౭. లసుణదాయకత్థేరఅపదానవణ్ణనా

హిమవన్తస్సావిదూరేతిఆదికం ఆయస్మతో లసుణదాయకత్థేరస్స అపదానం. ఏసోపాయస్మా పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో విపస్సిస్స భగవతో కాలే ఏకస్మిం కులగేహే నిబ్బత్తిత్వా విఞ్ఞుతం పత్తో ఘరావాసే ఆదీనవం దిస్వా గేహం పహాయ తాపసపబ్బజ్జం పబ్బజిత్వా హిమవన్తం నిస్సాయ వనే వసన్తో బహూని లసుణాని రోపేత్వా తదేవ వనమూలఫలఞ్చ ఖాదన్తో విహాసి. సో బహూని లసుణాని కాజేనాదాయ మనుస్సపథం ఆహరిత్వా పసన్నో దానం దత్వా బుద్ధప్పముఖస్స భిక్ఖుసఙ్ఘస్స భేసజ్జత్థాయ దత్వా గచ్ఛతి. ఏవం సో యావజీవం పుఞ్ఞాని కత్వా తేనేవ పుఞ్ఞబలేన దేవమనుస్సేసు సంసరన్తో ఉభయసమ్పత్తిం అనుభవిత్వా కమేన ఇమస్మిం బుద్ధుప్పాదే ఉప్పన్నో పటిలద్ధసద్ధో పబ్బజిత్వా విపస్సనం వడ్ఢేత్వా నచిరస్సేవ అరహత్తం పత్తో పుబ్బకమ్మవసేన లసుణదాయకత్థేరోతి పాకటో.

౮౯. అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో హిమవన్తస్సావిదూరేతిఆదిమాహ. తత్థ హిమాలయపబ్బతస్స పరియోసానే మనుస్సానం సఞ్చరణట్ఠానే యదా విపస్సీ భగవా ఉదపాది, తదా అహం తాపసో అహోసిన్తి సమ్బన్ధో. లసుణం ఉపజీవామీతి రత్తలసుణం రోపేత్వా తదేవ గోచరం కత్వా జీవికం కప్పేమీతి అత్థో. తేన వుత్తం ‘‘లసుణం మయ్హభోజన’’న్తి.

౯౦. ఖారియో పూరయిత్వానాతి తాపసభాజనాని లసుణేన పూరయిత్వా కాజేనాదాయ సఙ్ఘారామం సఙ్ఘస్స వసనట్ఠానం హేమన్తాదీసు తీసు కాలేసు సఙ్ఘస్స చతూహి ఇరియాపథేహి వసనవిహారం అగచ్ఛిం అగమాసిన్తి అత్థో. హట్ఠో హట్ఠేన చిత్తేనాతి అహం సన్తుట్ఠో సోమనస్సయుత్తచిత్తేన సఙ్ఘస్స లసుణం అదాసిన్తి అత్థో.

౯౧. విపస్సిస్స…పే… నిరతస్సహన్తి నరానం అగ్గస్స సేట్ఠస్స అస్స విపస్సిస్స భగవతో సాసనే నిరతో నిస్సేసేన రతో అహన్తి సమ్బన్ధో. సఙ్ఘస్స…పే… మోదహన్తి అహం సఙ్ఘస్స లసుణదానం దత్వా సగ్గమ్హి సుట్ఠు అగ్గస్మిం దేవలోకే ఆయుకప్పం దిబ్బసమ్పత్తిం అనుభవమానో మోదిం, సన్తుట్ఠో భవామీతి అత్థో. సేసం సువిఞ్ఞేయ్యమేవాతి.

లసుణదాయకత్థేరఅపదానవణ్ణనా సమత్తా.