౬. లకుణ్డకభద్దియత్థేరవత్థు

సేలో యథాతి ఇమం ధమ్మదేసనం సత్థా జేతవనే విహరన్తో లకుణ్డకభద్దియత్థేరం ఆరబ్భ కథేసి.

పుథుజ్జనా కిర సామణేరాదయో థేరం దిస్వా సీసేపి కణ్ణేసుపి నాసాయపి గహేత్వా ‘‘కిం, చూళపిత, సాసనస్మిం న ఉక్కణ్ఠసి, అభిరమసీ’’తి వదన్తి. థేరో తేసు నేవ కుజ్ఝతి, న దుస్సతి. ధమ్మసభాయం కథం సముట్ఠాపేసుం ‘‘పస్సథావుసో, లకుణ్డకభద్దియత్థేరం దిస్వా సామణేరాదయో ఏవఞ్చేవఞ్చ విహేఠేన్తి, సో తేసు నేవ కుజ్ఝతి, న దుస్సతీ’’తి. సత్థా ఆగన్త్వా ‘‘కిం కథేథ, భిక్ఖవే’’తి పుచ్ఛిత్వా ‘‘ఇమం నామ, భన్తే’’తి వుత్తే ‘‘ఆమ, భిక్ఖవే, ఖీణాసవా నామ నేవ కుజ్ఝన్తి, న దుస్సన్తి. ఘనసేలసదిసా హేతే అచలా అకమ్పియా’’తి వత్వా అనుసన్ధిం ఘటేత్వా ధమ్మం దేసేన్తో ఇమం గాథమాహ –

౮౧. ‘‘సేలో యథా ఏకఘనో, వాతేన న సమీరతి;

ఏవం నిన్దాపసంసాసు, న సమిఞ్జన్తి పణ్డితా’’తి.

తత్థ నిన్దాపసంసాసూతి కిఞ్చాపి ఇధ ద్వే లోకధమ్మా వుత్తా, అత్థో పన అట్ఠన్నమ్పి వసేన వేదితబ్బో. యథా హి ఏకఘనో అసుసిరో సేలో పురత్థిమాదిభేదేన వాతేన న సమీరతి న ఇఞ్జతి న చలతి, ఏవం అట్ఠసుపి లోకధమ్మేసు అజ్ఝోత్థరన్తేసు పణ్డితా న సమిఞ్జన్తి, పటిఘవసేన వా అనునయవసేన వా న చలన్తి న కమ్పన్తి.

దేసనావసానే బహూ సోతాపత్తిఫలాదీని పాపుణింసూతి.

లకుణ్డకభద్దియత్థేరవత్థు ఛట్ఠం.