౪. సువణ్ణవిమానవణ్ణనా

సోవణ్ణమయే పబ్బతస్మిన్తి సువణ్ణవిమానం. తస్స కా ఉప్పత్తి? భగవా అన్ధకవిన్దే విహరతి. తేన సమయేన అఞ్ఞతరో ఉపాసకో సద్ధో పసన్నో విభవసమ్పన్నో తస్స గామస్స అవిదూరే అఞ్ఞతరస్మిం ముణ్డకపబ్బతే సబ్బాకారసమ్పన్నం భగవతో వసనానుచ్ఛవికం గన్ధకుటిం కారేత్వా తత్థ భగవన్తం వసాపేన్తో సక్కచ్చం ఉపట్ఠహి, సయఞ్చ నిచ్చసీలే పతిట్ఠితో సువిసుద్ధసీలసంవరో హుత్వా కాలం కత్వా తావతింసభవనే నిబ్బత్తి. తస్స కమ్మానుభావసంసూచకం నానారతనరంసిజాలసముజ్జలం విచిత్తవేదికాపరిక్ఖిత్తం వివిధవిపులాలఙ్కారోపసోభితం సువిభత్తభిత్తిత్థమ్భసోపానం ఆరామరమణీయకం కఞ్చనపబ్బతముద్ధని విమానం ఉప్పజ్జి. తం ఆయస్మా మహామోగ్గల్లానో దేవచారికం చరన్తో దిస్వా ఇమాహి గాథాహి పటిపుచ్ఛి –

౧౧౩౪. ‘‘సోవణ్ణమయే పబ్బతస్మిం, విమానం సబ్బతోపభం;

హేమజాలపటిచ్ఛన్నం, కిఙ్కిణిజాలకప్పితం.

౧౧౩౫. ‘‘అట్ఠంసా సుకతా థమ్భా, సబ్బే వేళురియామయా;

ఏకమేకాయ అంసియా, రతనా సత్త నిమ్మితా.

౧౧౩౬. ‘‘వేళూరియసువణ్ణస్స, ఫలికా రూపియస్స చ;

మసారగల్లముత్తాహి, లోహితఙ్గమణీహి చ.

౧౧౩౭. ‘‘చిత్రా మనోరమా భూమి, న తత్థుద్ధంసతీ రజో;

గోపానసీగణా పీతా, కూటం దారేన్తి నిమ్మితా.

౧౧౩౮. ‘‘సోపానాని చ చత్తారి, నిమ్మితా చతురో దిసా;

నానారతనగబ్భేహి, ఆదిచ్చోవ విరోచతి.

౧౧౩౯. ‘‘వేదియా చతస్సో తత్థ, విభత్తా భాగసో మితా;

దద్దల్లమానా ఆభన్తి, సమన్తా చతురో దిసా.

౧౧౪౦. ‘‘తస్మిం విమానే పవరే, దేవపుత్తో మహప్పభో;

అతిరోచసి వణ్ణేన, ఉదయన్తోవ భాణుమా.

౧౧౪౧. ‘‘దానస్స తే ఇదం ఫలం, అథో సీలస్స వా పన;

అథో అఞ్జలికమ్మస్స, తం మే అక్ఖాహి పుచ్ఛితో’’తి.

సోపిస్స ఇమాహి గాథాహి బ్యాకాసి –

౧౧౪౨. ‘‘సో దేవపుత్తో అత్తమనో…పే… యస్స కమ్మస్సిదం ఫలం’’.

౧౧౪౩. ‘‘అహం అన్ధకవిన్దస్మిం, బుద్ధస్సాదిచ్చబన్ధునో;

విహారం సత్థు కారేసిం, పసన్నో సేహి పాణిభి.

౧౧౪౪. ‘‘తత్థ గన్ధఞ్చ మాలఞ్చ, పచ్చయఞ్చ విలేపనం;

విహారం సత్థు అదాసిం, విప్పసన్నేన చేతసా;

తేన మయ్హం ఇదం లద్ధం, వసం వత్తేమి నన్దనే.

౧౧౪౫. ‘‘నన్దనే చ వనే రమ్మే, నానాదిజగణాయుతే;

రమామి నచ్చగీతేహి, అచ్ఛరాహి పురక్ఖతో’’తి.

