౧౫. పియదస్సీబుద్ధవంసవణ్ణనా

సుజాతస్స పన అపరభాగే ఇతో అట్ఠకప్పసతాధికసహస్సకప్పమత్థకే ఏకస్మిం కప్పే పియదస్సీ, అత్థదస్సీ, ధమ్మదస్సీతి తయో బుద్ధా నిబ్బత్తింసు. తత్థ పియదస్సీ నామ భగవా పారమియో పూరేత్వా తుసితపురే నిబ్బత్తిత్వా తతో చవిత్వా సుధఞ్ఞవతీనగరే సుదత్తస్స నామ రఞ్ఞో అగ్గమహేసియా చన్దసదిసవదనాయ చన్దాదేవియా నామ కుచ్ఛిస్మిం పటిసన్ధిం గహేత్వా దసన్నం మాసానం అచ్చయేన వరుణుయ్యానే మాతుకుచ్ఛితో నిక్ఖమి. తస్స పన నామగ్గహణదివసే లోకస్స పియానం పాటిహారియవిసేసానం దస్సితత్తా ‘‘పియదస్సీ’’త్వేవ నామమకంసు. సో నవవస్ససహస్సాని అగారం అజ్ఝావసి. తస్స కిర సునిమ్మలవిమలగిరిబ్రహానామకా తయో పాసాదా అహేసుం. విమలామహాదేవిప్పముఖాని తేత్తింస ఇత్థిసహస్సాని పచ్చుపట్ఠితాని అహేసుం.

సో చత్తారి నిమిత్తాని దిస్వా విమలాదేవియా కఞ్చనవేళే నామ పుత్తే ఉప్పన్నే ఆజఞ్ఞరథేన మహాభినిక్ఖమనం నిక్ఖమిత్వా పబ్బజి. ఏకా చ నం పురిసకోటి అనుపబ్బజి. సో తేహి పరివుతో మహాపురిసో ఛ మాసే పధానచరియం చరిత్వా విసాఖపుణ్ణమాయ వరుణబ్రాహ్మణగామే వసభబ్రాహ్మణస్స ధీతాయ దిన్నం మధుపాయాసం పరిభుఞ్జిత్వా సాలవనే దివావిహారం వీతినామేత్వా సుజాతాజీవకేన దిన్నా అట్ఠ తిణముట్ఠియో గహేత్వా కకుధబోధిం ఉపసఙ్కమిత్వా తేపఞ్ఞాసహత్థవిత్థతం తిణసన్థరం సన్థరిత్వా పల్లఙ్కం ఆభుజిత్వా సబ్బఞ్ఞుతఞ్ఞాణం పటివిజ్ఝిత్వా ‘‘అనేకజాతిసంసార’’న్తి ఉదానం ఉదానేత్వా తత్థేవ సత్తసత్తాహం వీతినామేత్వా అత్తనా సహ పబ్బజితానం అరియధమ్మపటివేధసమత్థతం ఞత్వా ఆకాసేన తత్థ గన్త్వా ఉసభవతీనగరసమీపే ఉసభవతుయ్యానే ఓతరిత్వా భిక్ఖుకోటిపరివుతో ధమ్మచక్కం పవత్తేసి. తదా కోటిసతసహస్సానం ధమ్మాభిసమయో అహోసి. అయం పఠమో అభిసమయో.

పున ఉసభవతియా నామ నగరస్స అవిదూరే సుదస్సనపబ్బతే సుదస్సనో నామ దేవరాజా పటివసతి. సో మిచ్ఛాదిట్ఠికో అహోసి. సకలజమ్బుదీపే పన మనుస్సా తస్స అనుసంవచ్ఛరం సతసహస్సగ్ఘనికం బలిం ఉపసంహరన్తి. సో సుదస్సనో దేవరాజా నరరాజేన సద్ధిం ఏకాసనే నిసీదిత్వా బలిం సమ్పటిచ్ఛతి. అథ పియదస్సీ భగవా ‘‘తస్స సుదస్సనస్స దేవరాజస్స తం దిట్ఠిగతం వినోదేస్సామీ’’తి తస్మిం దేవరాజే యక్ఖసమాగమం గతే తస్స భవనం పవిసిత్వా సిరిసయనం ఆరుహిత్వా ఛబ్బణ్ణరంసియో ముఞ్చన్తో యుగన్ధరపబ్బతే సరదసమయే సూరియో వియ నిసీది. తస్స పరివారపరిచారికా దేవతాయో మాలాగన్ధవిలేపనాదీహి దసబలం పూజేత్వా పరివారేత్వా అట్ఠంసు.

