౯. బోధిసిఞ్చకత్థేరఅపదానవణ్ణనా

విపస్సిస్స భగవతోతిఆదికం ఆయస్మతో బోధిసిఞ్చకత్థేరస్స అపదానం. అయమ్పి పురిమబుద్ధేసు కతాధికారో అనేకాసు జాతీసు వివట్టూపనిస్సయాని పుఞ్ఞాని ఉపచినన్తో విపస్సిస్స భగవతో కాలే కులగేహే నిబ్బత్తో సాసనే పబ్బజిత్వా వత్తపటిపత్తియా సాసనం సోభయన్తో మహాజనే బోధిపూజం కురుమానే దిస్వా అనేకాని పుప్ఫాని సుగన్ధోదకాని చ గాహాపేత్వా పూజేసి. సో తేన పుఞ్ఞేన దేవలోకే నిబ్బత్తో ఛ కామావచరసమ్పత్తియో అనుభవిత్వా ఇమస్మిం బుద్ధుప్పాదే కులగేహే నిబ్బత్తో వుద్ధిమన్వాయ సద్ధాజాతో పబ్బజిత్వా నచిరస్సేవ అరహా అహోసి.

౪౬. సో అరహా హుత్వా ఝానఫలసుఖేన వీతినామేత్వా పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో విపస్సిస్స భగవతోతిఆదిమాహ. తత్థ విసేసం పరమత్థం నిబ్బానం పస్సతీతి విపస్సీ, విసేసేన భబ్బాభబ్బజనే పస్సతీతి వా విపస్సీ, విపస్సన్తో చతుసచ్చం పస్సనదక్ఖనసీలోతి వా విపస్సీ, తస్స విపస్సిస్స భగవతో మహాబోధిమహో అహూతి సమ్బన్ధో. తత్రాపి మహాబోధీతి బోధి వుచ్చతి చతూసు మగ్గేసు ఞాణం, తమేత్థ నిసిన్నో భగవా పటివిజ్ఝతీతి కణికారపాదపరుక్ఖోపి బోధిచ్చేవ వుచ్చతి, మహితో చ సో దేవబ్రహ్మనరాసురేహి బోధి చేతి మహాబోధి, మహతో బుద్ధస్స భగవతో బోధీతి వా మహాబోధి, తస్స మహో పూజా అహోసీతి అత్థో. సేసం సబ్బత్థ ఉత్తానత్థమేవాతి.

బోధిసిఞ్చకత్థేరఅపదానవణ్ణనా సమత్తా.