౫. సమ్మసనఞాణనిద్దేసవణ్ణనా

౪౮. సమ్మసనఞాణనిద్దేసే యం కిఞ్చీతి అనవసేసపరియాదానం. రూపన్తి అతిప్పసఙ్గనియమనం. ఏవం పదద్వయేనాపి రూపస్స అసేసపరిగ్గహో కతో హోతి. అథస్స అతీతాదినా విభాగం ఆరభతి. తఞ్హి కిఞ్చి అతీతం కిఞ్చి అనాగతాదిభేదన్తి. ఏస నయో వేదనాదీసుపి. తత్థ రూపం తావ అద్ధాసన్తతిసమయఖణవసేన చతుధా అతీతం నామ హోతి, తథా అనాగతపచ్చుప్పన్నం. తత్థ అద్ధావసేన తావ ఏకస్స ఏకస్మిం భవే పటిసన్ధితో పుబ్బే అతీతం, చుతితో ఉద్ధం అనాగతం, ఉభిన్నమన్తరే పచ్చుప్పన్నం. సన్తతివసేన సభాగఏకఉతుసముట్ఠానం ఏకాహారసముట్ఠానఞ్చ పుబ్బాపరియభావేన వత్తమానమ్పి పచ్చుప్పన్నం, తతో పుబ్బే విసభాగఉతుఆహారసముట్ఠానం అతీతం, పచ్ఛా అనాగతం. చిత్తజం ఏకవీథిఏకజవనఏకసమాపత్తిసముట్ఠానం పచ్చుప్పన్నం, తతో పుబ్బే అతీతం, పచ్ఛా అనాగతం, కమ్మసముట్ఠానస్స పాటియేక్కం సన్తతివసేన అతీతాదిభేదో నత్థి, తేసఞ్ఞేవ పన ఉతుఆహారచిత్తసముట్ఠానానం ఉపత్థమ్భనవసేన తస్స అతీతాదిభావో వేదితబ్బో. సమయవసేన ఏకముహుత్తపుబ్బణ్హసాయన్హరత్తిన్దివాదీసు సమయేసు సన్తానవసేన పవత్తమానం తం తం సమయం పచ్చుప్పన్నం నామ, తతో పుబ్బే అతీతం, పచ్ఛా అనాగతం. ఖణవసేన ఉప్పాదాదిఖణత్తయపరియాపన్నం పచ్చుప్పన్నం, తతో పుబ్బే అనాగతం, పచ్ఛా అతీతం. అపిచ అతిక్కన్తహేతుపచ్చయకిచ్చం అతీతం, నిట్ఠితహేతుకిచ్చమనిట్ఠితపచ్చయకిచ్చం పచ్చుప్పన్నం, ఉభయకిచ్చమసమ్పత్తం అనాగతం. సకిచ్చక్ఖణే వా పచ్చుప్పన్నం, తతో పుబ్బే అనాగతం, పచ్ఛా అతీతం. ఏత్థ చ ఖణాదికథావ నిప్పరియాయా సేసా సపరియాయా.

అజ్ఝత్తన్తి పఞ్చసుపి ఖన్ధేసు ఇధ నియకజ్ఝత్తం అధిప్పేతం, తస్మా అత్తనో సన్తానే పవత్తం పాటిపుగ్గలికం రూపం అజ్ఝత్తన్తి వేదితబ్బం. తతో బహిభూతం పన ఇన్ద్రియబద్ధం వా అనిన్ద్రియబద్ధం వా రూపం బహిద్ధా నామ. ఓళారికన్తి చక్ఖుసోతఘానజివ్హాకాయరూపసద్దగన్ధరసఫోట్ఠబ్బసఙ్ఖాతా పథవీతేజోవాయో చాతి ద్వాదసవిధం రూపం ఘట్టనవసేన గహేతబ్బతో ఓళారికం. సేసం పన ఆపోధాతు ఇత్థిన్ద్రియం పురిసిన్ద్రియం జీవితిన్ద్రియం హదయవత్థు ఓజా ఆకాసధాతు కాయవిఞ్ఞత్తి వచీవిఞ్ఞత్తి రూపస్స లహుతా ముదుతా కమ్మఞ్ఞతా ఉపచయో సన్తతి జరతా అనిచ్చతాతి సోళసవిధం రూపం ఘట్టనవసేన అగహేతబ్బతో సుఖుమం. హీనం వా పణీతం వాతి ఏత్థ హీనపణీతభావో పరియాయతో నిప్పరియాయతో చ. తత్థ అకనిట్ఠానం రూపతో సుదస్సీనం రూపం హీనం, తదేవ సుదస్సానం రూపతో పణీతం. ఏవం యావ నరకసత్తానం రూపం, తావ పరియాయతో హీనపణీతతా వేదితబ్బా. నిప్పరియాయతో పన యత్థ అకుసలవిపాకం ఉప్పజ్జతి, తం హీనం. యత్థ కుసలవిపాకం, తం పణీతం. యం దూరే సన్తికే వాతి ఏత్థ యం సుఖుమం, తదేవ దుప్పటివిజ్ఝసభావత్తా దూరే. యం ఓళారికం, తదేవ సుప్పటివిజ్ఝసభావత్తా సన్తికే.