సుదస్సనోపి దేవరాజా యక్ఖసమాగమతో ఆగచ్ఛన్తో అత్తనో భవనతో ఛబ్బణ్ణరస్మియో నిచ్ఛరన్తే దిస్వా చిన్తేసి – ‘‘అఞ్ఞేసు పన దివసేసు మమ భవనస్స ఏదిసీ అనేకరంసిజాలసముజ్జలవిభూతి న దిట్ఠపుబ్బా. కో ను ఖో ఇధ పవిట్ఠో దేవో వా మనుస్సో వా’’తి ఓలోకేన్తో ఉదయగిరిసిఖరమత్థకే సరదసమయదివసకరమివ ఛబ్బణ్ణరంసిజాలేన అభిజ్జలన్తం నిసిన్నం భగవన్తం దిస్వా చిన్తేసి – ‘‘అయం ముణ్డకసమణో మమ పరివారేన పరిజనేన పరివుతో వరసయనే నిసిన్నో’’తి కోధాభిభూతమానసో – ‘‘హన్దాహం ఇమస్స అత్తనో బలం దస్సేస్సామీ’’తి చిన్తేత్వా సకలం తం పబ్బతం ఏకజాలమకాసి. ‘‘ఇమినా అగ్గిజాలేన ఛారికాభూతో ముణ్డకసమణో’’తి ఓలోకేన్తో అనేకరంసిజాలవిసరవిప్ఫురితవరసరీరం పసన్నవదనవణ్ణసోభం విప్పసన్నచ్ఛవిరాగం దసబలమభిజ్జలన్తం దిస్వా చిన్తేసి – ‘‘అయం సమణో అగ్గిదాహం సహతి, హన్దాహం ఇమం సమణం ఉదకోఘేన ఓసాదేత్వా మారేస్సామీ’’తి అతిగమ్భీరం ఉదకోఘం విమానాభిముఖం పవత్తేసి.

తతో ఉదకోఘేన పుణ్ణే తస్మిం విమానే నిసిన్నస్స తస్స భగవతో చీవరే అంసుమత్తం వా సరీరే లోమమత్తం వా న తేమిత్థ. తతో సుదస్సనో దేవరాజా – ‘‘ఇమినా సమణో నిరస్సాసో మతో భవిస్సతీ’’తి మన్త్వా ఉదకం సఙ్ఖిపిత్వా ఓలోకేన్తో భగవన్తం అసితజలధరవివరగతం సరదసమయరజనికరమివ వివిధరంసిజాలవిసరేన విరోచమానం సకపరిసపరివుతం నిసిన్నం దిస్వా అత్తనో మక్ఖం అసహమానో – ‘‘హన్ద మారేస్సామి న’’న్తి కోధేన నవవిధఆవుధవస్సం వస్సేసి. అథస్స భగవతో ఆనుభావేన సబ్బావుధాని నానావిధపరమరుచిరదస్సనా సురభికుసుమమాలా హుత్వా దసబలస్స పాదమూలే నిపతింసు.

తతో తం అచ్ఛరియం దిస్వా సుదస్సనో దేవరాజా పరమకుపితమానసో భగవన్తం ఉభోహి హత్థేహి పాదేసు గహేత్వా అత్తనో భవనతో నీహరితుకామో ఉక్ఖిపిత్వా మహాసముద్దం అతిక్కమిత్వా చక్కవాళపబ్బతం గన్త్వా – ‘‘కిం ను ఖో సమణో జీవతి వా మతో వా’’తి ఓలోకేన్తో తస్మింయేవ ఆసనే నిసిన్నం దిస్వా – ‘‘అహో మహానుభావో అయం సమణో, నాహం ఇమం సమణం ఇతో నిక్కడ్ఢితుం సక్కోమి. యది హి మం కోచి జానిస్సతి, అనప్పకో మే అయసో భవిస్సతి. యావిమం కోచి న పస్సతి, తావ నం విస్సజ్జేత్వా గమిస్సామీ’’తి చిన్తేసి.

