్వా ఆహ – ‘‘భో మయం లాభత్థాయ పరసముద్దం గచ్ఛామ, ఇతో చ ఉత్తరి లాభో నామ నత్థి, చతురఙ్గులమత్తా ఘటికా సతసహస్సం అగ్ఘతి, హారేతబ్బకయుత్తం భణ్డం హారేత్వా చన్దనస్స పూరేమా’’తి. తే తథా కరింసు. చన్దనవనే అధివత్థా అమనుస్సా కుజ్ఝిత్వా – ‘‘ఇమేహి అమ్హాకం చన్దనవనం నాసితం, ఘాతేస్సామ నే’’తి చిన్తేత్వా – ‘‘ఇధేవ ఘాతితేసు సబ్బం వనం ఏకం కుణపం భవిస్సతి, సముద్దమజ్ఝే నేసం నావం ఓసీదేస్సామా’’తి ఆహంసు. అథ తేసం నావం ఆరుయ్హ ముహుత్తం గతకాలేయేవ ఉప్పాదికం ఉట్ఠపేత్వా సయమ్పి తే అమనుస్సా భయానకాని రూపాని దస్సయింసు. భీతా మనుస్సా అత్తనో అత్తనో దేవతా నమస్సన్తి. థేరస్స కనిట్ఠో చూళపుణ్ణకుటుమ్బికో – ‘‘మయ్హం భాతా అవస్సయో హోతూ’’తి థేరస్స నమస్సమానో అట్ఠాసి.

థేరోపి కిర తస్మింయేవ ఖణే ఆవజ్జిత్వా తేసం బ్యసనుప్పత్తిం ఞత్వా వేహాసం ఉప్పతిత్వా సమ్ముఖే అట్ఠాసి. అమనుస్సా థేరం దిస్వా ‘‘అయ్యో పుణ్ణత్థేరో ఏతీ’’తి పక్కమింసు, ఉప్పాదికం సన్నిసీది. థేరో మా భాయథాతి తే అస్సాసేత్వా ‘‘కహం గన్తుకామత్థా’’తి పుచ్ఛి. భన్తే, అమ్హాకం సకట్ఠానమేవ గచ్ఛామాతి. థేరో నావం ఫలే అక్కమిత్వా ‘‘ఏతేసం ఇచ్ఛితట్ఠానం గచ్ఛతూ’’తి అధిట్ఠాసి. వాణిజా సకట్ఠానం గన్త్వా తం పవత్తిం పుత్తదారస్స ఆరోచేత్వా ‘‘ఏథ థేరం సరణం గచ్ఛామా’’తి పఞ్చసతా అత్తనో పఞ్చమాతుగామసతేహి సద్ధిం తీసు సరణేసు పతిట్ఠాయ ఉపాసకత్తం పటివేదేసుం. తతో నావాయ భణ్డం ఓతారేత్వా థేరస్స ఏకం కోట్ఠాసం కత్వా – ‘‘అయం, భన్తే, తుమ్హాకం కోట్ఠాసో’’తి ఆహంసు. థేరో – ‘‘మయ్హం విసుం కోట్ఠాసకిచ్చం నత్థి, సత్థా పన తుమ్హేహి దిట్ఠపుబ్బో’’తి. న దిట్ఠపుబ్బో, భన్తేతి. తేన హి ఇమినా సత్థు మణ్డలమాళం కరోథ, ఏవం సత్థారం పస్సిస్సథాతి. తే సాధు, భన్తేతి తేన చ కోట్ఠాసేన అత్తనో చ కోట్ఠాసేహి మణ్డలమాళం కాతుం ఆరభింసు.