సబ్బం రూపం అనిచ్చతో వవత్థేతి ఏకం సమ్మసనం, దుక్ఖతో వవత్థేతి ఏకం సమ్మసనం, అనత్తతో వవత్థేతి ఏకం సమ్మసనన్తి ఏత్థ అయం భిక్ఖు ‘‘యం కిఞ్చి రూప’’న్తి ఏవం అనియమనిద్దిట్ఠం సబ్బమ్పి రూపం అతీతత్తికేన చేవ చతూహి అజ్ఝత్తాదిదుకేహి చాతి ఏకాదసహి ఓకాసేహి పరిచ్ఛిన్దిత్వా సబ్బం రూపం అనిచ్చతో వవత్థేతి అనిచ్చన్తి సమ్మసతి. కథం? పరతో వుత్తనయేన. వుత్తఞ్హేతం – ‘‘రూపం అతీతానాగతపచ్చుప్పన్నం అనిచ్చం ఖయట్ఠేనా’’తి (పటి. మ. ౧.౪౮). తస్మా ఏస యం అతీతం రూపం, తం యస్మా అతీతేయేవ ఖీణం, నయిమం భవం సమ్పత్తన్తి అనిచ్చం ఖయట్ఠేన, యం అనాగతం రూపం అనన్తరభవే నిబ్బత్తిస్సతి, తమ్పి తత్థేవ ఖీయిస్సతి, న తతో పరం భవం గమిస్సతీతి అనిచ్చం ఖయట్ఠేన, యం పచ్చుప్పన్నం రూపం, తం ఇధేవ ఖీయతి, న ఇతో గచ్ఛతీతి అనిచ్చం ఖయట్ఠేన, యం అజ్ఝత్తం రూపం, తమ్పి అజ్ఝత్తమేవ ఖీయతి, న బహిద్ధాభావం గచ్ఛతీతి అనిచ్చం ఖయట్ఠేన, యం బహిద్ధా ఓళారికం సుఖుమం హీనం పణీతం దూరే సన్తికే, తమ్పి ఏత్థేవ ఖీయతి, న దూరభావం గచ్ఛతీతి అనిచ్చం ఖయట్ఠేనాతి సమ్మసతి. ఇదం సబ్బమ్పి ‘‘అనిచ్చం ఖయట్ఠేనా’’తి ఏతస్స వసేన ఏకం సమ్మసనం, పభేదతో పన ఏకాదసవిధం హోతి.

సబ్బమేవ చేతం దుక్ఖం భయట్ఠేనాతి సమ్మసతి. భయట్ఠేనాతి సప్పటిభయతాయ. యఞ్హి అనిచ్చం, తం భయావహం హోతి సీహోపమసుత్తే (అ. ని. ౪.౩౩; సం. ని. ౩.౭౮) దేవానం వియ. ఇతి ఇదమ్పి ‘‘దుక్ఖం భయట్ఠేనా’’తి ఏతస్స వసేన ఏకం సమ్మసనం, పభేదతో పన ఏకాదసవిధం హోతి.

