౧౦. సుమఙ్గలత్థేరఅపదానవణ్ణనా

ఆహుతిం యిట్ఠుకామోతిఆదికం ఆయస్మతో సుమఙ్గలత్థేరస్స అపదానం. అయమ్పాయస్మా పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో పియదస్సిస్స భగవతో కాలే రుక్ఖదేవతా హుత్వా నిబ్బత్తి. సో ఏకదివసం సత్థారం న్హత్వా ఏకచీవరం ఠితం దిస్వా సోమనస్సప్పత్తో అప్ఫోటేసి. సో తేన పుఞ్ఞేన దేవమనుస్సేసు సంసరన్తో ఇమస్మిం బుద్ధుప్పాదే సావత్థియా అవిదూరే అఞ్ఞతరస్మిం గామకే తాదిసేన కమ్మనిస్సన్దేన దలిద్దకులే నిబ్బత్తి, తస్స సుమఙ్గలోతి నామం అహోసి. సో వయప్పత్తో ఖుజ్జకాసితనఙ్గలకుద్దాలపరిక్ఖారో హుత్వా కసియా జీవికం కప్పేసి. సో ఏకదివసం రఞ్ఞా పసేనదినా కోసలేన భగవతో భిక్ఖుసఙ్ఘస్స చ మహాదానే పవత్తియమానే దానూపకరణాని గహేత్వా ఆగచ్ఛన్తేహి మనుస్సేహి సద్ధిం దధిఘటం గహేత్వా ఆగతో భిక్ఖూనం సక్కారసమ్మానం దిస్వా ‘‘ఇమే సమణా సక్యపుత్తియా సుఖుమవత్థనివత్థా సుభోజనాని భుఞ్జిత్వా నివాతేసు సేనాసనేసు విహరన్తి, యంనూనాహమ్పి పబ్బజేయ్య’’న్తి చిన్తేత్వా అఞ్ఞతరం మహాథేరం ఉపసఙ్కమిత్వా అత్తనో పబ్బజాధిప్పాయం నివేదేసి. సో తం కరుణాయన్తో పబ్బాజేత్వా కమ్మట్ఠానం ఆచిక్ఖి. సో అరఞ్ఞే విహరన్తో ఏకకవిహారే నిబ్బిన్నో ఉక్కణ్ఠితో హుత్వా విబ్భమితుకామో ఞాతిగామం గచ్ఛన్తో అన్తరామగ్గే కచ్ఛం బన్ధిత్వా ఖేత్తం కసన్తే కిలిట్ఠవత్థనివత్థే సమన్తతో రజోకిణ్ణసరీరే వాతాతపేన సుస్సన్తే ఖేత్తం కస్సకే మనుస్సే దిస్వా ‘‘మహన్తం వతిమే సత్తా జీవికనిమిత్తం దుక్ఖం పచ్చనుభవన్తీ’’తి సంవేగం పటిలభి. ఞాణస్స పరిపాకగతత్తా చస్స యథాగహితం కమ్మట్ఠానం ఉపట్ఠాసి. సో అఞ్ఞతరం రుక్ఖమూలం ఉపగన్త్వా వివేకం లభిత్వా యోనిసోమనసికరోన్తో విపస్సనం వడ్ఢేత్వా మగ్గపటిపాటియా అరహత్తం పాపుణి.

౧౨౪. ఏవం సో పత్తఅరహత్తఫలో అత్తనో పుబ్బకమ్మం సరిత్వా సోమనస్సవసేన పుబ్బచరితాపదానం పకాసేన్తో ఆహుతిం యిట్ఠుకామోహన్తిఆదిమాహ. తత్థ ఆహుతిన్తి అన్నపానాదిఅనేకవిధం పూజాసక్కారూపకరణం. యిట్ఠుకామోతి యజితుకామో, దానం దాతుకామో అహం. పటియాదేత్వాన భోజనన్తి ఆహారం పటియాదేత్వా నిప్ఫాదేత్వా. బ్రాహ్మణే పటిమానేన్తోతి పటిగ్గాహకే సుద్ధపబ్బజితే పరియేసన్తో. విసాలే మాళకే ఠితోతి పరిసుద్ధపణ్డరపులినతలాభిరామే విపులే మాళకే ఠితో.

౧౨౫-౭. అథద్దసాసిం సమ్బుద్ధన్తిఆదీసు మహాయసం మహాపరివారం సబ్బలోకం సకలసత్తలోకం వినేతానం విసేసేన నేతారం నిబ్బానసమ్పాపకం సయమ్భుం సయమేవ భూతం అనాచరియకం అగ్గపుగ్గలం సేట్ఠపుగ్గలం భగవన్తం భగ్యవన్తాదిగుణయుత్తం జుతిమన్తం నీలపీతాదిపభాసమ్పన్నం సావకేహి పురక్ఖతం పరివారితం ఆదిచ్చమివ సూరియమివ రోచన్తం సోభమానం రథియం వీథియం పటిపన్నకం గచ్ఛన్తం పియదస్సిం నామ సమ్బుద్ధం అద్దసిన్తి సమ్బన్ధో. అఞ్జలిం పగ్గహేత్వానాతి బన్ధఞ్జలిపుటం సిరసి కత్వా సకం చిత్తం అత్తనో చిత్తం పసాదయిం ఇత్థమ్భూతస్స భగవతో గుణే పసాదేసిం పసన్నమకాసిన్తి అత్థో. మనసావ నిమన్తేసిన్తి చిత్తేన పవారేసిం. ఆగచ్ఛతు మహామునీతి మహితో పూజారహో ముని భగవా మమ నివేసనం ఆగచ్ఛతు.

