౮. లోమసకఙ్గియత్థేరఅపదానవణ్ణనా

అట్ఠమాపదానే ఇమమ్హి భద్దకే కప్పేతిఆదికం ఆయస్మతో లోమసకఙ్గియత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో కస్సపస్స భగవతో కాలే బ్రాహ్మణకులే నిబ్బత్తో సద్ధో పసన్నో అహోసి. అపరో చన్దనో నామ తస్స సహాయో చాసి. తే ద్వేపి సత్థు సన్తికే ధమ్మం సుత్వా పసన్నమానసా పబ్బజిత్వా యావజీవం సీలం రక్ఖిత్వా సుపరిసుద్ధసీలా తతో చుతా దేవలోకే నిబ్బత్తిత్వా ఏకం బుద్ధన్తరం దిబ్బసుఖం అనుభవింసు. తేసు అయం ఇమస్మిం బుద్ధుప్పాదే సాకియకులే నిబ్బత్తిత్వా అపరో చన్దనో దేవపుత్తో హుత్వా తావతింసభవనే నిబ్బత్తి. అథ సో సక్యకులప్పసాదకేన కాళుదాయినా ఆరాధితేన భగవతా సక్యరాజూనం మానమద్దనాయ కతం వేస్సన్తరధమ్మదేసనాయం (జా. ౨.౨౨.౧౬౫౫ ఆదయో) పోక్ఖరవస్సఇద్ధిపాటిహారియం దిస్వా పసన్నమానసో పబ్బజిత్వా మజ్ఝిమనికాయే వుత్తం భద్దేకరత్తసుత్తన్తదేసనం సుత్వా అరఞ్ఞవాసం వసన్తో భద్దేకరత్తసుత్తన్తదేసనానుసాసనం (మ. ని. ౩.౨౮౬ ఆదయో) సరిత్వా తదనుసారేన ఞాణం పేసేత్వా కమ్మట్ఠానం మనసి కరిత్వా అరహత్తం పాపుణి.

౨౨౫. అరహత్తం పత్వా అత్తనో పుబ్బకమ్మం సరిత్వా సఞ్జాతసోమనస్సో పుబ్బచరితాపదానం పకాసేన్తో ఇమమ్హి భద్దకే కప్పేతిఆదిమాహ. తత్థ కప్పో తావ చతుబ్బిధో – సారకప్పో, వరకప్పో, మణ్డకప్పో, భద్దకప్పోతి. తేసు యస్మిం కప్పే ఏకో బుద్ధో ఉప్పజ్జతి, అయం సారకప్పో నామ. యస్మిం ద్వే వా తయో వా బుద్ధా ఉప్పజ్జన్తి, అయం వరకప్పో నామ. యస్మిం చత్తారో బుద్ధా ఉప్పజ్జన్తి, అయం మణ్డకప్పో నామ. యస్మిం పఞ్చ బుద్ధా ఉప్పజ్జన్తి, అయం భద్దకప్పో నామ. అఞ్ఞత్థ పన –

‘‘సారకప్పో మణ్డకప్పో, సారమణ్డకప్పో తథా;

వరకప్పో భద్దకప్పో, కప్పా పఞ్చవిధా సియుం.

‘‘ఏకో ద్వే తయో చత్తారో, పఞ్చ బుద్ధా యథాక్కమం;

ఏతేసు పఞ్చకప్పేసు, ఉప్పజ్జన్తి వినాయకా’’తి. –

ఏవం పఞ్చ కప్పా వుత్తా. తేసు అయం కప్పో ‘‘కకుసన్ధో కోణాగమనో కస్సపో గోతమో మేత్తేయ్యో’’తి పఞ్చబుద్ధపటిమణ్డితత్తా భద్దకప్పో నామ జాతో.

తస్మా ఇమస్మిం భద్దకప్పమ్హి కస్సపో నాయకో ఉప్పజ్జీతి సమ్బన్ధో. సేసం ఉత్తానత్థమేవాతి.

లోమసకఙ్గియత్థేరఅపదానవణ్ణనా సమత్తా.