౯. తిమిరవగ్గో
౧. తిమిరపుప్ఫియత్థేరఅపదానవణ్ణనా
చన్దభాగానదీతీరేతిఆదికం ఆయస్మతో తిమిరపుప్ఫియత్థేరస్స అపదానం. కా ఉప్పత్తి? అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో సిద్ధత్థస్స భగవతో కాలే ఏకస్మిం కులగేహే నిబ్బత్తో వుద్ధిప్పత్తో ఘరావాసం సణ్ఠపేత్వా వసన్తో కామేసు ఆదీనవం దిస్వా ఘరావాసం పహాయ తాపసపబ్బజ్జం పబ్బజిత్వా చన్దభాగాయ నదియా సమీపే వసతి, వివేకకామతాయ హిమవన్తం గన్త్వా నిసిన్నం సిద్ధత్థం భగవన్తం దిస్వా వన్దిత్వా తస్స గుణం పసీదిత్వా తిమిరపుప్ఫం గహేత్వా పూజేసి. సో తేన పుఞ్ఞేన దేవేసు చ మనుస్సేసు చ సమ్పత్తిమనుభవన్తో సంసరిత్వా ఇమస్మిం బుద్ధుప్పాదే ఏకస్మిం కులగేహే నిబ్బత్తో వుద్ధిమన్వాయ సత్థరి పసీదిత్వా పబ్బజితో నచిరస్సేవ అరహా అహోసి.
౧. సో అపరభాగే పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో చన్దభాగానదీతీరేతిఆదిమాహ. తస్సత్థో హేట్ఠా వుత్తోవ. అనుభోతం వజామహన్తి గఙ్గాయ ఆసన్నే వసనభావేన సబ్బత్థ రమ్మభావేన గఙ్గాతో హేట్ఠా సోతానుసారేన అహం వజామి గచ్ఛామి తత్థ తత్థ వసామీతి అత్థో. నిసిన్నం సమణం దిస్వాతి సమితపాపత్తా సోసితపాపత్తా సమణసఙ్ఖాతం సమ్మాసమ్బుద్ధం దిస్వాతి అత్థో.
౨. ఏవం చిన్తేసహం తదాతి అయం భగవా సయం తిణ్ణో సబ్బసత్తే తారయిస్సతి సంసారతో ఉత్తారేతి సయం కాయద్వారాదీహి దమితో అయం భగవా పరే దమేతి.
౩. సయం అస్సత్థో అస్సాసమ్పత్తో, కిలేసపరిళాహతో ముత్తో సబ్బసత్తే అస్సాసేతి, సన్తభావం ఆపాపేతి. సయం సన్తో సన్తకాయచిత్తో పరేసం సన్తకాయచిత్తం పాపేతి. సయం ముత్తో సంసారతో ముచ్చితో పరే సంసారతో మోచయిస్సతి. సో అయం భగవా సయం నిబ్బుతో కిలేసగ్గీహి నిబ్బుతో పరేసమ్పి కిలేసగ్గీహి నిబ్బాపేస్సతీతి అహం తదా ఏవం చిన్తేసిన్తి అత్థో.
౪. గహేత్వా తిమిరపుప్ఫన్తి సకలం వనన్తం నీలకాళరంసీహి అన్ధకారం వియ కురుమానం ఖాయతీతి తిమిరం పుప్ఫం తం గహేత్వా కణ్ణికావణ్టం గహేత్వా మత్థకే సీసస్స ఉపరి ఆకాసే ఓకిరిం పూజేసిన్తి అత్థో. సేసం ఉత్తానత్థమేవాతి.
తిమిరపుప్ఫియత్థేరఅపదానవణ్ణనా సమత్తా.
౨. గతసఞ్ఞకత్థేరఅపదానవణ్ణనా
జాతియా సత్తవస్సోహన్తిఆదికం ఆయస్మతో గతసఞ్ఞకత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో తిస్సస్స భగవతో కాలే ఏకస్మిం కులగేహే నిబ్బత్తో పురాకతవాసనావసేన సద్ధాజాతో సత్తవస్సికకాలేయేవ పబ్బజితో భగవతో పణామకరణేనేవ పాకటో అహోసి. సో ఏకదివసం అతీవ నీలమణిప్పభాని నఙ్గలకసితట్ఠానే ఉట్ఠితసత్తపుప్ఫాని గహేత్వా ఆకాసే పూజేసి. సో యావతాయుకం సమణధమ్మం కత్వా తేన పుఞ్ఞేన దేవమనుస్సేసు సంసరన్తో ఇమస్మిం బుద్ధుప్పాదే ఏకస్మిం కులగేహే నిబ్బత్తో విఞ్ఞుతం పత్తో సత్థరి పసీదిత్వా పబ్బజితో నచిరస్సేవ అరహా అహోసి.