సత్థాపి కిర ఆరద్ధకాలతో పట్ఠాయ పరిభోగం అకాసి. ఆరక్ఖమనుస్సా రత్తిం ఓభాసం దిస్వా ‘‘మహేసక్ఖా దేవతా అత్థీ’’తి సఞ్ఞం కరింసు. ఉపాసకా మణ్డలమాళఞ్చ భిక్ఖుసఙ్ఘస్స చ సేనాసనాని నిట్ఠపేత్వా దానసమ్భారం సజ్జేత్వా – ‘‘కతం, భన్తే, అమ్హేహి అత్తనో కిచ్చం, సత్థారం పక్కోసథా’’తి థేరస్స ఆరోచేసుం. థేరో సాయన్హసమయే ఇద్ధియా సావత్థిం పత్వా, ‘‘భన్తే, వాణిజగామవాసినో తుమ్హే దట్ఠుకామా, తేసం అనుకమ్పం కరోథా’’తి భగవన్తం యాచి. భగవా అధివాసేసి. థేరో భగవతో అధివాసనం విదిత్వా సకట్ఠానమేవ పచ్చాగతో.

భగవాపి ఆనన్దథేరం ఆమన్తేసి, – ‘‘ఆనన్ద, స్వే సునాపరన్తే వాణిజగామే పిణ్డాయ చరిస్సామ, త్వం ఏకూనపఞ్చసతానం భిక్ఖూనం సలాకం దేహీ’’తి. థేరో సాధు, భన్తేతి భిక్ఖుసఙ్ఘస్స తమత్థం ఆరోచేత్వా నభచారికా భిక్ఖూ సలాకం గణ్హన్తూతి ఆహ. తందివసం కుణ్డధానత్థేరో పఠమం సలాకం అగ్గహేసి. వాణిజగామవాసినోపి ‘‘స్వే కిర సత్థా ఆగమిస్సతీ’’తి గామమజ్ఝే మణ్డపం కత్వా దానగ్గం సజ్జయింసు. భగవా పాతోవ సరీరపటిజగ్గనం కత్వా గన్ధకుటిం పవిసిత్వా ఫలసమాపత్తిం అప్పేత్వా నిసీది. సక్కస్స పణ్డుకమ్బలసిలాసనం ఉణ్హం అహోసి. సో కిం ఇదన్తి ఆవజ్జేత్వా సత్థు సునాపరన్తగమనం దిస్వా విస్సకమ్మం ఆమన్తేసి – ‘‘తాత అజ్జ భగవా తిమత్తాని యోజనసతాని పిణ్డాచారం కరిస్సతి, పఞ్చ కూటాగారసతాని మాపేత్వా జేతవనద్వారకోట్ఠమత్థకే గమనసజ్జాని కత్వా ఠపేహీ’’తి. సో తథా అకాసి. భగవతో కూటాగారం చతుముఖం అహోసి, ద్విన్నం అగ్గసావకానం ద్విముఖాని, సేసాని ఏకముఖాని. సత్థా గన్ధకుటితో నిక్ఖమ్మ పటిపాటియా ఠపితకూటాగారేసు ధురకూటాగారం పావిసి. ద్వే అగ్గసావకే ఆదిం కత్వా ఏకూనపఞ్చభిక్ఖుసతానిపి కూటాగారం గన్త్వా నిసిన్నా అహేసుం. ఏకం తుచ్ఛకూటాగారం అహోసి, పఞ్చపి కూటాగారసతాని ఆకాసే ఉప్పతింసు.

సత్థా సచ్చబన్ధపబ్బతం నామ పత్వా కూటాగారం ఆకాసే ఠపేసి. తస్మిం పబ్బతే సచ్చబన్ధో నామ మిచ్ఛాదిట్ఠికతాపసో మహాజనం మిచ్ఛాదిట్ఠిం ఉగ్గణ్హాపేన్తో లాభగ్గయసగ్గప్పత్తో హుత్వా వసతి. అబ్భన్తరే చస్స అన్తోచాటియం పదీపో వియ అరహత్తస్స ఉపనిస్సయో జలతి. తం దిస్వా ధమ్మమస్స కథేస్సామీతి గన్త్వా ధమ్మం దేసేసి. తాపసో దేసనాపరియోసానే అరహత్తం పాపుణి, మగ్గేనేవాస్స అభిఞ్ఞా ఆగతా. ఏహిభిక్ఖు హుత్వా ఇద్ధిమయపత్తచీవరధరో హుత్వా కూటాగారం పావిసి.

