౭. పులినపూజకత్థేరఅపదానవణ్ణనా

విపస్సిస్స భగవతోతిఆదికం ఆయస్మతో పులినపూజకత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో విపస్సిస్స భగవతో కాలే ఏకస్మిం కులే నిబ్బత్తో సాసనే పసన్నచిత్తో చేతియఙ్గణబోధియఙ్గణేసు పురాణవాలుకం అపనేత్వా నవం ముత్తాదలసదిసపణ్డరపులినం ఓకిరిత్వా మాళకం అలఙ్కరి. తేన కమ్మేన సో దేవలోకే నిబ్బత్తో తత్థ దిబ్బేహి రతనేహి విజ్జోతమానే అనేకయోజనే కనకవిమానే దిబ్బసమ్పత్తిం అనుభవిత్వా తతో చుతో మనుస్సలోకే సత్తరతనసమ్పన్నో చక్కవత్తీ రాజా హుత్వా మనుస్ససమ్పత్తిం అనుభవిత్వా అపరాపరం సంసరన్తో ఇమస్మిం బుద్ధుప్పాదే విభవసమ్పన్నే ఏకస్మిం కులే నిబ్బత్తో సాసనే పసన్నో పబ్బజిత్వా విపస్సనం వడ్ఢేత్వా అరహత్తం పాపుణి. సో అత్తనో కతపుఞ్ఞనామసదిసేన నామేన పులినపూజకత్థేరోతి పాకటో.

౧౬౫. సో అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం దస్సేన్తో విపస్సిస్స భగవతోతిఆదిమాహ. తత్థ వివిధం పస్సతీతి విపస్సీ, వివిచ్చ పస్సతీతి వా విపస్సీ, వివిధే అత్తత్థపరత్థాదిభేదే అత్థే పస్సతీతి వా విపస్సీ, వివిధే వోహారపరమత్థాదిభేదే పస్సతీతి వా విపస్సీ, తస్స విపస్సిస్స బోధియా పాదపుత్తమే ఉత్తమే బోధిరుక్ఖమణ్డలమాళకే పురాణపులినం వాలుకం ఛడ్డేత్వా సుద్ధం పణ్డరం పులినం ఆకిరిం సన్థరిం. సేసం సువిఞ్ఞేయ్యమేవాతి.

పులినపూజకత్థేరఅపదానవణ్ణనా సమత్తా.