౨. సాగతత్థేరఅపదానవణ్ణనా

సోభితో నామ నామేనాతిఆదికం ఆయస్మతో సాగతత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో పదుముత్తరస్స భగవతో కాలే ఏకస్మిం బ్రాహ్మణకులే నిబ్బత్తో సబ్బసిప్పేసు నిప్ఫత్తిం పత్తో నామేన సోభితో నామ హుత్వా తిణ్ణం వేదానం పారగూ సనిఘణ్డుకేటుభానం సాక్ఖరప్పభేదానం ఇతిహాసపఞ్చమానం పదకో వేయ్యాకరణో లోకాయతమహాపురిసలక్ఖణేసు అనవయో. సో ఏకదివసం పదుముత్తరం భగవన్తం ద్వత్తింసమహాపురిసలక్ఖణసిరియా సోభమానం ఉయ్యానద్వారేన గచ్ఛన్తం దిస్వా అతీవ పసన్నమానసో అనేకేహి ఉపాయేహి అనేకేహి గుణవణ్ణేహి థోమనం అకాసి. భగవా తస్స థోమనం సుత్వా ‘‘అనాగతే గోతమస్స భగవతో సాసనే సాగతో నామ సావకో భవిస్సతీ’’తి బ్యాకరణం అదాసి. సో తతో పట్ఠాయ పుఞ్ఞాని కరోన్తో యావతాయుకం ఠత్వా తతో చుతో దేవలోకే నిబ్బత్తో. కప్పసతసహస్సదేవమనుస్సేసు ఉభయసమ్పత్తియో అనుభవిత్వా ఇమస్మిం బుద్ధుప్పాదే ఏకస్మిం కులగేహే నిబ్బత్తో. తస్స మాతాపితరో సోమనస్సం వడ్ఢేన్తో సుజాతో ఆగతోతి సాగతోతి నామం కరింసు. సో సాసనే పసీదిత్వా పబ్బజిత్వా విపస్సనం వడ్ఢేత్వా అరహత్తం పత్తో.

౧౭. ఏవం సో పుఞ్ఞసమ్భారానురూపేన పత్తఅరహత్తఫలో అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో సోభితో నామ నామేనాతిఆదిమాహ. తత్థ తదా పుఞ్ఞసమ్భారస్స పరిపూరణసమయే నామేన సోభితో నామ బ్రాహ్మణో అహోసిన్తి సమ్బన్ధో.

౨౧. విపథా ఉద్ధరిత్వానాతి విరుద్ధపథా కుమగ్గా, ఉప్పథా వా ఉద్ధరిత్వా అపనేత్వా. పథం ఆచిక్ఖసేతి, భన్తే, సబ్బఞ్ఞు తువం పథం సప్పురిసమగ్గం నిబ్బానాధిగమనుపాయం ఆచిక్ఖసే కథేసి దేసేసి విభజి ఉత్తానిం అకాసీతి అత్థో. సేసం ఉత్తానత్థమేవాతి.

సాగతత్థేరఅపదానవణ్ణనా సమత్తా.