౮. సద్దసఞ్ఞకత్థేరఅపదానవణ్ణనా

పబ్బతే హిమవన్తమ్హీతిఆదికం ఆయస్మతో సద్దసఞ్ఞకత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో ఫుస్సస్స భగవతో కాలే ఏకస్మిం కులగేహే నిబ్బత్తో వుద్ధిప్పత్తో సద్ధాజాతో తాపసపబ్బజ్జం పబ్బజిత్వా హిమవన్తమ్హి అరఞ్ఞావాసే వసన్తో అత్తనో అనుకమ్పాయ ఉపగతస్స భగవతో ధమ్మం సుత్వా ధమ్మేసు చిత్తం పసాదేత్వా యావతాయుకం ఠత్వా అపరభాగే కాలం కత్వా తుసితాదీసు ఛసు కామావచరసమ్పత్తియో చ మనుస్సేసు మనుస్ససమ్పత్తియో చ అనుభవిత్వా ఇమస్మిం బుద్ధుప్పాదే ఏకస్మిం కులగేహే నిబ్బత్తో వుద్ధిమన్వాయ సద్ధాజాతో పబ్బజిత్వా విపస్సనం వడ్ఢేత్వా అరహత్తం పాపుణి.

౪౩. సో అపరభాగే అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో పబ్బతే హిమవన్తమ్హీతిఆదిమాహ. తం సబ్బం ఉత్తానత్థమేవాతి.

సద్దసఞ్ఞకత్థేరఅపదానవణ్ణనా సమత్తా.