౧౨౮. మమ సఙ్కప్పమఞ్ఞాయాతి మయ్హం చిత్తసఙ్కప్పం ఞత్వా లోకే సత్తలోకే అనుత్తరో ఉత్తరవిరహితో సత్థా ఖీణాసవసహస్సేహి అరహన్తసహస్సేహి పరివుతో మమ ద్వారం మయ్హం గేహద్వారం ఉపాగమి సమ్పాపుణి.

౧౨౯. తస్స సమ్పత్తస్స సత్థునో ఏవం నమక్కారమకాసిం. పురిసాజఞ్ఞ పురిసానం ఆజఞ్ఞ, సేట్ఠ, మమ నమక్కారో తే తుయ్హం అత్థు భవతు. పురిసుత్తమ పురిసానం ఉత్తమ అధికగుణవిసిట్ఠ తే తుయ్హం మమ నమక్కారో అత్థు. పాసాదం పసాదజనకం మమ నివేసనం అభిరుహిత్వా సీహాసనే ఉత్తమాసనే నిసీదతన్తి ఆయాచిన్తి అత్థో.

౧౩౦. దన్తో దన్తపరివారోతి సయం ద్వారత్తయేన దన్తో తథా దన్తాహి భిక్ఖుభిక్ఖునీఉపాసకఉపాసికాసఙ్ఖాతాహి చతూహి పరిసాహి పరివారితో. తిణ్ణో తారయతం వరోతి సయం తిణ్ణో సంసారతో ఉత్తిణ్ణో నిక్ఖన్తో తారయతం తారయన్తానం విసిట్ఠపుగ్గలానం వరో ఉత్తమో భగవా మమారాధనేన పాసాదం అభిరుహిత్వా పవరాసనే ఉత్తమాసనే నిసీది నిసజ్జం కప్పేసి.

౧౩౧. యం మే అత్థి సకే గేహేతి అత్తనో గేహే యం ఆమిసం పచ్చుపట్ఠితం సమ్పాదితం రాసికతం అత్థి. తాహం బుద్ధస్స పాదాసిన్తి బుద్ధస్స బుద్ధప్పముఖస్స సఙ్ఘస్స తం ఆమిసం పాదాసిం ప-కారేన ఆదరేన వా అదాసిన్తి అత్థో. పసన్నో సేహి పాణిభీతి అత్తనో ద్వీహి హత్థేహి పస్సన్నచిత్తో గహేత్వా పాదాసిన్తి అత్థో.

౧౩౨. పసన్నచిత్తో పసాదితమనసఙ్కప్పో సుమనో సున్దరమనో. వేదజాతో జాతవేదో ఉప్పన్నసోమనస్సో కతఞ్జలీ సిరసి ఠపితఅఞ్జలిపుటో బుద్ధసేట్ఠం నమస్సామి సేట్ఠస్స బుద్ధస్స పణామం కరోమీతి అత్థో. అహో బుద్ధస్సుళారతాతి పటివిద్ధచతుసచ్చస్స సత్థునో ఉళారతా మహన్తభావో అహో అచ్ఛరియన్తి అత్థో.

౧౩౩. అట్ఠన్నం పయిరూపాసతన్తి పయిరుపాసన్తానం భుఞ్జం భుఞ్జన్తానం అట్ఠన్నం అరియపుగ్గలానం అన్తరే ఖీణాసవా అరహన్తోవ బహూతి అత్థో. తుయ్హేవేసో ఆనుభావోతి ఏసో ఆకాసచరణఉమ్ముజ్జననిముజ్జనాదిఆనుభావో తుయ్హేవ తుయ్హం ఏవ ఆనుభావో, నాఞ్ఞేసం. సరణం తం ఉపేమహన్తి తం ఇత్థమ్భూతం తువం సరణం తాణం లేణం పరాయనన్తి ఉపేమి గచ్ఛామి జానామి వాతి అత్థో.

౧౩౪. లోకజేట్ఠో నరాసభో పియదస్సీ భగవా భిక్ఖుసఙ్ఘమజ్ఝే నిసీదిత్వా ఇమా బ్యాకరణగాథా అభాసథ కథేసీతి అత్థో. సేసం సువిఞ్ఞేయ్యమేవాతి.

సుమఙ్గలత్థేరఅపదానవణ్ణనా సమత్తా.

దుతియస్స సీహాసనవగ్గస్స వణ్ణనా సమత్తా.