యథా చ దుక్ఖం, ఏవం సబ్బమ్పి తం అనత్తా అసారకట్ఠేనాతి సమ్మసతి. అసారకట్ఠేనాతి ‘‘అత్తా నివాసీ కారకో వేదకో సయంవసీ’’తి ఏవం పరికప్పితస్స అత్తసారస్స అభావేన. యఞ్హి అనిచ్చం దుక్ఖం, అత్తనోపి అనిచ్చతం వా ఉదయబ్బయపీళనం వా వారేతుం న సక్కోతి, కుతో తస్స కారకాదిభావో. తేనాహ – ‘‘రూపఞ్చ హిదం, భిక్ఖవే, అత్తా అభవిస్స, నయిదం రూపం ఆబాధాయ సంవత్తేయ్యా’’తిఆది (సం. ని. ౩.౫౯). ఇతి ఇదం ‘‘అనత్తా అసారకట్ఠేనా’’తి ఏతస్స వసేన ఏకం సమ్మసనం, పభేదతో పన ఏకాదసవిధం హోతి. ఏసేవ నయో వేదనాదీసు. ఇతి ఏకేకస్మిం ఖన్ధే ఏకాదస ఏకాదస కత్వా పఞ్చసు ఖన్ధేసు పఞ్చపఞ్ఞాస సమ్మసనాని హోన్తి, అనిచ్చతో పఞ్చపఞ్ఞాస, దుక్ఖతో పఞ్చపఞ్ఞాస, అనత్తతో పఞ్చపఞ్ఞాసాతి తివిధానుపస్సనావసేన సబ్బాని పఞ్చసట్ఠిసతసమ్మసనాని హోన్తి.

కేచి పన ‘‘సబ్బం రూపం, సబ్బం వేదనం, సబ్బం సఞ్ఞం, సబ్బే సఙ్ఖారే, సబ్బం విఞ్ఞాణన్తి పదమ్పి పక్ఖిపిత్వా ఏకేకస్మిం ఖన్ధే ద్వాదస ద్వాదస కత్వా పఞ్చసు సట్ఠి, అనుపస్సనాతో అసీతిసతసమ్మసనానీ’’తి వదన్తి.

అతీతాదివిభాగే పనేత్థ సన్తతివసేన ఖణాదివసేన చ వేదనాయ అతీతానాగతపచ్చుప్పన్నభావో వేదితబ్బో. తత్థ సన్తతివసేన ఏకవీథిఏకజవనఏకసమాపత్తిపరియాపన్నా ఏకవిధవిసయసమాయోగప్పవత్తా చ పచ్చుప్పన్నా, తతో పుబ్బే అతీతా, పచ్ఛా అనాగతా. ఖణాదివసేన ఖణత్తయపరియాపన్నా పుబ్బన్తాపరన్తమజ్ఝగతా సకిచ్చఞ్చ కురుమానా వేదనా పచ్చుప్పన్నా, తతో పుబ్బే అతీతా, పచ్ఛా అనాగతా. అజ్ఝత్తబహిద్ధాభేదో నియకజ్ఝత్తవసేనేవ వేదితబ్బో.

ఓళారికసుఖుమభావో ‘‘అకుసలా వేదనా ఓళారికా, కుసలాబ్యాకతా వేదనా సుఖుమా’’తిఆదినా (విభ. ౪) నయేన విభఙ్గే వుత్తేన జాతిసభావపుగ్గలలోకియలోకుత్తరవసేన వేదితబ్బో. జాతివసేన తావ అకుసలా వేదనా సావజ్జకిరియహేతుతో, కిలేససన్తాపభావతో చ అవూపసన్తవుత్తీతి కుసలవేదనాయ ఓళారికా, సబ్యాపారతో సఉస్సాహతో సవిపాకతో కిలేససన్తాపభావతో సావజ్జతో చ విపాకాబ్యాకతాయ ఓళారికా, సవిపాకతో కిలేససన్తాపభావతో సబ్యాబజ్ఝతో సావజ్జతో చ కిరియాబ్యాకతాయ ఓళారికా. కుసలాబ్యాకతా పన వుత్తవిపరియాయతో అకుసలాయ వేదనాయ సుఖుమా. ద్వేపి కుసలాకుసలా వేదనా సబ్యాపారతో సఉస్సాహతో సవిపాకతో చ యథాయోగం దువిధాయపి అబ్యాకతాయ ఓళారికా, వుత్తవిపరియాయేన దువిధాపి అబ్యాకతా తాహి సుఖుమా. ఏవం తావ జాతివసేన ఓళారికసుఖుమతా వేదితబ్బా.

