౧౦. కప్పమాణవసుత్తనిద్దేసవణ్ణనా

౬౧. దసమే కప్పసుత్తనిద్దేసే – మజ్ఝే సరస్మిన్తి పురిమపచ్ఛిమకోటిపఞ్ఞాణాభావతో మజ్ఝభూతే సంసారేతి వుత్తం హోతి. తిట్ఠతన్తి తిట్ఠమానానం. యథాయిదం నాపరం సియాతి యథా ఇదం దుక్ఖం పున న భవేయ్య.

ఆగమనన్తి పుబ్బన్తతో ఇధాగమనం. గమనన్తి ఇతో పరలోకగమనం. గమనాగమనన్తి తదుభయవసేన వుత్తం. కాలన్తి మరణకాలం. గతీతి నిబ్బత్తి. భవాభవోతి భవతో భవో. చుతి చాతి భవతో చవనఞ్చ. ఉపపత్తి చాతి చుతస్స ఉపపత్తి చ. నిబ్బత్తి చాతి పాతుభావో చ. భేదో చాతి ఖన్ధభేదో చ. జాతి చాతి జననఞ్చ. జరా చాతి హాని చ. మరణఞ్చాతి జీవితిన్ద్రియస్స చాగో చ. పురిమాపి కోటి న పఞ్ఞాయతీతి పుబ్బాపి కోటి నత్థి న సంవిజ్జతి. తథా పచ్ఛిమాపి కోటి.

ఏత్తకా జాతియోతి ఏతపరమా జాతియో. వట్టం వత్తీతి సంసారపవత్తి. తతో పరం న వత్తతీతి తతో ఉద్ధం నప్పవత్తతి. హేవం నత్థీతి ఏవం నత్థి న సంవిజ్జతి. హి-ఇతి నిపాతో. అనమతగ్గోయన్తి అయం సంసారో అవిదితగ్గో.

అవిజ్జానీవరణానన్తి అవిజ్జాయ ఆవరితానం. తణ్హాసంయోజనానన్తి కామరాగసఙ్ఖాతతణ్హాబన్ధనబద్ధానం. సన్ధావతన్తి కామధాతుయా పునప్పునం ధావన్తానం. సంసరతన్తి రూపారూపధాతుయా సంసరన్తానం. దుక్ఖం పచ్చనుభూతన్తి కాయికచేతసికదుక్ఖం అనుభూతం విన్దితం. తిబ్బన్తి బహలం. బ్యసనన్తి అవడ్ఢి వినాసో. కటసీ వడ్ఢితాతి సుసానవడ్ఢితం. అలమేవాతి యుత్తమేవ. సబ్బసఙ్ఖారేసూతి తేభూమకసఙ్ఖారేసు. నిబ్బిన్దితున్తి ఉక్కణ్ఠితుం. విరజ్జితున్తి విరాగం ఉప్పాదేతుం. విముచ్చితున్తి మోచేతుం. వట్టం వత్తిస్సతీతి సంసారపవత్తం తేభూమకవట్టం అనాగతే పవత్తిస్సతి. తతో పరం న వత్తిస్సతీతి తతో ఉద్ధం అనాగతే సంసారపవత్తం నప్పవత్తిస్సతి. జాతిభయేతి జాతిం పటిచ్చ ఉప్పజ్జనకభయే. జరాభయాదీసుపి ఏసేవ నయో.

౬౨-౩. అథస్స భగవా తమత్థం బ్యాకరోన్తో ఉపరూపరిగాథాయో అభాసి. దుతియగాథా వుత్తత్థాయేవ. తతియగాథాయ అకిఞ్చనన్తి కిఞ్చనపటిపక్ఖం. అనాదానన్తి ఆదానపటిపక్ఖం, కిఞ్చనాదానవూపసమన్తి వుత్తం హోతి. అనాపరన్తి అపరపటిభాగదీపవిరహితం, సేట్ఠన్తి వుత్తం హోతి.

౬౪. చతుత్థగాథాయ న తే మారస్స పద్ధగూతి తే మారస్స పద్ధచరా పరిచారికా సిస్సా న హోన్తి.

మహాజనం పాసే నియోజేత్వా మారేతీతి మారో. అకుసలకమ్మే నియుత్తత్తా కణ్హో. ఛసు దేవలోకేసు అధిపతిత్తా అధిపతి. అకుసలానం ధమ్మానం అన్తం గతత్తా అన్తగూ. పాపజనం న ముఞ్చతీతి నముచి. సతివిప్పవాసప్పమత్తపుగ్గలానం ఞాతకోతి పమత్తబన్ధు. సేసం సబ్బత్థ పాకటమేవ.

ఏవం భగవా ఇదమ్పి సుత్తం అరహత్తనికూటేనేవ దేసేసి, దేసనాపరియోసానే చ పుబ్బసదిసోవ ధమ్మాభిసమయో అహోసీతి.

సద్ధమ్మప్పజ్జోతికాయ చూళనిద్దేస-అట్ఠకథాయ

కప్పమాణవసుత్తనిద్దేసవణ్ణనా నిట్ఠితా.