౨. ఉపవానత్థేరఅపదానవణ్ణనా

పదుముత్తరో నామ జినోతిఆదికం ఆయస్మతో ఉపవానత్థేరస్స అపదానం. అయమ్పాయస్మా పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో పదుముత్తరస్స భగవతో కాలే దలిద్దకులే నిబ్బత్తిత్వా విఞ్ఞుతం పత్తో భగవతి పరినిబ్బుతే తస్స ధాతుం గహేత్వా మనుస్సదేవనాగగరుళకుమ్భణ్డయక్ఖగన్ధబ్బేహి సత్తరతనమయే సత్తయోజనికే థూపే కతే తత్థ సుధోతం అత్తనో ఉత్తరసాటకం వేళగ్గే లగ్గేత్వా ఆబన్ధిత్వా ధజం కత్వా పూజం అకాసి. తం గహేత్వా అభిసమ్మతకో నామ యక్ఖసేనాపతి దేవేహి చేతియపూజారక్ఖణత్థం ఠపితో అదిస్సమానకాయో తం ఆకాసే ధారేన్తో చేతియం తిక్ఖత్తుం పదక్ఖిణం అకాసి. సో తం దిస్వా భియ్యోసోమత్తాయ పసన్నమానసో హుత్వా తేన పుఞ్ఞకమ్మేన దేవమనుస్సేసు సంసరన్తో ఇమస్మిం బుద్ధుప్పాదే సావత్థియం బ్రాహ్మణకులే నిబ్బత్తిత్వా ఉపవానోతి లద్ధనామో వయప్పత్తో జేతవనపటిగ్గహణే బుద్ధానుభావం దిస్వా పటిలద్ధసద్ధో పబ్బజిత్వా విపస్సనాయ కమ్మం కరోన్తో అరహత్తం పత్వా ఛళభిఞ్ఞో అహోసి. యదా భగవతో అఫాసు అహోసి, తదా థేరో ఉణ్హోదకం తథారూపం పానకఞ్చ భేసజ్జం భగవతో ఉపనామేసి. తేనస్స సత్థునో రోగో వూపసమి. తస్స భగవా అనుమోదనం అకాసి.

౫౨. ఏవం సో పత్తఅరహత్తఫలో అధిగతఏతదగ్గట్ఠానో అత్తనో పుబ్బకమ్మం సరిత్వా సోమనస్సవసేన పుబ్బచరితాపదానం పకాసేన్తో పదుముత్తరో నామ జినోతిఆదిమాహ. తత్థ సబ్బేసం లోకియలోకుత్తరధమ్మానం పారగూ పరియోసానం నిబ్బానం గతో పత్తో పదుముత్తరో నామ జినో జితపఞ్చమారో భగవా అగ్గిక్ఖన్ధో ఇవ ఛబ్బణ్ణా బుద్ధరంసియో జలిత్వా సబ్బలోకం ధమ్మపజ్జోతేన ఓభాసేత్వా సమ్బుద్ధో సుట్ఠు బుద్ధో అవిజ్జానిద్దూపగతాయ పజాయ సవాసనాయ కిలేసనిద్దాయ పటిబుద్ధో వికసితనేత్తపఙ్కజో పరినిబ్బుతో ఖన్ధపరినిబ్బానేన నిబ్బుతో అదస్సనం గతోతి సమ్బన్ధో.

౫౭. జఙ్ఘాతి చేతియకరణకాలే ఉపచినితబ్బానం ఇట్ఠకానం ఠపనత్థాయ, నిబన్ధియమానసోపానపన్తి.

౮౮. సుధోతం రజకేనాహన్తి వత్థధోవకేన పురిసేన సుట్ఠు ధోవితం సువిసుద్ధకతం, ఉత్తరేయ్యపటం మమ ఉత్తరసాటకం అహం వేళగ్గే లగ్గిత్వా ధజం కత్వా ఉక్ఖిపిం, అమ్బరే ఆకాసే ఉస్సాపేసిన్తి అత్థో. సేసం సువిఞ్ఞేయ్యమేవాతి.

ఉపవానత్థేరఅపదానవణ్ణనా సమత్తా.