౨. ఛన్నోవాదసుత్తవణ్ణనా

౩౮౯. ఏవం మే సుతన్తి ఛన్నోవాదసుత్తం. తత్థ ఛన్నోతి ఏవంనామకో థేరో, న అభినిక్ఖమనం నిక్ఖన్తత్థేరో. పటిసల్లానాతి ఫలసమాపత్తితో. గిలానపుచ్ఛకాతి గిలానుపట్ఠానం నామ బుద్ధవణ్ణితం, తస్మా ఏవమాహ. సత్థన్తి జీవితహారకసత్థం. నావకఙ్ఖామీతి ఇచ్ఛామి.

౩౯౦. అనుపవజ్జన్తి అనుప్పత్తికం అప్పటిసన్ధికం.

౩౯౧. ఏతం మమాతిఆదీని తణ్హామానదిట్ఠిగాహవసేన వుత్తాని. నిరోధం దిస్వాతి ఖయవయం ఞత్వా. నేతం మమ నేసోహమస్మి న మేసో అత్తాతి సమనుపస్సామీతి అనిచ్చం దుక్ఖం అనత్తాతి సమనుపస్సామి.

౩౯౩. తస్మాతి యస్మా మారణన్తికవేదనం అధివాసేతుం అసక్కోన్తో సత్థం ఆహరామీతి వదతి, తస్మా. పుథుజ్జనో ఆయస్మా, తేన ఇదమ్పి మనసి కరోహీతి దీపేతి. నిచ్చకప్పన్తి నిచ్చకాలం. నిస్సితస్సాతి తణ్హాదిట్ఠీహి నిస్సితస్స. చలితన్తి విప్ఫన్దితం హోతి. పస్సద్ధీతి కాయచిత్తపస్సద్ధి, కిలేసపస్సద్ధి నామ హోతీతి అత్థో. నతీతి తణ్హానతి. నతియా అసతీతి భవత్థాయ ఆలయనికన్తిపరియుట్ఠానేసు అసతి. ఆగతిగతి న హోతీతి పటిసన్ధివసేన ఆగతి నామ న హోతి, చుతివసేన గమనం నామ న హోతి. చుతూపపాతోతి చవనవసేన చుతి, ఉపపజ్జనవసేన ఉపపాతో. నేవిధ న హురం న ఉభయమన్తరేనాతి నయిధ లోకే, న పరలోకే, న ఉభయత్థ హోతి. ఏసేవన్తో దుక్ఖస్సాతి వట్టదుక్ఖకిలేసదుక్ఖస్స అయమేవ అన్తో అయం పరిచ్ఛేదో పరివటుమభావో హోతి. అయమేవ హి ఏత్థ అత్థో. యే పన ‘‘న ఉభయమన్తరేనా’’తి వచనం గహేత్వా అన్తరాభవం ఇచ్ఛన్తి, తేసం ఉత్తరం హేట్ఠా వుత్తమేవ.

౩౯౪. సత్థం ఆహరేసీతి జీవితహారకం సత్థం ఆహరి, కణ్ఠనాళిం ఛిన్ది. అథస్స తస్మిం ఖణే మరణభయం ఓక్కమి, గతినిమిత్తం ఉపట్ఠాసి. సో అత్తనో పుథుజ్జనభావం ఞత్వా సంవిగ్గో విపస్సనం పట్ఠపేత్వా సఙ్ఖారే పరిగ్గణ్హన్తో అరహత్తం పత్వా సమసీసీ హుత్వా పరినిబ్బాయి. సమ్ముఖాయేవ అనుపవజ్జతా బ్యాకతాతి కిఞ్చాపి ఇదం థేరస్స పుథుజ్జనకాలే బ్యాకరణం హోతి, ఏతేన పన బ్యాకరణేన అనన్తరాయమస్స పరినిబ్బానం అహోసి. తస్మా భగవా తమేవ బ్యాకరణం గహేత్వా కథేసి. ఉపవజ్జకులానీతి ఉపసఙ్కమితబ్బకులాని. ఇమినా థేరో, – ‘‘భన్తే, ఏవం ఉపట్ఠాకేసు చ ఉపట్ఠాయికాసు చ విజ్జమానాసు సో భిక్ఖు తుమ్హాకం సాసనే పరినిబ్బాయిస్సతీ’’తి పుచ్ఛతి. అథస్స భగవా కులేసు సంసగ్గాభావం దీపేన్తో హోన్తి హేతే సారిపుత్తాతిఆదిమాహ. ఇమస్మిం కిర ఠానే థేరస్స కులేసు అసంసట్ఠభావో పాకటో అహోసి. సేసం సబ్బత్థ ఉత్తానమేవాతి.

పపఞ్చసూదనియా మజ్ఝిమనికాయట్ఠకథాయ

ఛన్నోవాదసుత్తవణ్ణనా నిట్ఠితా.