౧౧౩౪. తత్థ సబ్బతోపభన్తి సబ్బభాగేహి పభాసన్తం పభాముఞ్చనకం. కిఙ్కిణిజాలకప్పితన్తి కప్పితకిఙ్కిణికజాలం.

౧౧౩౫. సబ్బే వేళురియామయాతి సబ్బే థమ్భా వేళురియమణిమయా. తత్థ పన ఏకమేకాయ అంసియాతి అట్ఠంసేసు థమ్భేసు ఏకమేకస్మిం అంసభాగే. రతనా సత్త నిమ్మితాతి సత్తరతనకమ్మనిమ్మితా, ఏకేకో అంసో సత్తరతనమయోతి అత్థో.

౧౧౩౬. ‘‘వేళూరియసువణ్ణస్సా’’తిఆదినా నానారతనాని దస్సేతి. తత్థ వేళూరియసువణ్ణస్సాతి వేళురియేన చ సువణ్ణేన చ నిమ్మితా, చిత్రాతి వా యోజనా. కరణత్థే హి ఇదం సామివచనం. ఫలికా రూపియస్స చాతి ఏత్థాపి ఏసేవ నయో. మసారగల్లముత్తాహీతి కబరమణీహి. లోహితఙ్గమణీహి చాతి రత్తమణీహి.

౧౧౩౭. న తత్థుద్ధంసతీ రజోతి మణిమయభూమికత్తా న తస్మిం విమానే రజో ఉగ్గచ్ఛతి. గోపానసీగణాతి గోపానసీసమూహా. పీతాతి పీతవణ్ణా, సువణ్ణమయా చేవ ఫుస్సరాగాదిమణిమయా చాతి అత్థో. కూటం ధారేన్తీతి సత్తరతనమయం కణ్ణికం ధారేన్తి.

౧౧౩౮-౯. నానారతనగబ్భేహీతి నానారతనమయేహి ఓవరకేహి. వేదియాతి వేదికా. చతస్సోతి చతూసు దిసాసు చతస్సో. తేనాహ ‘‘సమన్తా చతురో దిసా’’తి.

౧౧౪౦. మహప్పభోతి మహాజుతికో. ఉదయన్తోతి ఉగ్గచ్ఛన్తో. భాణుమాతి ఆదిచ్చో.

౧౧౪౩. సేహి పాణిభీతి కాయసారం పుఞ్ఞం పసవన్తో అత్తనో పాణీహి తం తం కిచ్చం కరోన్తో విహారం సత్థు కారేసిన్తి యోజనా. అథ వా సేహి పాణిభీతి తత్థ అన్ధకవిన్దస్మిం గన్ధఞ్చ మాలఞ్చ పచ్చయఞ్చ విలేపనఞ్చ పూజావసేన. యథా కథం? విహారఞ్చ విప్పసన్నేన చేతసా సత్థునో అదాసిం పూజేసిం నియ్యాదేసిం చాతి ఏవమేత్థ యోజనా వేదితబ్బా.

౧౧౪౪. తేనాతి తేన యథావుత్తేన పుఞ్ఞకమ్మేన కారణభూతేన. మయ్హన్తి మయా. ఇదన్తి ఇదం పుఞ్ఞఫలం, ఇదం వా దిబ్బం ఆధిపతేయ్యం. తేనాహ ‘‘వసం వత్తేమీ’’తి.

౧౧౪౫. నన్దనేతి నన్దియా దిబ్బసమిద్ధియా ఉప్పజ్జనట్ఠానే ఇమస్మిం దేవలోకే, తత్థాపి విసేసతో నన్దనే వనే రమ్మే, ఏవం రమణీయే ఇమస్మిం నన్దనే వనే రమామీతి యోజనా. సేసం వుత్తనయమేవ.

ఏవం దేవతాయ అత్తనో పుఞ్ఞకమ్మే ఆవికతే థేరో సపరివారస్స తస్స దేవపుత్తస్స ధమ్మం దేసేత్వా భగవతో తమత్థం నివేదేసి. భగవా తం అట్ఠుప్పత్తిం కత్వా సమ్పత్తపరిసాయ ధమ్మం దేసేసి. సా దేసనా మహాజనస్స సాత్థికా అహోసీతి.

సువణ్ణవిమానవణ్ణనా నిట్ఠితా.