అథ దసబలో తస్స చిత్తాచారం ఞత్వా తథా అధిట్ఠాసి, యథా నం సబ్బే దేవమనుస్సా పస్సన్తి. తస్మిఞ్చ దివసే సకలజమ్బుదీపే ఏకసతరాజానో తస్సేవ ఉపహారదానత్థాయ సన్నిపతింసు. తే భగవతో పాదే గహేత్వా నిసిన్నం సుదస్సనం దేవరాజానం నరరాజానో దిస్వా – ‘‘అమ్హాకం దేవరాజా మునిరాజస్స పియదస్సిస్స సత్థునో పాదపరిచరియం కరోతి, అహో బుద్ధా నామ అచ్ఛరియా, అహో బుద్ధగుణా విసిట్ఠా’’తి భగవతి, పసన్నచిత్తా సబ్బే భగవన్తం నమస్సమానా సిరస్మిం అఞ్జలిం కత్వా అట్ఠంసు. తత్థ పియదస్సీ భగవా తం సుదస్సనం దేవరాజానం పముఖం కత్వా ధమ్మం దేసేసి. తదా దేవమనుస్సానం నవుతికోటిసహస్సాని అరహత్తం పాపుణింసు. సో దుతియో అభిసమయో అహోసి.

యదా పన నవయోజనప్పమాణే కుముదనగరే బుద్ధపచ్చత్థికో దేవదత్తో వియ సోణత్థేరో నామ మహాపదుమకుమారేన సద్ధిం మన్తేత్వా తస్స పితరం ఘాతేత్వా పున పియదస్సీబుద్ధస్స వధాయ నానప్పకారం పయోగం కత్వాపి ఘాతేతుం అసక్కోన్తో సో దోణముఖనాగరాజారోహం పక్కోసాపేత్వా తం పలోభేత్వా తమత్థం ఆరోచేసి – ‘‘యదా పనాయం సమణో పియదస్సీ ఇమం నగరం పిణ్డాయ పవిసతి, తదా దోణముఖం నామ గజవరం విస్సజ్జేత్వా పియదస్సీసమణం మారేహీ’’తి.

అథ సో ఆరోహో హితాహితవిచారణరహితో రాజవల్లభో – ‘‘అయం సమణో ఠానన్తరాపి మం చావేయ్యా’’తి మన్త్వా ‘‘సాధూ’’తి సమ్పటిచ్ఛిత్వా దుతియదివసే దసబలస్స నగరప్పవేసనసమయం సల్లక్ఖేత్వా సుజాతమత్థకపిణ్డకుమ్భనలాటం ధనుసదిసదీఘసుణ్డతటం సువిపులముదుకణ్ణం మధుపిఙ్గలనయనం సున్దరక్ఖన్ధాసనం అనువట్టఘనజఘనం నిచితగూళ్హజాణుఅన్తరం ఈసాసదిసరుచిరదన్తం సువాలధిం అపచితమేచకం సబ్బలక్ఖణసమ్పన్నం అసితజలధరసదిసచారుదస్సనం సీహవిక్కన్తలలితగామినం జఙ్గమమివ ధరాధరం సత్తప్పతిట్ఠం సత్తధా పభిన్నం సబ్బసో విస్సవన్తం విగ్గహవన్తమివ అన్తకం ఉపసఙ్కమిత్వా పిణ్డకబళఞ్జనధూపలేపాదివిసేసేహి భియ్యోపి మత్తప్పమత్తం కత్వా అరివారణవారణం ఏరావణవారణమివ అరిజనవారణం మునివారణం మారణత్థాయ పేసేసి. అథ సో ద్విరదవరో ముత్తమత్తోవ గజమహింసతురఙ్గనరనారియో హన్త్వా హతరుధిరపరిరఞ్జితసదన్తకరసరీరో అన్తజాలపరియోనద్ధనయనో సకటకవాటకూటాగారద్వారతోరణాదీని భఞ్జిత్వా కాక-కులల-గిజ్ఝాదీహి అనుపరియాయమానో హతమహింసనరతురఙ్గదిరదాదీనం అఙ్గాని ఆలుమ్పిత్వా మనుస్సభక్ఖో యక్ఖో వియ భక్ఖయన్తో దూరతోవ దసబలం సిస్సగణపరివుతం ఆగచ్ఛన్తం దిస్వా అనిలగరుళసదిసవేగో వేగేన భగవన్తమభిగఞ్ఛి.