౧౦. సో అపరభాగే అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో జాతియా సత్తవస్సోహన్తిఆదిమాహ. తత్థ జాతియా సత్తవస్సోతి మాతుగబ్భతో నిక్ఖన్తకాలతో పట్ఠాయ పరిపుణ్ణసత్తవస్సికోతి అత్థో. పబ్బజిం అనగారియన్తి అగారస్స హితం ఆగారియం కసివాణిజ్జాదికమ్మం నత్థి ఆగారియన్తి అనగారియం, బుద్ధసాసనే పబ్బజిం అహన్తి అత్థో.
౧౨. సుగతానుగతం మగ్గన్తి బుద్ధేన గతం మగ్గం. అథ వా సుగతేన దేసితం ధమ్మానుధమ్మపటిపత్తిపూరణవసేన హట్ఠమానసో తుట్ఠచిత్తో పూజేత్వాతి సమ్బన్ధో. సేసం సబ్బత్థ ఉత్తానత్థమేవాతి.
గతసఞ్ఞకత్థేరఅపదానవణ్ణనా సమత్తా.
౩. నిపన్నఞ్జలికత్థేరఅపదానవణ్ణనా
రుక్ఖమూలే నిసిన్నోహన్తిఆదికం ఆయస్మతో నిపన్నఞ్జలికత్థేరస్స అపదానం. అయమ్పి పురిమబుద్ధేసు కతాధికారో అనేకేసు భవేసు వివట్టూపనిస్సయాని పుఞ్ఞాని ఉపచినన్తో తిస్సస్స భగవతో కాలే కులగేహే నిబ్బత్తో వుద్ధిప్పత్తో పబ్బజిత్వా రుక్ఖమూలికఙ్గం పూరయమానో అరఞ్ఞే విహరతి. తస్మిం సమయే ఖరో ఆబాధో ఉప్పజ్జి, తేన పీళితో పరమకారుఞ్ఞప్పత్తో అహోసి. తదా భగవా తస్స కారుఞ్ఞేన తత్థ అగమాసి. అథ సో నిపన్నకోవ ఉట్ఠితుం అసక్కోన్తో సిరసి అఞ్జలిం కత్వా భగవతో పణామం అకాసి. సో తతో చుతో తుసితభవనే ఉప్పన్నో తత్థ సమ్పత్తిమనుభవిత్వా ఏవం ఛ కామావచరసమ్పత్తియో అనుభవిత్వా ఇమస్మిం బుద్ధుప్పాదే ఏకస్మిం కులగేహే నిబ్బత్తో వుద్ధిప్పత్తో సత్థరి పసీదిత్వా పబ్బజితో నచిరస్సేవ అరహా అహోసి, పురాకతపుఞ్ఞవసేన నిపన్నఞ్జలికత్థేరోతి పాకటో.
౧౬. సో అపరభాగే అత్తనో పుఞ్ఞసమ్పత్తియో ఓలోకేత్వా సోమనస్సజాతో పుబ్బచరితాపదానం పకాసేన్తో రుక్ఖమూలే నిసిన్నోహన్తిఆదిమాహ. తత్థ రుహతి పటిరుహతి ఉద్ధముద్ధం ఆరోహతీతి రుక్ఖో, తస్స రుక్ఖస్స మూలే సమీపేతి అత్థో. బ్యాధితో పరమేన చాతి పరమేన అధికేన ఖరేన కక్ఖళేన బ్యాధినా రోగేన బ్యాధితో, బ్యాధినా అహం సమన్నాగతోతి అత్థో. పరమకారుఞ్ఞప్పత్తోమ్హీతి పరమం అధికం కారుఞ్ఞం దీనభావం దుక్ఖితభావం పత్తోమ్హి అరఞ్ఞే కాననేతి సమ్బన్ధో.
