౯. వనవచ్ఛత్థేరఅపదానవణ్ణనా

నవమాపదానే ఇమమ్హి భద్దకే కప్పేతిఆదికం ఆయస్మతో వనవచ్ఛత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో కస్సపస్స భగవతో కాలే కులగేహే నిబ్బత్తో విఞ్ఞుతం పత్వా సత్థు ధమ్మదేసనం సుత్వా సద్ధాజాతో పబ్బజిత్వా పరిసుద్ధం బ్రహ్మచరియం చరిత్వా తతో చుతో దేవలోకే నిబ్బత్తో, తతో చుతో అరఞ్ఞాయతనే భిక్ఖూనం సమీపే కపోతయోనియం నిబ్బత్తో. తేసు మేత్తచిత్తో ధమ్మం సుత్వా తతో చుతో దేవమనుస్సేసు సంసరన్తో ఇమస్మిం బుద్ధుప్పాదే కపిలవత్థుస్మిం బ్రాహ్మణకులే నిబ్బత్తి. తస్స మాతుకుచ్ఛిగతకాలేయేవ మాతు దోహళో ఉదపాది వనే వసితుం వనే విజాయితుం. తతో ఇచ్ఛానురూపవసేన వనే వసన్తియా గబ్భవుట్ఠానం అహోసి. గబ్భతో నిక్ఖన్తఞ్చ నం కాసావఖణ్డేన పటిగ్గహేసుం. తదా బోధిసత్తస్స ఉప్పన్నకాలో, రాజా తం కుమారం ఆహరాపేత్వా సహేవ పోసేసి. అథ బోధిసత్తో మహాభినిక్ఖమనం నిక్ఖమిత్వా పబ్బజిత్వా ఛబ్బసాని దుక్కరకారికం కత్వా బుద్ధే జాతే సో మహాకస్సపస్స సన్తికం గన్త్వా తస్సోవాదే పసన్నో తస్స సన్తికా బుద్ధుప్పాదభావం సుత్వా సత్థు సన్తికం గన్త్వా ధమ్మం సుత్వా పబ్బజిత్వా నచిరస్సేవ ఛళభిఞ్ఞో అరహా అహోసి.

౨౫౧. సో అరహత్తం పత్వా అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో ఇమమ్హి భద్దకే కప్పేతిఆదిమాహ. తత్థ బ్రహ్మబన్ధు మహాయసోతి ఏత్థ బ్రాహ్మణానం బన్ధు ఞాతకోతి బ్రాహ్మణబన్ధూతి వత్తబ్బే గాథాబన్ధసుఖత్థం ‘‘బ్రహ్మబన్ధూ’’తి వుత్తన్తి వేదితబ్బం. లోకత్తయబ్యాపకయసత్తా మహాయసో. సేసం సబ్బం సువిఞ్ఞేయ్యమేవాతి.

వనవచ్ఛత్థేరఅపదానవణ్ణనా సమత్తా.