౧౨. భద్రావుధమాణవసుత్తనిద్దేసవణ్ణనా

౭౦. ద్వాదసమే భద్రావుధసుత్తే – ఓకఞ్జహన్తి ఆలయం జహం. తణ్హచ్ఛిదన్తి తణ్హాకాయచ్ఛిదం. అనేజన్తి లోకధమ్మేసు నిక్కమ్పం. నన్దిఞ్జహన్తి అనాగతరూపాదిపత్థనాజహం. ఏకా ఏవ హి సా తణ్హా, థుతివసేన ఇధ నానప్పకారతో వుత్తా. కప్పఞ్జహన్తి దువిధం కప్పజహం. అభియాచేతి అతివియ యాచామి. సుత్వాన నాగస్స అపనమిస్సన్తి ఇతోతి నాగస్స తవ భగవతో వచనం సుత్వా ఇతో పాసాణకచేతియతో బహుజనా పక్కమిస్సన్తీతి అధిప్పాయో.

యే ఉపయుపాదానాతి తణ్హాదిట్ఠీహి ఉపగన్త్వా గహితా. చేతసో అధిట్ఠానాతి చిత్తే పతిట్ఠితా. అభినివేసానుసయాతి పతిట్ఠహిత్వా ఆగన్త్వా సయితా.

౭౧. జనపదేహి సఙ్గతాతి అఙ్గాదీహి జనపదేహి ఇధ సమాగతా. వియాకరోహీతి ధమ్మం దేసేహి.

సఙ్గతాతి ఏతే ఖత్తియాదయో ఏకీభూతా. సమాగతాతి వుత్తప్పకారేహి జనపదేహి ఆగతా. సమోహితాతి రాసీభూతా. సన్నిపతితాతి అధియోగా.

౭౨. అథస్స ఆసయానులోమేన ధమ్మం దేసేన్తో భగవా ఉపరూపరిగాథాయో అభాసి. తత్థ ఆదానతణ్హన్తి రూపాదీనం ఆదాయికం గహణతణ్హం, తణ్హుపాదానన్తి వుత్తం హోతి. యం యఞ్హి లోకస్మిముపాదియన్తీతి ఏతేసు ఉద్ధాదిభేదేసు యం యం గణ్హన్తి. తేనేవ మారో అన్వేతిజన్తున్తి తేనేవ ఉపాదానపచ్చయనిబ్బత్తకమ్మాభిసఙ్ఖారనిబ్బత్తవసేన పటిసన్ధిక్ఖన్ధమారో తం సత్తం అనుగచ్ఛతి.

౭౩. తస్మా పజానన్తి తస్మా ఏతమాదీనవం అనిచ్చాదివసేన వా సఙ్ఖారే పజానన్తో. ఆదానసత్తే ఇతి పేక్ఖమానో, పజం ఇమం మచ్చుధేయ్యే విసత్తన్తి ఆదాతబ్బట్ఠేన ఆదానేసు రూపాదీసు సత్తే సబ్బలోకే ఇమం పజం మచ్చుధేయ్యే లగ్గం పేక్ఖమానో, ఆదానసత్తే వా ఆదానాభినివిట్ఠే పుగ్గలే ఆదానసఙ్గహేతుఞ్చ ఇమం పజం మచ్చుధేయ్యే లగ్గం తతో వీతిక్కమితుం అసమత్థం ఇతి పేక్ఖమానో కిఞ్చనం సబ్బలోకే న ఉపాదియేథాతి. సేసం సబ్బత్థ పాకటమేవ.

ఏవం భగవా ఇదమ్పి సుత్తం అరహత్తనికూటేనేవ దేసేసి, దేసనాపరియోసానే చ పుబ్బసదిసో ఏవ ధమ్మాభిసమయో అహోసీతి.

సద్ధమ్మప్పజ్జోతికాయ చూళనిద్దేస-అట్ఠకథాయ

భద్రావుధసుత్తనిద్దేసవణ్ణనా నిట్ఠితా.