౨౦. పఞ్చేవాసుం మహాసిఖాతి సిరసి పిళన్ధనత్థేన సిఖా వుచ్చతి చూళా. మణీతి జోతమానం మకుటం తస్స అత్థీతి సిఖో, చక్కవత్తినో ఏకనామకా పఞ్చేవ చక్కవత్తినో ఆసుం అహేసున్తి అత్థో. సేసం సబ్బత్థ ఉత్తానత్థమేవాతి.
నిపన్నఞ్జలికత్థేరఅపదానవణ్ణనా సమత్తా.
౪. అధోపుప్ఫియత్థేరఅపదానవణ్ణనా
అభిభూ నామ సో భిక్ఖూతిఆదికం ఆయస్మతో అధోపుప్ఫియత్థేరస్స అపదానం. అయమ్పి పురిమబుద్ధేసు కతాధికారో అనేకేసు భవేసు వివట్టూపనిస్సయాని పుఞ్ఞాని ఉపచినన్తో సిఖిస్స భగవతో కాలే కులగేహే నిబ్బత్తో వుద్ధిప్పత్తో ఘరావాసం సణ్ఠపేత్వా అపరభాగే కామేసు ఆదీనవం దిస్వా తం పహాయ ఇసిపబ్బజ్జం పబ్బజిత్వా పఞ్చాభిఞ్ఞాఅట్ఠసమాపత్తిలాభీ ఇద్ధీసు చ వసీభావం పత్వా హిమవన్తస్మిం పటివసతి. తస్స సిఖిస్స భగవతో అభిభూ నామ అగ్గసావకో వివేకాభిరతో హిమవన్తమగమాసి. అథ సో తాపసో తం అగ్గసావకత్థేరం దిస్వా థేరస్స ఠితపబ్బతం ఆరుహన్తో పబ్బతస్స హేట్ఠాతలతో సుగన్ధాని వణ్ణసమ్పన్నాని సత్త పుప్ఫాని గహేత్వా పూజేసి. అథ సో థేరో తస్సానుమోదనమకాసి. సోపి తాపసో సకస్సమం అగమాసి. తత్థ ఏకేన అజగరేన పీళితో అపరభాగే అపరిహీనజ్ఝానో తేనేవ ఉపద్దవేన ఉపద్దుతో కాలం కత్వా బ్రహ్మలోకపరాయనో హుత్వా బ్రహ్మసమ్పత్తిం ఛకామావచరసమ్పత్తిఞ్చ అనుభవిత్వా మనుస్సేసు మనుస్ససమ్పత్తియో చ ఖేపేత్వా ఇమస్మిం బుద్ధుప్పాదే ఏకస్మిం కులగేహే నిబ్బత్తో వుద్ధిప్పత్తో భగవతో ధమ్మం సుత్వా పసన్నమానసో పబ్బజిత్వా నచిరస్సేవ అరహా అహోసి. సో అపరభాగే అత్తనో కతపుఞ్ఞనామేన అధోపుప్ఫియత్థేరోతి పాకటో.
౨౨. సో ఏకదివసం అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో అభిభూ నామ సో భిక్ఖూతిఆదిమాహ. తత్థ సీలసమాధీహి పరే అభిభవతీతి అభిభూ, ఖన్ధమారాదిమారే అభిభవతి అజ్ఝోత్థరతీతి వా అభిభూ, ససన్తానపరసన్తానగతకిలేసే అభిభవతి విహేసేతి విద్ధంసేతీతి వా అభిభూ. భిక్ఖనసీలో యాచనసీలోతి భిక్ఖు, ఛిన్నభిన్నపటధరోతి వా భిక్ఖు. అభిభూ నామ అగ్గసావకో సో భిక్ఖూతి అత్థో, సిఖిస్స భగవతో అగ్గసావకోతి సమ్బన్ధో.
౨౭. అజగరో మం పీళేసీతి తథారూపం సీలసమ్పన్నం ఝానసమ్పన్నం తాపసం పుబ్బే కతపాపేన వేరేన చ మహన్తో అజగరసప్పో పీళేసి. సో తేనేవ ఉపద్దవేన ఉపద్దుతో అపరిహీనజ్ఝానో కాలం కత్వా బ్రహ్మలోకపరాయణో ఆసి. సేసం సబ్బత్థ ఉత్తానమేవాతి.
అధోపుప్ఫియత్థేరఅపదానవణ్ణనా సమత్తా.
