౮. ఉత్తియత్థేరఅపదానవణ్ణనా

చన్దభాగానదీతీరేతిఆదికం ఆయస్మతో ఉత్తియత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో సిద్ధత్థస్స భగవతో కాలే చన్దభాగానదియం సుసుమారో హుత్వా నిబ్బత్తో నదీతీరం ఉపగతం భగవన్తం దిస్వా పసన్నచిత్తో పారం నేతుకామో తీరసమీపేయేవ నిపజ్జి. భగవా తస్స అనుకమ్పాయ పిట్ఠియం పాదే ఠపేసి. సో తుట్ఠో ఉదగ్గో పీతివేగేన మహుస్సాహో హుత్వా సోతం ఛిన్దన్తో సీఘేన జవేన భగవన్తం పరతీరం నేసి. భగవా తస్స చిత్తప్పసాదం ఞత్వా ‘‘అయం ఇతో చుతో దేవలోకే నిబ్బత్తిస్సతి, తతో పట్ఠాయ సుగతీసుయేవ సంసరన్తో ఇతో చతున్నవుతికప్పే అమతం పాపుణిస్సతీ’’తి బ్యాకరిత్వా పక్కామి.

సో తథా సుగతీసుయేవ సంసరన్తో ఇమస్మిం బుద్ధుప్పాదే సావత్థియం అఞ్ఞతరస్స బ్రాహ్మణస్స పుత్తో హుత్వా నిబ్బత్తి, ఉత్తియోతిస్స నామం అకంసు. సో వయప్పత్తో ‘‘అమతం పరియేసిస్సామీ’’తి పరిబ్బాజకో హుత్వా ఏకదివసం భగవన్తం దిస్వా ఉపసఙ్కమిత్వా వన్దిత్వా ధమ్మం సుత్వా పటిలద్ధసద్ధో హుత్వా సాసనే పబ్బజిత్వా సీలదిట్ఠీనం అవిసోధితత్తా విసేసం నిబ్బత్తేతుం అసక్కోన్తో అఞ్ఞం భిక్ఖుం విసేసం నిబ్బత్తేత్వా అఞ్ఞం బ్యాకరోన్తం దిస్వా సత్థారం ఉపసఙ్కమిత్వా సఙ్ఖేపేన ఓవాదం యాచి. సత్థాపి తస్స, ‘‘తస్మాతిహ త్వం, ఉత్తియ, ఆదిమేవ విసోధేహీ’’తిఆదినా (సం. ని. ౫.౩౮౨) సఙ్ఖేపేనేవ ఓవాదం అదాసి. సో సత్థు ఓవాదే ఠత్వా విపస్సనం ఆరభి. తస్స ఆరద్ధవిపస్సకస్స ఆబాధో ఉప్పజ్జి. ఉప్పన్నే ఆబాధే జాతసంవేగో వీరియారమ్భవత్థుం ఞత్వా విపస్సనం వడ్ఢేత్వా అరహత్తం పాపుణి.

౧౬౯. ఏవం సో కతసమ్భారానురూపేన పత్తఅరహత్తఫలో అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో చన్దభాగానదీతీరేతిఆదిమాహ. తత్థ చన్దభాగానదీతీరేతి పరిసుద్ధపణ్డరపులినతలేహి చ పభాసమ్పన్నపసన్నమధురోదకపరిపుణ్ణతాయ చ చన్దప్పభాకిరణసస్సిరీకాభా నదమానా సద్దం కురుమానా గచ్ఛతీతి చన్దభాగానదీ, తస్సా చన్దభాగానదియా తీరే సుసుమారో అహోసిన్తి సమ్బన్ధో. తత్థ సుసుమారోతి ఖుద్దకమచ్ఛగుమ్బే ఖణ్డాఖణ్డికం కరోన్తో మారేతీతి సుసుమారో, చణ్డమచ్ఛో కుమ్భీలోతి అత్థో. సభోజనపసుతోహన్తి అహం సభోజనే సకగోచరే పసుతో బ్యావటో. నదీతిత్థం అగచ్ఛహన్తి భగవతో ఆగమనకాలే అహం నదీతిత్థం అగచ్ఛిం పత్తోమ్హి.

౧౭౦. సిద్ధత్థో తమ్హి సమయేతి తస్మిం మమ తిత్థగమనకాలే సిద్ధత్థో భగవా అగ్గపుగ్గలో సబ్బసత్తేసు జేట్ఠో సేట్ఠో సయమ్భూ సయమేవ భూతో జాతో బుద్ధభూతో సో భగవా నదిం తరితుకామో నదీతీరం ఉపాగమి.

౧౭౨. పేత్తికం విసయం మయ్హన్తి మయ్హం పితుపితామహాదీహి పరమ్పరానీతం, యదిదం సమ్పత్తసమ్పత్తమహానుభావానం తరణన్తి అత్థో.

౧౭౩. మమ ఉగ్గజ్జనం సుత్వాతి మయ్హం ఉగ్గజ్జనం ఆరాధనం సుత్వా మహాముని భగవా అభిరుహీతి సమ్బన్ధో. సేసం ఉత్తానత్థమేవాతి.

ఉత్తియత్థేరఅపదానవణ్ణనా సమత్తా.