౧౦. ఖోమదాయకత్థేరఅపదానవణ్ణనా

నగరే బన్ధుమతియాతిఆదికం ఆయస్మతో ఖోమదాయకత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో విపస్సిస్స భగవతో కాలే ఏకస్మిం కులగేహే నిబ్బత్తో వయప్పత్తో సాసనే అభిప్పసన్నో రతనత్తయమామకో విపస్సిస్స భగవతో సన్తికే ధమ్మం సుత్వా పసన్నమానసో ఖోమదుస్సేన పూజం అకాసి. సో తదేవ మూలం కత్వా యావజీవం పుఞ్ఞాని కత్వా తతో దేవలోకే నిబ్బత్తో. ఛసు దేవేసు అపరాపరం దిబ్బసుఖం అనుభవిత్వా తతో చవిత్వా మనుస్సలోకే చక్కవత్తిఆదిఅనేకవిధమనుస్ససమ్పత్తిం అనుభవిత్వా పరిపాకగతే పుఞ్ఞసమ్భారే ఇమస్మిం బుద్ధుప్పాదే కులగేహే నిబ్బత్తో వయప్పత్తో సత్థు సన్తికే ధమ్మం సుత్వా పటిలద్ధసద్ధో పబ్బజిత్వా విపస్సనం వడ్ఢేత్వా నచిరస్సేవ అరహత్తం పాపుణి. కతపుఞ్ఞనామేన ఖోమదాయకత్థేరోతి పాకటో.

౧౮౪. సో అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం దస్సేన్తో నగరే బన్ధుమతియాతిఆదిమాహ. తత్థ బన్ధు వుచ్చతి ఞాతకో, తే బన్ధూ యస్మిం నగరే అఞ్ఞమఞ్ఞం సఙ్ఘటితా వసన్తి, తం నగరం ‘‘బన్ధుమతీ’’తి వుచ్చతి. రోపేమి బీజసమ్పదన్తి దానసీలాదిపుఞ్ఞబీజసమ్పత్తిం రోపేమి పట్ఠపేమీతి అత్థో.

ఖోమదాయకత్థేరఅపదానవణ్ణనా సమత్తా.

తతియస్స సుభూతివగ్గస్స వణ్ణనా సమత్తా.

చతుభాణవారవణ్ణనా నిట్ఠితా.