౫. రంసిసఞ్ఞకత్థేరఅపదానవణ్ణనా
పబ్బతే హిమవన్తమ్హీతిఆదికం ఆయస్మతో రంసిసఞ్ఞకత్థేరస్స అపదానం. అయమ్పి పురిమబుద్ధేసు కతాధికారో తేసు తేసు భవేసు వివట్టూపనిస్సయాని పుఞ్ఞాని ఉపచినన్తో విపస్సిస్స భగవతో కాలే కులగేహే నిబ్బత్తో వుద్ధిమన్వాయ ఘరావాసం సణ్ఠపేత్వా కామేసు ఆదీనవం దిస్వా ఘరావాసం పహాయ తాపసపబ్బజ్జం పబ్బజిత్వా అజినచమ్మధరో హిమవన్తమ్హి వాసం కప్పేసి. తస్మిం సమయే విపస్సీ భగవా హిమవన్తమగమాసి. అథ సో తాపసో తముపగతం భగవన్తం దిస్వా తస్స భగవతో సరీరతో నిక్ఖన్తఛబ్బణ్ణబుద్ధరంసీసు పసీదిత్వా అఞ్జలిం పగ్గయ్హ పఞ్చఙ్గేన నమక్కారమకాసి. సో తేనేవ పుఞ్ఞేన ఇతో చుతో తుసితాదీసు దిబ్బసమ్పత్తియో అనుభవిత్వా అపరభాగే మనుస్ససమ్పత్తియో చ అనుభవిత్వా ఇమస్మిం బుద్ధుప్పాదే కులగేహే నిబ్బత్తో వుద్ధిమన్వాయ ఘరావాసం సణ్ఠపేత్వా తత్థాదీనవం దిస్వా గేహం పహాయ పబ్బజిత్వా నచిరస్సేవ అరహా అహోసి.
౩౦. సో అపరభాగే అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో పబ్బతే హిమవన్తమ్హీతిఆదిమాహ. తత్థ పబ్బతేతి పకారేన బ్రూహతి వడ్ఢేతీతి పబ్బతో, హిమో అస్స అత్థీతి హిమవన్తో, హిమవన్తో చ సో పబ్బతో చాతి హిమవన్తపబ్బతో. హిమవన్తపబ్బతేతి వత్తబ్బే గాథావచనసుఖత్థం ‘‘పబ్బతే హిమవన్తమ్హీ’’తి వుత్తం. తస్మిం హిమవన్తమ్హి పబ్బతే వాసం కప్పేసిం పురే అహన్తి సమ్బన్ధో. సేసం సబ్బత్థ నయానుసారేన ఉత్తానమేవాతి.
రంసిసఞ్ఞకత్థేరఅపదానవణ్ణనా సమత్తా.
౬. దుతియరంసిసఞ్ఞకత్థేరఅపదానవణ్ణనా
పబ్బతే హిమవన్తమ్హీతిఆదికం ఆయస్మతో దుతియరంసిసఞ్ఞకత్థేరస్స అపదానం. అయమ్పి పురిమబుద్ధేసు కతకుసలో ఉప్పన్నుప్పన్నభవే వివట్టూపనిస్సయాని పుఞ్ఞాని ఉపచినన్తో ఫుస్సస్స భగవతో కాలే కులగేహే నిబ్బత్తో వుద్ధిప్పత్తో ఘరావాసం సణ్ఠపేత్వా తత్థ దోసం దిస్వా తం పహాయ తాపసపబ్బజ్జం పబ్బజిత్వా హిమవన్తపబ్బతే వసన్తో వాకచీరనివసనో వివేకసుఖేన విహరతి. తస్మిం సమయే సో ఫుస్సం భగవన్తం తం పదేసం సమ్పత్తం దిస్వా తస్స సరీరతో నిక్ఖన్తఛబ్బణ్ణబుద్ధరంసియో ఇతో చితో విధావన్తియో దణ్డదీపికానిక్ఖన్తవిప్ఫురన్తమివ దిస్వా తస్మిం పసన్నో అఞ్జలిం పగ్గహేత్వా వన్దిత్వా చిత్తం పసాదేత్వా తేనేవ పీతిసోమనస్సేన కాలం కత్వా తుసితాదీసు నిబ్బత్తో తత్థ ఛ కామావచరసమ్పత్తియో చ అనుభవిత్వా అపరభాగే మనుస్ససమ్పత్తియో చ అనుభవిత్వా ఇమస్మిం బుద్ధుప్పాదే కులగేహే నిబ్బత్తో వుద్ధిప్పత్తో పుబ్బవాసనావసేన పబ్బజిత్వా నచిరస్సేవ అరహా అహోసి.
