౯. ఏకఞ్జలికత్థేరఅపదానవణ్ణనా

సువణ్ణవణ్ణన్తిఆదికం ఆయస్మతో ఏకఞ్జలికత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో విపస్సిస్స భగవతో కాలే ఏకస్మిం కులగేహే నిబ్బత్తో విఞ్ఞుతం పత్తో రతనత్తయే పసన్నో పిణ్డాయ చరన్తం విపస్సిం భగవన్తం దిస్వా పసన్నమానసో అఞ్జలిం పగ్గహేత్వా అట్ఠాసి. సో తేన పుఞ్ఞకమ్మేన దేవమనుస్సేసు సంసరన్తో సబ్బత్థ పూజనీయో హుత్వా ఉభయసమ్పత్తియో అనుభవిత్వా ఇమస్మిం బుద్ధుప్పాదే విభవసమ్పన్నే కులే నిబ్బత్తిత్వా సాసనే పసీదిత్వా పబ్బజిత్వా విపస్సనం వడ్ఢేత్వా అరహత్తే పతిట్ఠాసి. పుబ్బే కతపుఞ్ఞవసేన ఏకఞ్జలికత్థేరోతి పాకటో.

౧౮౦. సో అత్తనో పుబ్బకమ్మం సరిత్వా తం హత్థతలే ఆమలకం వియ దిస్వా ఉదానవసేన పుబ్బచరితాపదానం పకాసేన్తో సువణ్ణవణ్ణన్తిఆదిమాహ. విపస్సిం సత్థవాహగ్గన్తి వాణిజే కన్తారా వహతి తారేతీతి సత్థవాహో. వాళకన్తారా చోళకన్తారా దుబ్భిక్ఖకన్తారా నిరుదకకన్తారా యక్ఖకన్తారా అప్పభక్ఖకన్తారా చ తారేతి ఉత్తారేతి పతారేతి నిత్తారేతి ఖేమన్తభూమిం పాపేతీతి అత్థో. కో సో? వాణిజజేట్ఠకో. సత్థవాహసదిసత్తా అయమ్పి భగవా సత్థవాహో. తథా హి సో తివిధం బోధిం పత్థయన్తే కతపుఞ్ఞసమ్భారే సత్తే జాతికన్తారా జరాకన్తారా బ్యాధికన్తారా మరణకన్తారా సోకపరిదేవదుక్ఖదోమనస్సుపాయాసకన్తారా చ సబ్బస్మా సంసారకన్తారా చ తారేతి ఉత్తారేతి పతారేతి నిత్తారేతి నిబ్బానథలం పాపేతీతి అత్థో. సత్థవాహో చ సో అగ్గో సేట్ఠో పధానో చాతి సత్థవాహగ్గో, తం సత్థవాహగ్గం విపస్సిం సమ్బుద్ధన్తి సమ్బన్ధో. నరవరం వినాయకన్తి నరానం అన్తరే అసిథిలపరక్కమోతి నరవీరో, తం. విసేసేన కతపుఞ్ఞసమ్భారే సత్తే నేతి నిబ్బానపురం పాపేతీతి వినాయకో, తం.

౧౮౧. అదన్తదమనం తాదిన్తి రాగదోసమోహాదికిలేససమ్పయుత్తత్తా కాయవచీమనోద్వారేహి అదన్తే సత్తే దమేతీతి అదన్తదమనో, తం. ఇట్ఠానిట్ఠేసు అకమ్పియతాదిగుణయుత్తోతి తాదీ, తం. మహావాదిం మహామతిన్తి సకసమయపరసమయవాదీనం అన్తరే అత్తనా సమధికపుగ్గలవిరహితత్తా మహావాదీ, మహతీ పథవిసమానా మేరుసమానా చ మతి యస్స సో మహామతి, తం మహావాదిం మహామతిం సమ్బుద్ధన్తి ఇమినా తుల్యాధికరణం. సేసం సువిఞ్ఞేయ్యమేవాతి.

ఏకఞ్జలికత్థేరఅపదానవణ్ణనా సమత్తా.