౭. నన్దమాణవసుత్తనిద్దేసవణ్ణనా

౪౬. సత్తమే నన్దసుత్తే – పఠమగాథాయత్థో – లోకే ఖత్తియాదయోజనా ఆజీవకనిగణ్ఠాదికే సన్ధాయ ‘‘సన్తి లోకే మునయో’’తి వదన్తి. తయిదం కథంసూతి కిం ను ఖో తే సమాపత్తిఞాణాదినా ఞాణేన ఉపపన్నత్తా ఞాణూపపన్నం ముని నో వదన్తి, ఏవంవిధం ను వదన్తి, ఉదాహు వే నానప్పకారకేన లూఖజీవితసఙ్ఖాతేన జీవితేనూపపన్నన్తి.

నిద్దేసే అట్ఠసమాపత్తిఞాణేన వాతి పఠమజ్ఝానాదిఅట్ఠసమాపత్తిసమ్పయుత్తఞాణేన వా. పఞ్చాభిఞ్ఞాఞాణేన వాతి పుబ్బేనివాసాదిజాననఞాణేన వా.

౪౭. అథస్స భగవా తదుభయమ్పి పటిక్ఖిపిత్వా మునిం దస్సేన్తో ‘‘న దిట్ఠియా’’తి గాథమాహ.

౪౮. ఇదాని ‘‘దిట్ఠాదీహి సుద్ధీ’’తి వదన్తానం వాదే కఙ్ఖాపహానత్థం ‘‘యే కేచిమే’’తి పుచ్ఛతి. తత్థ అనేకరూపేనాతి కోతూహలమఙ్గలాదినాపి. తత్థ యతా చరన్తాతి తత్థ సక్కాయదిట్ఠియా గుత్తా విహరన్తా.

౪౯. అథస్స తథా సుద్ధిఅభావం దీపేన్తో భగవా చతుత్థం గాథమాహ.

౫౦. ఏవం ‘‘నాతరింసూ’’తి సుత్వా ఇదాని యో అతరి, తం సోతుకామో ‘‘యే కేచిమే’’తి పుచ్ఛతి. అథస్స భగవా ఓఘతిణ్ణముఖేన జాతిజరాతిణ్ణే దస్సేన్తో ఛట్ఠం గాథమాహ.

౫౧. తత్థ నివుతాతి ఓవుటా పరియోనద్ధా. యే సీధాతి యే సు ఇధ, ఏత్థ చ సు-ఇతి నిపాతమత్తం. తణ్హం పరిఞ్ఞాయాతి తీహి పరిఞ్ఞాహి తణ్హం పరిజానిత్వా. సేసం సబ్బత్థ పుబ్బే వుత్తనయత్తా పాకటమేవ.

౫౨. ఏవం భగవా అరహత్తనికూటేనేవ దేసనం నిట్ఠాపేసి, దేసనాపరియోసానే పన నన్దో భగవతో భాసితం అభినన్దమానో ఏతాభినన్దామీతి గాథమాహ. ఇధాపి చ పుబ్బే వుత్తసదిసో ఏవ ధమ్మాభిసమయో అహోసీతి.

సద్ధమ్మప్పజ్జోతికాయ చూళనిద్దేస-అట్ఠకథాయ

నన్దమాణవసుత్తనిద్దేసవణ్ణనా నిట్ఠితా.