సభావవసేన పన దుక్ఖా వేదనా నిరస్సాదతో సవిప్ఫారతో ఖోభకరణతో ఉబ్బేజనీయతో అభిభవనతో చ ఇతరాహి ద్వీహి ఓళారికా, ఇతరా పన ద్వే సాతతో సన్తతో పణీతతో మనాపతో మజ్ఝత్తతో చ యథాయోగం దుక్ఖాయ సుఖుమా. ఉభో పన సుఖదుక్ఖా సవిప్ఫారతో ఉబ్బేజనీయతో ఖోభకరణతో పాకటతో చ అదుక్ఖమసుఖాయ ఓళారికా, సా వుత్తవిపరియాయేన తదుభయతో సుఖుమా. ఏవం సభావవసేన ఓళారికసుఖుమతా వేదితబ్బా.

పుగ్గలవసేన పన అసమాపన్నస్స వేదనా నానారమ్మణే విక్ఖిత్తభావతో సమాపన్నస్స వేదనాయ ఓళారికా, విపరియాయేన ఇతరా సుఖుమా. ఏవం పుగ్గలవసేన ఓళారికసుఖుమతా వేదితబ్బా.

లోకియలోకుత్తరవసేన పన సాసవా వేదనా లోకియా, సా ఆసవుప్పత్తిహేతుతో ఓఘనియతో యోగనియతో గన్థనియతో నీవరణియతో ఉపాదానియతో సంకిలేసికతో పుథుజ్జనసాధారణతో చ అనాసవాయ ఓళారికా, అనాసవా చ విపరియాయేన సాసవాయ సుఖుమా. ఏవం లోకియలోకుత్తరవసేన ఓళారికసుఖుమతా వేదితబ్బా.

తత్థ జాతిఆదివసేన సమ్భేదో పరిహరితబ్బో. అకుసలవిపాకకాయవిఞ్ఞాణసమ్పయుత్తా హి వేదనా జాతివసేన అబ్యాకతత్తా సుఖుమాపి సమానా సభావాదివసేన ఓళారికా హోతి. వుత్తఞ్హేతం –

‘‘అబ్యాకతా వేదనా సుఖుమా, దుక్ఖా వేదనా ఓళారికా. సమాపన్నస్స వేదనా సుఖుమా, అసమాపన్నస్స వేదనా ఓళారికా. అనాసవా వేదనా సుఖుమా, సాసవా వేదనా ఓళారికా’’తి (విభ. ౧౧).

యథా చ దుక్ఖా వేదనా, ఏవం సుఖాదయోపి. తాపి హి జాతివసేన ఓళారికా, సభావాదివసేన సుఖుమా హోన్తి. తస్మా యథా జాతిఆదివసేన సమ్భేదో న హోతి, తథా వేదనానం ఓళారికసుఖుమతా వేదితబ్బా. సేయ్యథిదం, అబ్యాకతా జాతివసేన కుసలాకుసలాహి సుఖుమా. తత్థ కతమా అబ్యాకతా? కిం దుక్ఖా? కిం సుఖా? కిం సమాపన్నస్స? కిం అసమాపన్నస్స? కిం సాసవా? కిం అనాసవాతి? ఏవం సభావాదిభేదో న పరామసితబ్బో. ఏస నయో సబ్బత్థ.

అపిచ ‘‘తం తం వా పన వేదనం ఉపాదాయుపాదాయ వేదనా ఓళారికా సుఖుమా దట్ఠబ్బా’’తి వచనతో అకుసలాదీసుపి లోభసహగతాయ దోససహగతా వేదనా అగ్గి వియ నిస్సయదహనతో ఓళారికా, లోభసహగతా సుఖుమా. దోససహగతాపి నియతా ఓళారికా, అనియతా సుఖుమా. నియతాపి కప్పట్ఠితికా ఓళారికా, ఇతరా సుఖుమా. కప్పట్ఠితికాసుపి అసఙ్ఖారికా ఓళారికా, ఇతరా సుఖుమా. లోభసహగతా పన దిట్ఠిసమ్పయుత్తా ఓళారికా, ఇతరా సుఖుమా. సాపి నియతా కప్పట్ఠితికా అసఙ్ఖారికా ఓళారికా, ఇతరా సుఖుమా. అవిసేసేన చ అకుసలా బహువిపాకా ఓళారికా, అప్పవిపాకా సుఖుమా. కుసలా పన అప్పవిపాకా ఓళారికా, బహువిపాకా సుఖుమా.

