౯. తోదేయ్యమాణవసుత్తనిద్దేసవణ్ణనా

౫౭. నవమే తోదేయ్యసుత్తే – విమోక్ఖో తస్స కీదిసోతి తస్స కీదిసో విమోక్ఖో ఇచ్ఛితబ్బోతి పుచ్ఛతి.

౫౮. ఇదానిస్స అఞ్ఞవిమోక్ఖాభావం దస్సేన్తో భగవా దుతియం గాథమాహ. తత్థ విమోక్ఖో తస్స నాపరోతి తస్స అఞ్ఞో విమోక్ఖో నత్థి.

౫౯. ఏవం ‘‘తణ్హక్ఖయో ఏవ విమోక్ఖో’’తి వుత్తేపి తమత్థం అసల్లక్ఖేన్తో ‘‘నిరాససో సో ఉద ఆససానో’’తి పున పుచ్ఛతి. తత్థ ఉద పఞ్ఞకప్పీతి ఉదాహు సమాపత్తిఞాణాదినా ఞాణేన తణ్హాకప్పం వా దిట్ఠికప్పం వా కప్పయతి.

౬౦. అథస్స భగవా తం ఆచిక్ఖన్తో చతుత్థం గాథమాహ. తత్థ కామభవేతి కామే చ భవే చ.

రూపే నాసీసతీతి చతుసముట్ఠానికే రూపారమ్మణే ఛన్దరాగవసేన న పత్థేతి. సద్ధాదీసుపి ఏసేవ నయో. పలిబోధట్ఠేన రాగో ఏవ కిఞ్చనం రాగకిఞ్చనం మదనట్ఠేన వా. దోసకిఞ్చనాదీసుపి ఏసేవ నయో. సేసం సబ్బత్థ పాకటమేవ.

ఏవం భగవా ఇదమ్పి సుత్తం అరహత్తనికూటేనేవ దేసేసి, దేసనాపరియోసానే చ పుబ్బసదిసో ఏవ ధమ్మాభిసమయో అహోసీతి.

సద్ధమ్మప్పజ్జోతికాయ చూళనిద్దేస-అట్ఠకథాయ

తోదేయ్యమాణవసుత్తనిద్దేసవణ్ణనా నిట్ఠితా.