౮. విభత్తిహారసమ్పాతవణ్ణనా

౭౦. కుసలపక్ఖో కుసలపక్ఖేన నిద్దిసితబ్బోతి రక్ఖితచిత్తస్సాతి సతిసంవరో, సో ఛబ్బిధో ద్వారవసేన చక్ఖుద్వారసంవరో యావ మనోద్వారసంవరోతి. సమ్మాసఙ్కప్పో తివిధో – నేక్ఖమ్మసఙ్కప్పో, అబ్యాపాదసఙ్కప్పో, అవిహింసాసఙ్కప్పోతి. సమ్మాదిట్ఠి అట్ఠవిధా దుక్ఖే ఞాణం…పే… ఇదప్పచ్చయతాపటిచ్చసముప్పన్నేసు ధమ్మేసు ఞాణన్తి. ఉదయబ్బయఞాణం పఞ్ఞాసవిధం అవిజ్జాసముదయా రూపసముదయో…పే… విపరిణామలక్ఖణం పస్సన్తోపి విఞ్ఞాణక్ఖన్ధస్స వయం పస్సతి. థినమిద్ధాభిభవనం చతుబ్బిధం చతుమగ్గవసేన. తత్థ సతిసంవరో లోకియలోకుత్తరవసేన దువిధో. తేసు లోకియో కామావచరోవ, లోకుత్తరో దస్సనభావనాభేదతో దువిధో. ఏకమేకో చేత్థ చతుసతిపట్ఠానభేదతో చతుబ్బిధో. ఏస నయో సమ్మాసఙ్కప్పాదీసుపి.

అయం పన విసేసో – సమ్మాసఙ్కప్పో పఠమజ్ఝానవసేన రూపావచరోతిపి నీహరితబ్బో. పదట్ఠానవిభాగో పదట్ఠానహారసమ్పాతే వుత్తనయేన వత్తబ్బో. అకుసలపక్ఖే అసంవరో చక్ఖుఅసంవరో…పే… కాయఅసంవరో, చోపనకాయఅసంవరో, వాచాఅసంవరో, మనోఅసంవరోతి అట్ఠవిధో. మిచ్ఛాసఙ్కప్పో కామవితక్కాదివసేన తివిధో. అఞ్ఞాణం ‘‘దుక్ఖే అఞ్ఞాణ’’న్తిఆదినా అట్ఠవిధా విభత్తం. సమ్మాదిట్ఠిపటిపక్ఖతో మిచ్ఛాదిట్ఠి ద్వాసట్ఠివిధేన వేదితబ్బా. థినమిద్ధం ఉప్పత్తిభూమితో పఞ్చవిధన్తి ఏవం అకుసలపక్ఖే విభత్తి వేదితబ్బా.

విభత్తిహారసమ్పాతవణ్ణనా నిట్ఠితా.