౩౫. సో అపరభాగే పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో పబ్బతే హిమవన్తమ్హీతిఆదిమాహ. తం సబ్బం ఉత్తానత్థమేవాతి.
దుతియరంసిసఞ్ఞకత్థేరఅపదానవణ్ణనా సమత్తా.
౭. ఫలదాయకత్థేరఅపదానవణ్ణనా
పబ్బతే హిమవన్తమ్హీతిఆదికం ఆయస్మతో ఫలదాయకత్థేరస్స అపదానం. అయమ్పి పురిమబుద్ధేసు కతకుసలసమ్భారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో ఫుస్సస్స భగవతో కాలే ఏకస్మిం కులగేహే నిబ్బత్తో సుఖప్పత్తో తం సబ్బం పహాయ తాపసపబ్బజ్జం పబ్బజిత్వా ఖరాజినచమ్మధారీ హుత్వా విహరతి. తస్మిఞ్చ సమయే ఫుస్సం భగవన్తం తత్థ సమ్పత్తం దిస్వా పసన్నమానసో మధురాని ఫలాని గహేత్వా భోజేసి. సో తేనేవ కుసలేన దేవలోకాదీసు పుఞ్ఞసమ్పత్తియో అనుభవిత్వా ఇమస్మిం బుద్ధుప్పాదే ఏకస్మిం కులగేహే నిబ్బత్తో వుద్ధిమన్వాయ సత్థరి పసీదిత్వా పబ్బజిత్వా నచిరస్సేవ అరహా అహోసి.
౩౯. సో అపరభాగే అత్తనో పుబ్బకమ్మం అనుస్సరిత్వా పుబ్బచరితాపదానం పకాసేన్తో పబ్బతే హిమవన్తమ్హీతిఆదిమాహ. తం సబ్బం హేట్ఠా వుత్తనయత్తా ఉత్తానత్థమేవాతి.
ఫలదాయకత్థేరఅపదానవణ్ణనా సమత్తా.
౮. సద్దసఞ్ఞకత్థేరఅపదానవణ్ణనా
పబ్బతే హిమవన్తమ్హీతిఆదికం ఆయస్మతో సద్దసఞ్ఞకత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో ఫుస్సస్స భగవతో కాలే ఏకస్మిం కులగేహే నిబ్బత్తో వుద్ధిప్పత్తో సద్ధాజాతో తాపసపబ్బజ్జం పబ్బజిత్వా హిమవన్తమ్హి అరఞ్ఞావాసే వసన్తో అత్తనో అనుకమ్పాయ ఉపగతస్స భగవతో ధమ్మం సుత్వా ధమ్మేసు చిత్తం పసాదేత్వా యావతాయుకం ఠత్వా అపరభాగే కాలం కత్వా తుసితాదీసు ఛసు కామావచరసమ్పత్తియో చ మనుస్సేసు మనుస్ససమ్పత్తియో చ అనుభవిత్వా ఇమస్మిం బుద్ధుప్పాదే ఏకస్మిం కులగేహే నిబ్బత్తో వుద్ధిమన్వాయ సద్ధాజాతో పబ్బజిత్వా విపస్సనం వడ్ఢేత్వా అరహత్తం పాపుణి.
౪౩. సో అపరభాగే అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో పబ్బతే హిమవన్తమ్హీతిఆదిమాహ. తం సబ్బం ఉత్తానత్థమేవాతి.
సద్దసఞ్ఞకత్థేరఅపదానవణ్ణనా సమత్తా.