అథ పురవాసినో పన జనా భయసన్తాపపరిపూరితమానసా పాసాదపాకారచయతరూపగతా తథాగతాభిముఖమభిధావన్తం దిస్వా హాహాకారసద్దమకంసు. కేచి పన ఉపాసకా తం నానప్పకారేహి నయేహి నివారయితుమారభింసు. అథ సో బుద్ధనాగో హత్థినాగమాయన్తమోలోకేత్వా కరుణావిప్ఫారసీతలహదయో మేత్తాయ తం ఫరి. తతో సో హత్థినాగో మేత్తాఫరణేన ముదుకతహదయసన్తానో అత్తనో దోసాపరాధం ఞత్వా లజ్జాయ భగవతో పురతో ఠాతుం అసక్కోన్తో పథవియం పవిసన్తో వియ సిరసా భగవతో పాదేసు నిపతి. ఏవం నిపన్నో పన సో తిమిరనికరసదిససరీరో సఞ్ఛాప్పభానురఞ్జితవరకనకగిరిసిఖరసమీపముపగతో అసితసలిలధరనికరో వియ విరోచిత్థ.

అథేవం మునిరాజపాదమూలే కరిరాజానం సిరసా నిపతన్తం దిస్వా నాగరజనా పరమపీతిపూరితహదయా సాధుకారసీహనాదం ఉక్కుట్ఠిసద్దం పవత్తయింసు. సురభికుసుమమాలాచన్దనగన్ధచుణ్ణాలఙ్కారాదీహి తం అనేకప్పకారం పూజేసుం. సమన్తతో చేలుక్ఖేపా పవత్తింసు. గగనతలే సురదున్దుభియో అభినదింసు. అథ భగవా తమసితగిరిసిఖరమివ పాదమూలే నిపన్నం దిరదవరం ఓలోకేత్వా అఙ్కుసధజజాలసఙ్ఖచక్కాలఙ్కతేన కరతలేన గజవరమత్థకం పరామసిత్వా తస్స చిత్తాచారానుకూలాయ ధమ్మదేసనాయ తం అనుసాసి –

‘‘గజవర వదతో సుణోహి వాచం, మమ హితమత్థయుతఞ్చ తం భజాహి;

తవ వధనిరతం పదుట్ఠభావం, అపనయ సన్తముపేహి చారుదన్తి.

‘‘లోభేన దోసేన చ మోహతో వా, యో పాణినో హింసతి వారణిన్ద;

సో పాణఘాతీ సుచిరమ్పి కాలం, దుక్ఖం సుఘోరం నరకేనుభోతి.

‘‘మాకాసి మాతఙ్గ పునేవరూపం, కమ్మం పమాదేన మదేన వాపి;

అవీచియం దుక్ఖమసయ్హ కప్పం, పప్పోతి పాణం అతిపాతయన్తో.

‘‘దుక్ఖం సుఘోరం నరకేనుభోత్వా, మనుస్సలోకం యది యాతి భియ్యో;

అప్పాయుకో హోతి విరూపరూపో, విహింసకో దుక్ఖవిసేసభాగీ.

‘‘యథా చ పాణా పరమం పియా తే, మహాజనే కుఞ్జర మన్దనాగ;

తథా పరస్సాపి పియాతి ఞత్వా, పాణాతిపాతో పరివజ్జనీయో.

‘‘దోసే చ హింసానిరతే విదిత్వా, పాణాతిపాతా విరతే గుణే చ;

పాణాతిపాతం పరివజ్జయ త్వం, సగ్గే సుఖం ఇచ్ఛసి చే పరత్థ.

‘‘పాణాతిపాతా విరతో సుదన్తో, పియో మనాపో భవతీధ లోకే;

కాయస్స భేదా చ పరం పనస్స, సగ్గాధివాసం కథయన్తి బుద్ధా.

‘‘దుక్ఖాగమం నిచ్ఛతి కోచి లోకే, సబ్బోపి జాతో సుఖమేసతేవ;

తస్మా మహానాగ విహాయ హింసం, భావేహి మేత్తం కరుణఞ్చ కాలే’’తి.