అపిచ కామావచరకుసలా ఓళారికా, రూపావచరా సుఖుమా, తతో అరూపావచరా, తతో లోకుత్తరా. కామావచరా చ దానమయా ఓళారికా, సీలమయా సుఖుమా. సీలమయాపి ఓళారికా, తతో భావనామయా సుఖుమా. భావనామయాపి దుహేతుకా ఓళారికా, తిహేతుకా సుఖుమా. తిహేతుకాపి ససఙ్ఖారికా ఓళారికా, అసఙ్ఖారికా సుఖుమా. రూపావచరా చ పఠమజ్ఝానికా ఓళారికా…పే… పఞ్చమజ్ఝానికా సుఖుమావ. అరూపావచరా చ ఆకాసానఞ్చాయతనసమ్పయుత్తా ఓళారికా…పే… నేవసఞ్ఞానాసఞ్ఞాయతనసమ్పయుత్తా సుఖుమావ. లోకుత్తరా చ సోతాపత్తిమగ్గసమ్పయుత్తా ఓళారికా…పే… అరహత్తమగ్గసమ్పయుత్తా సుఖుమావ. ఏస నయో తంతంభూమివిపాకకిరియావేదనాసు దుక్ఖాదిఅసమాపన్నాదిసాసవాదివసేన వుత్తవేదనాసు చ. ఓకాసవసేన వాపి నిరయే దుక్ఖా ఓళారికా, తిరచ్ఛానయోనియం సుఖుమా…పే… పరనిమ్మితవసవత్తీసు సుఖుమావ. యథా చ దుక్ఖా, ఏవం సుఖాపి సబ్బత్థ యథానురూపం యోజేతబ్బా. వత్థువసేన చాపి హీనవత్థుకా యా కాచి వేదనా ఓళారికా, పణీతవత్థుకా సుఖుమా. హీనపణీతభేదే యా ఓళారికా, సా హీనా. యా చ సుఖుమా, సా పణీతాతి దట్ఠబ్బా.

దూరసన్తికపదే పన ‘‘అకుసలా వేదనా కుసలాబ్యాకతాహి వేదనాహి దూరే, అకుసలా వేదనా అకుసలాయ వేదనాయ సన్తికే’’తిఆదినా (విభ. ౧౩) నయేన విభఙ్గే విభత్తా. తస్మా అకుసలా వేదనా విసభాగతో అసంసట్ఠతో అసరిక్ఖతో చ కుసలాబ్యాకతాహి దూరే, తథా కుసలాబ్యాకతా అకుసలాయ. ఏస నయో సబ్బవారేసు. అకుసలా పన వేదనా సభాగతో సంసట్ఠతో సరిక్ఖతో చ అకుసలాయ సన్తికేతి ఇదం వేదనాయ అతీతాదివిభాగే విత్థారకథాముఖం. తంతంవేదనాసమ్పయుత్తానం పన సఞ్ఞాదీనమ్పి ఏతం ఏవమేవ వేదితబ్బం.

యే పనేత్థ వేదనాదీసు చక్ఖు…పే… జరామరణన్తి పేయ్యాలేన సంఖిత్తేసు చ ధమ్మేసు లోకుత్తరధమ్మా ఆగతా, తే అసమ్మసనూపగత్తా ఇమస్మిం అధికారే న గహేతబ్బా. తే పన కేవలం తేన తేన పదేన సఙ్గహితధమ్మదస్సనవసేన చ అభిఞ్ఞేయ్యనిద్దేసే ఆగతనయేన చ వుత్తా. యేపి చ సమ్మసనూపగా, తేసు యే యస్స పాకటా హోన్తి, సుఖేన పరిగ్గహం గచ్ఛన్తి, తేసు తేన సమ్మసనం ఆరభితబ్బం. జాతిజరామరణవసేన విసుం సమ్మసనాభావేపి జాతిజరామరణవన్తేసుయేవ పన సమ్మసితేసు తానిపి సమ్మసితాని హోన్తీతి పరియాయేన తేసమ్పి వసేన సమ్మసనం వుత్తన్తి వేదితబ్బం. అతీతానాగతపచ్చుప్పన్నం అనిచ్చతో వవత్థేతీతిఆదినా నయేన అతీతత్తికస్సేవ చ వసేన సమ్మసనస్స వుత్తత్తా అజ్ఝత్తాదిభేదం అనామసిత్వాపి అతీతత్తికస్సేవ వసేన పరిచ్ఛిన్దిత్వాపి అనిచ్చాదితో సమ్మసనం కాతబ్బమేవ.

