౧౦. గణపేతవత్థువణ్ణనా

నగ్గా దుబ్బణ్ణరూపాత్థాతి ఇదం సత్థరి జేతవనే విహరన్తే సమ్బహులే పేతే ఆరబ్భ వుత్తం. సావత్థియం కిర సమ్బహులా మనుస్సా గణభూతా అస్సద్ధా అప్పసన్నా మచ్ఛేరమలపరియుట్ఠితచిత్తా దానాదిసుచరితవిముఖా హుత్వా చిరం జీవిత్వా కాయస్స భేదా నగరస్స సమీపే పేతయోనియం నిబ్బత్తింసు. అథేకదివసం ఆయస్మా మహామోగ్గల్లానో సావత్థియం పిణ్డాయ గచ్ఛన్తో అన్తరామగ్గే పేతే దిస్వా –

౭౮౨. ‘‘నగ్గా దుబ్బణరూపాత్థ, కిసా ధమనిసన్థతా;

ఉప్ఫాసులికా కిసికా, కే ను తుమ్హేత్థ మారిసా’’తి. –

గాథాయ పుచ్ఛి. తత్థ దుబ్బణ్ణరూపాత్థాతి దుబ్బణ్ణసరీరా హోథ. కే ను తుమ్హేత్థాతి తుమ్హే కే ను నామ భవథ. మారిసాతి తే అత్తనో సారుప్పవసేన ఆలపతి.

తం సుత్వా పేతా –

౭౮౩. ‘‘మయం భదన్తే పేతమ్హా, దుగ్గతా యమలోకికా;

పాపకమ్మం కరిత్వాన, పేతలోకం ఇతో గతా’’తి. –

గాథాయ అత్తనో పేతభావం పకాసేత్వా పున థేరేన –

౭౮౪. ‘‘కిం ను కాయేన వాచాయ, మనసా దుక్కటం కతం;

కిస్సకమ్మవిపాకేన, పేతలోకం ఇతో గతా’’తి. –

గాథాయ కతకమ్మం పుచ్ఛితా –

౭౮౫. ‘‘అనావటేసు తిత్థేసు, విచినిమ్హద్ధమాసకం;

సన్తేసు దేయ్యధమ్మేసు, దీపం నాకమ్హ అత్తనో.

౭౮౬. ‘‘నదిం ఉపేమ తసితా, రిత్తకా పరివత్తతి;

ఛాయం ఉపేమ ఉణ్హేసు, ఆతపో పరివత్తతి.

౭౮౭. ‘‘అగ్గివణ్ణో చ నో వాతో, డహన్తో ఉపవాయతి;

ఏతఞ్చ భన్తే అరహామ, అఞ్ఞఞ్చ పాపకం తతో.

౭౮౮. ‘‘అపి యోజనాని గచ్ఛామ, ఛాతా ఆహారగేధినో;

అలద్ధావ నివత్తామ, అహో నో అప్పపుఞ్ఞతా.

౭౮౯. ‘‘ఛాతా పముచ్ఛితా భన్తా, భూమియం పటిసుమ్భితా;

ఉత్తానా పటికిరామ, అవకుజ్జా పతామసే.

౭౯౦. ‘‘తే చ తత్థేవ పతితా, భూమియం పటిసుమ్భితా;

ఉరం సీసఞ్చ ఘట్టేమ, అహో నో అప్పపుఞ్ఞతా.

౭౯౧. ‘‘ఏతఞ్చ భన్తే అరహామ, అఞ్ఞఞ్చ పాపకం తతో;

సన్తేసు దేయ్యధమ్మేసు, దీపం నాకమ్హ అత్తనో.

౭౯౨. ‘‘తే హి నూన ఇతో గన్త్వా, యోనిం లద్ధాన మానుసిం;

వదఞ్ఞూ సీలసమ్పన్నా, కాహామ కుసలం బహు’’న్తి. –

అత్తనా కతకమ్మం కథేసుం.

౭౮౮. తత్థ అపి యోజనాని గచ్ఛామాతి అనేకానిపి యోజనాని గచ్ఛామ. కథం? ఛాతా ఆహారగేధినోతి, చిరకాలం జిఘచ్ఛాయ జిఘచ్ఛితా ఆహారే గిద్ధా అభిగిజ్ఝన్తా హుత్వా, ఏవం గన్త్వాపి కిఞ్చి ఆహారం అలద్ధాయేవ నివత్తామ. అప్పపుఞ్ఞతాతి అపుఞ్ఞతా అకతకల్యాణతా.

౭౮౯. ఉత్తానా పటికిరామాతి కదాచి ఉత్తానా హుత్వా వికిరియమానఙ్గపచ్చఙ్గా వియ వత్తామ. అవకుజ్జా పతామసేతి కదాచి అవకుజ్జా హుత్వా పతామ.

౭౯౦. తే చాతి తే మయం. ఉరం సీసఞ్చ ఘట్టేమాతి అవకుజ్జా హుత్వా పతితా ఉట్ఠాతుం అసక్కోన్తా వేధన్తా వేదనాప్పత్తా అత్తనో అత్తనో ఉరం సీసఞ్చ పటిఘంసామ. సేసం హేట్ఠా వుత్తనయమేవ.

థేరో తం పవత్తిం భగవతో ఆరోచేసి. భగవా తమత్థం అట్ఠుప్పత్తిం కత్వా సమ్పత్తపరిసాయ ధమ్మం దేసేసి. తం సుత్వా మహాజనో మచ్ఛేరమలం పహాయ దానాదిసుచరితనిరతో అహోసీతి.

గణపేతవత్థువణ్ణనా నిట్ఠితా.