౧౦. చూళపుణ్ణమసుత్తవణ్ణనా

౯౧. ఏవం మే సుతన్తి చూళపుణ్ణమసుత్తం. తత్థ తుణ్హీభూతం తుణ్హీభూతన్తి యం యం దిసం అనువిలోకేతి, తత్థ తత్థ తుణ్హీభూతమేవ. అనువిలోకేత్వాతి పఞ్చపసాదపటిమణ్డితాని అక్ఖీని ఉమ్మీలేత్వా తతో తతో విలోకేత్వా అన్తమసో హత్థకుక్కుచ్చపాదకుక్కుచ్చానమ్పి అభావం దిస్వా. అసప్పురిసోతి పాపపురిసో. నో హేతం, భన్తేతి యస్మా అన్ధో అన్ధం వియ సో తం జానితుం న సక్కోతి, తస్మా ఏవమాహంసు. ఏతేనేవ నయేన ఇతో పరేసుపి వారేసు అత్థో వేదితబ్బో. అస్సద్ధసమన్నాగతోతి పాపధమ్మసమన్నాగతో. అసప్పురిసభత్తీతి అసప్పురిససేవనో. అసప్పురిసచిన్తీతి అసప్పురిసచిన్తాయ చిన్తకో. అసప్పురిసమన్తీతి అసప్పురిసమన్తనం మన్తేతా. అసప్పురిసవాచోతి అసప్పురిసవాచం భాసితా. అసప్పురిసకమ్మన్తోతి అసప్పురిసకమ్మానం కత్తా. అసప్పురిసదిట్ఠీతి అసప్పురిసదిట్ఠియా సమన్నాగతో. అసప్పురిసదానన్తి అసప్పురిసేహి దాతబ్బం దానం. త్యాస్స మిత్తాతి తే అస్స మిత్తా. అత్తబ్యాబాధాయపి చేతేతీతి పాణం హనిస్సామి, అదిన్నం ఆదియిస్సామి, మిచ్ఛా చరిస్సామి, దస అకుసలకమ్మపథే సమాదాయ వత్తిస్సామీతి ఏవం అత్తనో దుక్ఖత్థాయ చిన్తేతి. పరబ్యాబాధాయాతి యథా అసుకో అసుకం పాణం హన్తి, అసుకస్స సన్తకం అదిన్నం ఆదియతి, దస అకుసలకమ్మపథే సమాదాయ వత్తతి, ఏవం నం ఆణాపేస్సామీతి ఏవం పరస్స దుక్ఖత్థాయ చిన్తేతి. ఉభయబ్యాబాధాయాతి అహం అసుకఞ్చ అసుకఞ్చ గహేత్వా దస అకుసలకమ్మపథే సమాదాయ వత్తిస్సామీతి ఏవం ఉభయదుక్ఖత్థాయ చిన్తేతీతి.

అత్తబ్యాబాధాయపి మన్తేతీతిఆదీసు అహం దస అకుసలకమ్మపథే సమాదాయ వత్తిస్సామీతి మన్తేన్తో అత్తబ్యాబాధాయ మన్తేతి నామ. అసుకం దస అకుసలకమ్మపథే సమాదపేస్సామీతి మన్తేన్తో పరబ్యాబాధాయ మన్తేతి నామ. అఞ్ఞేన సద్ధిం – ‘‘మయం ఉభోపి ఏకతో హుత్వా దస అకుసలకమ్మపథే సమాదాయ వత్తిస్సామా’’తి మన్తేన్తో ఉభయబ్యాబాధాయ మన్తేతి నామ.

అసక్కచ్చం దానం దేతీతి దేయ్యధమ్మమ్పి పుగ్గలమ్పి న సక్కరోతి. దేయ్యధమ్మం న సక్కరోతి నామ ఉత్తణ్డులాదిదోససమన్నాగతం ఆహారం దేతి, న పసన్నం కరోతి. పుగ్గలం న సక్కరోతి నామ నిసీదనట్ఠానం అసమ్మజ్జిత్వా యత్థ వా తత్థ వా నిసీదాపేత్వా యం వా తం వా ఆధారకం ఠపేత్వా దానం దేతి. అసహత్థాతి అత్తనో హత్థేన, న దేతి, దాసకమ్మకారాదీహి దాపేతి. అచిత్తికత్వాతి హేట్ఠా వుత్తనయేన దేయ్యధమ్మేపి పుగ్గలేపి న చిత్తీకారం కత్వా దేతి. అపవిద్ధన్తి ఛడ్డేతుకామో హుత్వా వమ్మికే ఉరగం పక్ఖిపన్తో వియ దేతి. అనాగమనదిట్ఠికోతి నో ఫలపాటికఙ్ఖీ హుత్వా దేతి.

తత్థ ఉపపజ్జతీతి న దానం దత్వా నిరయే ఉపపజ్జతి. యం పన తేన పాపలద్ధికాయ మిచ్ఛాదస్సనం గహితం, తాయ మిచ్ఛాదిట్ఠియా నిరయే ఉపపజ్జతి. సుక్కపక్ఖో వుత్తపటిపక్ఖనయేన వేదితబ్బో. దేవమహత్తతాతి ఛకామావచరదేవా. మనుస్సమహత్తతాతి తిణ్ణం కులానం సమ్పత్తి. సేసం సబ్బత్థ ఉత్తానమేవ. ఇదం పన సుత్తం సుద్ధవట్టవసేనేవ కథితన్తి.

పపఞ్చసూదనియా మజ్ఝిమనికాయట్ఠకథాయ

చూళపుణ్ణమసుత్తవణ్ణనా నిట్ఠితా.

పఠమవగ్గవణ్ణనా నిట్ఠితా.