అథేవం దసబలేనానుసాసియమానో దన్తివరో సఞ్ఞం పటిలభిత్వా పరమవినీతో వినయాచారసమ్పన్నో సిస్సో వియ అహోసి. ఏవం సో పియదస్సీ భగవా అమ్హాకం సత్థా వియ ధనపాలం దోణముఖం కరివరం దమిత్వా తత్థ మహాజనసమాగమే ధమ్మం దేసేసి. తదా అసీతికోటిసహస్సానం ధమ్మాభిసమయో అహోసి. అయం తతియో అభిసమయో అహోసి. తేన వుత్తం –

౧. ‘‘సుజాతస్స అపరేన, సయమ్భూ లోకనాయకో;

దురాసదో అసమసమో, పియదస్సీ మహాయసో.

౨. ‘‘సోపి బుద్ధో అమితయసో, ఆదిచ్చోవ విరోచతి;

సబ్బం తమం నిహన్త్వాన, ధమ్మచక్కం పవత్తయి.

౩. ‘‘తస్సాపి అతులతేజస్స, అహేసుం అభిసమయా తయో;

కోటిసతసహస్సానం, పఠమాభిసమయో అహు.

౪. ‘‘సుదస్సనో దేవరాజా, మిచ్ఛాదిట్ఠిమరోచయి;

తస్స దిట్ఠిం వినోదేన్తో, సత్థా ధమ్మమదేసయి.

౫. ‘‘జనసన్నిపాతో అతులో, మహాసన్నిపతీ తదా;

నవుతికోటిసహస్సానం, దుతియాభిసమయో అహు.

౬. ‘‘యదా దోణముఖం హత్థిం, వినేసి నరసారథి;

అసీతికోటిసహస్సానం, తతియాభిసమయో అహూ’’తి.

సుమఙ్గలనగరే పాలితో నామ రాజపుత్తో చ పురోహితపుత్తో సబ్బదస్సికుమారో చాతి ద్వే సహాయకా అహేసుం. తే పియదస్సిమ్హి సమ్మాసమ్బుద్ధే చారికం చరన్తే ‘‘అత్తనో నగరం సమ్పత్తో’’తి సుత్వా కోటిసతసహస్సపరివారా పచ్చుగ్గమనం కత్వా తస్స ధమ్మం సుత్వా సత్తాహం మహాదానం దత్వా సత్తమే దివసే భగవతో భత్తానుమోదనావసానే కోటిసతసహస్సేహి సద్ధిం పబ్బజిత్వా అరహత్తం పాపుణింసు. తేసం పన మజ్ఝే భగవా పాతిమోక్ఖం ఉద్దిసి, సో పఠమో సన్నిపాతో అహోసి. అథాపరేన సమయేన సుదస్సనదేవరాజస్స సమాగమే నవుతికోటియో అరహత్తం పాపుణింసు. తేహి పరివుతో సత్థా పాతిమోక్ఖం ఉద్దిసి, అయం దుతియో సన్నిపాతో అహోసి. పున దోణముఖవినయనే అసీతికోటియో పబ్బజిత్వా అరహత్తం పాపుణింసు. తేసం మజ్ఝే భగవా పాతిమోక్ఖం ఉద్దిసి, అయం తతియో సన్నిపాతో అహోసి. తేన వుత్తం –

౭. ‘‘సన్నిపాతా తయో ఆసుం, తస్సాపి పియదస్సినో;

కోటిసతసహస్సానం, పఠమో ఆసి సమాగమో.

౮. ‘‘తతో పరం నవుతికోటీ, సమింసు ఏకతో మునీ;

తతియే సన్నిపాతమ్హి, అసీతికోటియో అహూ’’తి.

తదా అమ్హాకం బోధిసత్తో కస్సపో నామ బ్రాహ్మణమాణవో ఇతిహాసపఞ్చమానం తిణ్ణం వేదానం పారగూ హుత్వా సత్థు ధమ్మదేసనం సుత్వా కోటిసతసహస్సపరిచ్చాగేన పరమారామం సఙ్ఘారామం కారేత్వా సరణేసు చ పఞ్చసీలేసు చ పతిట్ఠాసి. అథ నం సత్థా – ‘‘ఇతో అట్ఠారసకప్పసతచ్చయేన గోతమో నామ బుద్ధో లోకే భవిస్సతీ’’తి బ్యాకాసి. తేన వుత్తం –

౯. ‘‘అహం తేన సమయేన, కస్సపో నామ బ్రాహ్మణో;

అజ్ఝాయకో మన్తధరో, తిణ్ణం వేదాన పారగూ.