౯. బోధిసిఞ్చకత్థేరఅపదానవణ్ణనా
విపస్సిస్స భగవతోతిఆదికం ఆయస్మతో బోధిసిఞ్చకత్థేరస్స అపదానం. అయమ్పి పురిమబుద్ధేసు కతాధికారో అనేకాసు జాతీసు వివట్టూపనిస్సయాని పుఞ్ఞాని ఉపచినన్తో విపస్సిస్స భగవతో కాలే కులగేహే నిబ్బత్తో సాసనే పబ్బజిత్వా వత్తపటిపత్తియా సాసనం సోభయన్తో మహాజనే బోధిపూజం కురుమానే దిస్వా అనేకాని పుప్ఫాని సుగన్ధోదకాని చ గాహాపేత్వా పూజేసి. సో తేన పుఞ్ఞేన దేవలోకే నిబ్బత్తో ఛ కామావచరసమ్పత్తియో అనుభవిత్వా ఇమస్మిం బుద్ధుప్పాదే కులగేహే నిబ్బత్తో వుద్ధిమన్వాయ సద్ధాజాతో పబ్బజిత్వా నచిరస్సేవ అరహా అహోసి.
౪౬. సో అరహా హుత్వా ఝానఫలసుఖేన వీతినామేత్వా పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో విపస్సిస్స భగవతోతిఆదిమాహ. తత్థ విసేసం పరమత్థం నిబ్బానం పస్సతీతి విపస్సీ, విసేసేన భబ్బాభబ్బజనే పస్సతీతి వా విపస్సీ, విపస్సన్తో చతుసచ్చం పస్సనదక్ఖనసీలోతి వా విపస్సీ, తస్స విపస్సిస్స భగవతో మహాబోధిమహో అహూతి సమ్బన్ధో. తత్రాపి మహాబోధీతి బోధి వుచ్చతి చతూసు మగ్గేసు ఞాణం, తమేత్థ నిసిన్నో భగవా పటివిజ్ఝతీతి కణికారపాదపరుక్ఖోపి బోధిచ్చేవ వుచ్చతి, మహితో చ సో దేవబ్రహ్మనరాసురేహి బోధి చేతి మహాబోధి, మహతో బుద్ధస్స భగవతో బోధీతి వా మహాబోధి, తస్స మహో పూజా అహోసీతి అత్థో. సేసం సబ్బత్థ ఉత్తానత్థమేవాతి.
బోధిసిఞ్చకత్థేరఅపదానవణ్ణనా సమత్తా.
౧౦. పదుమపుప్ఫియత్థేరఅపదానవణ్ణనా
పోక్ఖరవనం పవిట్ఠోతిఆదికం ఆయస్మతో పదుమపుప్ఫియత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో ఫుస్సస్స భగవతో కాలే ఏకస్మిం కులగేహే నిబ్బత్తో వుద్ధిమన్వాయ పదుమసమ్పన్నం ఏకం పోక్ఖరణిం పవిసిత్వా భిసముళాలే ఖాదన్తో పోక్ఖరణియా అవిదూరే గచ్ఛమానం ఫుస్సం భగవన్తం దిస్వా పసన్నమానసో తతో పదుమాని ఓచినిత్వా ఆకాసే ఉక్ఖిపిత్వా భగవన్తం పూజేసి, తాని పుప్ఫాని ఆకాసే వితానం హుత్వా అట్ఠంసు. సో భియ్యోసోమత్తాయ పసన్నమానసో పబ్బజిత్వా వత్తపటిపత్తిసారో సమణధమ్మం పూరేత్వా తతో చుతో తుసితభవనమలం కురుమానో వియ తత్థ ఉప్పజ్జిత్వా కమేన ఛ కామావచరసమ్పత్తియో చ మనుస్ససమ్పత్తియో చ అనుభవిత్వా ఇమస్మిం బుద్ధుప్పాదే కులగేహే నిబ్బత్తో వుద్ధిప్పత్తో సద్ధాజాతో పబ్బజిత్వా నచిరస్సేవ అరహా అహోసి.
౫౧. సో అపరభాగే అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో పోక్ఖరవనం పవిట్ఠోతిఆదిమాహ. తత్థ పకారేన నళదణ్డపత్తాదీహి ఖరన్తీతి పోక్ఖరా, పోక్ఖరానం సముట్ఠితట్ఠేన సమూహన్తి పోక్ఖరవనం, పదుమగచ్ఛసణ్డేహి మణ్డితం మజ్ఝం పవిట్ఠో అహన్తి అత్థో. సేసం సబ్బత్థ ఉత్తానమేవాతి.
పదుమపుప్ఫియత్థేరఅపదానవణ్ణనా సమత్తా.
నవమవగ్గవణ్ణనా సమత్తా.