౭. అభయత్థేరఅపదానవణ్ణనా

సత్తమాపదానే పదుముత్తరో నామ జినోతిఆదికం ఆయస్మతో అభయత్థేరస్స అపదానం. అయమ్పి పురిమజినవరేసు కతాధికారో తత్థ తత్థ భవే విపట్టూపనిస్సయాని పుఞ్ఞాని ఉపచినన్తో పదుముత్తరస్స భగవతో కాలే హంసవతీనగరే బ్రాహ్మణకులే నిబ్బత్తో. సో వుద్ధిమన్వాయ వేదఙ్గపారగో సకపరసమయకుసలో ఏకదివసం సత్థు ధమ్మదేసనం సుత్వా పసన్నమానసో భగవన్తం గాథాహి థోమేసి. సో తత్థ యావతాయుకం ఠత్వా పుఞ్ఞాని కత్వా తతో చుతో దేవలోకే నిబ్బత్తో అపరాపరం సుగతీసుయేవం సంసరన్తో ఇమస్మిం బుద్ధుప్పాదే రాజగహే బిమ్బిసారరఞ్ఞో పుత్తో హుత్వా నిబ్బత్తి, అభయోత్వేవస్స నామం కరింసు. సో వయప్పత్తో నిగణ్ఠేహి సద్ధిం విస్సాసికో హుత్వా చరన్తో ఏకదివసం నిగణ్ఠేన నాటపుత్తేన సత్థు వాదారోపనత్థాయ పేసితో నిపుణపఞ్హం పుచ్ఛిత్వా నిపుణబ్యాకరణం సుత్వా పసన్నో సత్థు సన్తికే పబ్బజిత్వా కమ్మట్ఠానానురూపం ఞాణం పేసేత్వా నచిరస్సేవ అరహత్తం పాపుణి.

౧౯౫. సో అరహత్తం పత్వా అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో పదుముత్తరో నామ జినోతిఆదిమాహ. తం సబ్బం సువిఞ్ఞేయ్యమేవాతి.

అభయత్థేరఅపదానవణ్ణనా సమత్తా.