౧౦. ‘‘తస్స ధమ్మం సుణిత్వాన, పసాదం జనయిం అహం;

కోటిసతసహస్సేహి, సఙ్ఘారామం అమాపయిం.

౧౧. ‘‘తస్స దత్వాన ఆరామం, హట్ఠో సంవిగ్గమానసో;

సరణే పఞ్చసీలే చ, దళహం కత్వా సమాదియిం.

౧౨. ‘‘సోపి మం బుద్ధో బ్యాకాసి, సఙ్ఘమజ్ఝే నిసీదియ;

అట్ఠారసే కప్పసతే, అయం బుద్ధో భవిస్సతి.

౧౩. ‘‘పధానం పదహిత్వాన…పే… హేస్సామ సమ్ముఖా ఇమం.

౧౪. ‘‘తస్సాపి వచనం సుత్వా, భియ్యో చిత్తం పసాదయిం;

ఉత్తరిం వతమధిట్ఠాసిం, దసపారమిపూరియా’’తి.

తత్థ సరణే పఞ్చసీలే చాతి తీణి సరణాని పఞ్చ సీలాని చాతి అత్థో. అట్ఠారసే కప్పసతేతి ఇతో అట్ఠసతాధికస్స కప్పసహస్సస్స అచ్చయేనాతి అత్థో.

తస్స పన భగవతో సుధఞ్ఞం నామ నగరం అహోసి. పితా సుదత్తో నామ రాజా, మాతా సుచన్దా నామ దేవీ, పాలితో చ సబ్బదస్సీ చ ద్వే అగ్గసావకా, సోభితో నాముపట్ఠాకో, సుజాతా చ ధమ్మదిన్నా చ ద్వే అగ్గసావికా, కకుధరుక్ఖో బోధి, సరీరం అసీతిహత్థుబ్బేధం అహోసి, నవుతివస్ససహస్సాని ఆయు, విమలా నామస్స అగ్గమహేసీ అహోసి, కఞ్చనావేళో నామ పుత్తో, సో ఆజఞ్ఞరథేన నిక్ఖమీతి. తేన వుత్తం –

౧౫. ‘‘సుధఞ్ఞం నామ నగరం, సుదత్తో నామ ఖత్తియో;

చన్దా నామాసి జనికా, పియదస్సిస్స సత్థునో.

౨౦. ‘‘పాలితో సబ్బదస్సీ చ, అహేసుం అగ్గసావకా;

సోభితో నాముపట్ఠాకో, పియదస్సిస్స సత్థునో.

౨౧. ‘‘సుజాతా ధమ్మదిన్నా చ, అహేసుం అగ్గసావికా;

బోధి తస్స భగవతో, కకుధోతి పవుచ్చతి.

౨౩. ‘‘సోపి బుద్ధో అమితయసో, ద్వత్తింసవరలక్ఖణో;

అసీతిహత్థముబ్బేధో, సాలరాజావ దిస్సతి.

౨౪. ‘‘అగ్గిచన్దసూరియానం, నత్థి తాదిసికా పభా;

యథా అహు పభా తస్స, అసమస్స మహేసినో.

౨౫. ‘‘తస్సాపి దేవదేవస్స, ఆయు తావతకం అహు;

నవుతివస్ససహస్సాని, లోకే అట్ఠాసి చక్ఖుమా.

౨౬. ‘‘సోపి బుద్ధో అసమసమో, యుగానిపి తాని అతులియాని;

సబ్బం తమన్తరహితం, నను రిత్తా సబ్బసఙ్ఖారా’’తి.

తత్థ సాలరాజా వాతి సబ్బఫాలిఫుల్లో పరమరమణీయదస్సనో సమవట్టక్ఖన్ధో సాలరాజా వియ దిస్సతి. యుగానిపి తానీతి అగ్గసావకయుగాదీని యుగళాని. సేసగాథాసు సబ్బత్థ ఉత్తానమేవాతి.

పియదస్సీబుద్ధవంసవణ్ణనా నిట్ఠితా.

నిట్ఠితో తేరసమో బుద్ధవంసో.