భగవా కూటాగారగతేహి పఞ్చహి భిక్ఖుసతేహి సద్ధిం వాణిజగామం గన్త్వా కూటాగారాని అదిస్సమానాని కత్వా వాణిజగామం పావిసి. వాణిజా బుద్ధప్పముఖస్స భిక్ఖుసఙ్ఘస్స మహాదానం దత్వా సత్థారం మకులకారామం నయింసు. సత్థా మణ్డలమాళం పావిసి. మహాజనో యావ సత్థా భత్తదరథం పటిపస్సమ్భేతి, తావ పాతరాసం కత్వా ఉపోసథఙ్గాని సమాదాయ బహుం గన్ధఞ్చ పుప్ఫఞ్చ ఆదాయ ధమ్మస్సవనత్థాయ ఆరామం పచ్చాగమాసి. సత్థా ధమ్మం దేసేసి. మహాజనస్స బన్ధనమోక్ఖో జాతో, మహన్తం బుద్ధకోలాహలం అహోసి.

సత్థా మహాజనస్స సఙ్గహత్థం కతిపాహం తత్థేవ వసి, అరుణం పన మహాగన్ధకుటియంయేవ ఉట్ఠపేసి. తత్థ కతిపాహం వసిత్వా వాణిజగామే పిణ్డాయ చరిత్వా ‘‘త్వం ఇధేవ వసాహీ’’తి పుణ్ణత్థేరం నివత్తేత్వా అన్తరే నమ్మదానదీ నామ అత్థి, తస్సా తీరం అగమాసి. నమ్మదానాగరాజా సత్థు పచ్చుగ్గమనం కత్వా నాగభవనం పవేసేత్వా తిణ్ణం రతనానం సక్కారం అకాసి. సత్థా తస్స ధమ్మం కథేత్వా నాగభవనా నిక్ఖమి. సో – ‘‘మయ్హం, భన్తే, పరిచరితబ్బం దేథా’’తి యాచి, భగవా నమ్మదానదీతీరే పదచేతియం దస్సేసి. తం వీచీసు ఆగతాసు పిధీయతి, గతాసు వివరీయతి, మహాసక్కారప్పత్తం అహోసి. సత్థా తతో నిక్ఖమ్మ సచ్చబన్ధపబ్బతం గన్త్వా సచ్చబన్ధం ఆహ – ‘‘తయా మహాజనో అపాయమగ్గే ఓతారితో, త్వం ఇధేవ వసిత్వా ఏతేసం లద్ధిం విస్సజ్జాపేత్వా నిబ్బానమగ్గే పతిట్ఠాపేహీ’’తి. సోపి పరిచరితబ్బం యాచి. సత్థా ఘనపిట్ఠిపాసాణే అల్లమత్తికపిణ్డమ్హి లఞ్ఛనం వియ పదచేతియం దస్సేసి, తతో జేతవనమేవ గతో. ఏతమత్థం సన్ధాయ తేనేవన్తరవస్సేనాతిఆది వుత్తం.

పరినిబ్బాయీతి అనుపాదిసేసాయ నిబ్బానధాతుయా పరినిబ్బాయి. మహాజనో థేరస్స సత్త దివసాని సరీరపూజం కత్వా బహూని గన్ధకట్ఠాని సమోధానేత్వా సరీరం ఝాపేత్వా ధాతుయో ఆదాయ చేతియం అకాసి. సమ్బహులా భిక్ఖూతి థేరస్స ఆళాహనే ఠితభిక్ఖూ. సేసం సబ్బత్థ ఉత్తానమేవాతి.

పపఞ్చసూదనియా మజ్ఝిమనికాయట్ఠకథాయ

పుణ్ణోవాదసుత్తవణ్ణనా నిట్ఠితా.