యం పన అనిచ్చం, తం యస్మా నియమతో సఙ్ఖతాదిభేదం హోతి, తేనస్స పరియాయదస్సనత్థం, నానాకారేహి వా మనసికారప్పవత్తిదస్సనత్థం రూపం అతీతానాగతపచ్చుప్పన్నం అనిచ్చం సఙ్ఖతన్తిఆదిమాహ. తఞ్హి హుత్వా అభావట్ఠేన అనిచ్చం, అనిచ్చన్తికతాయ ఆదిఅన్తవన్తతాయ వా అనిచ్చం. పచ్చయేహి సమాగన్త్వా కతత్తా సఙ్ఖతం. పచ్చయే పటిచ్చ నిస్సాయ సమం, సహ వా ఉప్పన్నత్తా పటిచ్చసముప్పన్నం. ఏతేన పచ్చయేహి కతేపి పచ్చయానం అబ్యాపారతం దస్సేతి. ఖయధమ్మన్తి ఖీయనధమ్మం ఖీయనపకతికం. వయధమ్మన్తి నస్సనధమ్మం. నయిదం మన్దీభావక్ఖయవసేన ఖయధమ్మం, కేవలం విగమనపకతికం. పహూతస్స మన్దీభావోపి హి లోకే ఖయోతి వుచ్చతి. విరాగధమ్మన్తి నయిదం కుహిఞ్చి గమనవసేన వయధమ్మం, కేవలం సభావాతిక్కమనపకతికం. ‘‘విరాగో నామ జిగుచ్ఛనం వా సమతిక్కమో వా’’తి హి వుత్తం. నిరోధధమ్మన్తి నయిదం సభావాతిక్కమేన పునరావత్తిధమ్మం, కేవలం అపునరావత్తినిరోధేన నిరుజ్ఝనపకతికన్తి పురిమపురిమపదస్స అత్థవివరణవసేన పచ్ఛిమపచ్ఛిమపదం వుత్తన్తి వేదితబ్బం.

అథ వా ఏకభవపరియాపన్నరూపభఙ్గవసేన ఖయధమ్మం, ఏకసన్తతిపరియాపన్నరూపక్ఖయవసేన వయధమ్మం, రూపస్స ఖణభఙ్గవసేన విరాగధమ్మం, తిణ్ణమ్పి అపునప్పవత్తివసేన నిరోధధమ్మన్తిపి యోజేతబ్బం.

జరామరణం అనిచ్చన్తిఆదీసు జరామరణం న అనిచ్చం, అనిచ్చసభావానం పన ఖన్ధానం జరామరణత్తా అనిచ్చం నామ జాతం. సఙ్ఖతాదీసుపి ఏసేవ నయో. అన్తరపేయ్యాలే జాతియాపి అనిచ్చాదితాయ ఏసేవ నయో.

జాతిపచ్చయా జరామరణన్తిఆది న విపస్సనావసేన వుత్తం, కేవలం పటిచ్చసముప్పాదస్స ఏకేకఅఙ్గవసేన సఙ్ఖిపిత్వా వవత్థానతో సమ్మసనఞాణం నామ హోతీతి పరియాయేన వుత్తం. న పనేతం కలాపసమ్మసనఞాణం ధమ్మట్ఠితిఞాణమేవ తం హోతీతి. అసతి జాతియాతి లిఙ్గవిపల్లాసో కతో, అసతియా జాతియాతి వుత్తం హోతి. అసతి సఙ్ఖారేసూతి వచనవిపల్లాసో కతో, అసన్తేసు సఙ్ఖారేసూతి వుత్తం హోతి. భవపచ్చయా జాతి, అసతీతిఆది ‘‘భవపచ్చయా జాతి, అసతి భవే నత్థి జాతీ’’తిఆదినా నయేన యోజేతబ్బం.

సమ్మసనఞాణనిద్దేసవణ్ణనా నిట్ఠితా.