౪. అనత్థపుచ్ఛకబ్రాహ్మణవత్థు

అత్తా హవేతి ఇమం ధమ్మదేసనం సత్థా జేతవనే విహరన్తో అనత్థపుచ్ఛకం బ్రాహ్మణం ఆరబ్భ కథేసి.

సో కిర బ్రాహ్మణో ‘‘కిం ను ఖో సమ్మాసమ్బుద్ధో అత్థమేవ జానాతి, ఉదాహు అనత్థమ్పి, పుచ్ఛిస్సామి న’’న్తి సత్థారం ఉపసఙ్కమిత్వా పుచ్ఛి – ‘‘భన్తే, తుమ్హే అత్థమేవ జానాథ మఞ్ఞే, నో అనత్థ’’న్తి? ‘‘అత్థఞ్చాహం, బ్రాహ్మణ, జానామి అనత్థఞ్చా’’తి. ‘‘తేన హి మే అనత్థం కథేథా’’తి. అథస్స సత్థా ఇమం గాథమాహ –

‘‘ఉస్సూరసేయ్యం ఆలస్యం, చణ్డిక్కం దీఘసోణ్డియం;

ఏకస్సద్ధానగమనం పరదారూపసేవనం;

ఏతం బ్రాహ్మణ సేవస్సు, అనత్థం తే భవిస్సతీ’’తి.

తం సుత్వా బ్రాహ్మణో సాధుకారమదాసి ‘‘సాధు సాధు, గణాచరియ, గణజేట్ఠక, తుమ్హే అత్థఞ్చ జానాథ అనత్థఞ్చా’’తి. ‘‘ఏవం ఖో, బ్రాహ్మణ, అత్థానత్థజాననకో నామ మయా సదిసో నత్థీ’’తి. అథస్స సత్థా అజ్ఝాసయం ఉపధారేత్వా, ‘‘బ్రాహ్మణ, కేన కమ్మేన జీవసీ’’తి పుచ్ఛి. ‘‘జూతకమ్మేన, భో గోతమా’’తి. ‘‘కిం పన తే జయో హోతి పరాజయో’’తి. ‘‘జయోపి హోతి పరాజయోపీ’’తి వుత్తే, ‘‘బ్రాహ్మణ, అప్పమత్తకో ఏస, పరం జినన్తస్స జయో నామ న సేయ్యో. యో పన కిలేసజయేన అత్తానం జినాతి, తస్స జయో సేయ్యో. న హి తం జయం కోచి అపజయం కాతుం సక్కోతీ’’తి వత్వా అనుసన్ధిం ఘటేత్వా ధమ్మం దేసేన్తో ఇమా గాథా అభాసి –

౧౦౪. ‘‘అత్తా హవే జితం సేయ్యో, యా చాయం ఇతరా పజా;

అత్తదన్తస్స పోసస్స, నిచ్చం సఞ్ఞతచారినో.

౧౦౫. ‘‘నేవ దేవో న గన్ధబ్బో, న మారో సహ బ్రహ్మునా;

జితం అపజితం కయిరా, తథారూపస్స జన్తునో’’తి.

తత్థ హవేతి నిపాతో. జితన్తి లిఙ్గవిపల్లాసో, అత్తనో కిలేసజయేన అత్తా జితో సేయ్యోతి అత్థో. యా చాయం ఇతరా పజాతి యా పనాయం అవసేసా పజా జూతేన వా ధనహరణేన వా సఙ్గామేన వా బలాభిభవేన వా జితా భవేయ్య, తం జినన్తేన యం జితం, న తం సేయ్యోతి అత్థో. కస్మా పన తదేవ జితం సేయ్యో, ఇదం న సేయ్యోతి? యస్మా అత్తదన్తస్స…పే… తథారూపస్స జన్తునోతి. ఇదం వుత్తం హోతి – యస్మా హి య్వాయం నిక్కిలేసతాయ అత్తదన్తో పోసో, తస్స అత్తదన్తస్స కాయాదీహి నిచ్చం సఞ్ఞతచారినో ఏవరూపస్స ఇమేహి కాయసఞ్ఞమాదీహి సఞ్ఞతస్స జన్తునో దేవో వా గన్ధబ్బో వా మారో వా బ్రహ్మునా సహ ఉట్ఠహిత్వా ‘‘అహమస్స జితం అపజితం కరిస్సామి, మగ్గభావనాయ పహీనే కిలేసే పున ఉప్పాదేస్సామీ’’తి ఘటేన్తోపి వాయమన్తోపి యథా ధనాదీహి పరాజితో పక్ఖన్తరో హుత్వా ఇతరేన జితం పున జినన్తో అపజితం కరేయ్య, ‘‘ఏవం అపజితం కాతుం నేవ సక్కుణేయ్యా’’తి.

దేసనావసానే బహూ సోతాపత్తిఫలాదీని పాపుణింసూతి.

అనత్థపుచ్ఛకబ్రాహ్మణవత్థు చతుత్థం.