౨. తమ్బపుప్ఫియత్థేరఅపదానవణ్ణనా

పరకమ్మాయనే యుత్తోతిఆదికం ఆయస్మతో తమ్బపుప్ఫియత్థేరస్స అపదానం. అయమ్పి ఆయస్మా పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో పియదస్సిస్స భగవతో కాలే కేనచి పురే కతేన అకుసలకమ్మేన దుగ్గతకులే నిబ్బత్తో వుద్ధిప్పత్తో పరేసం కమ్మం కత్వా భతియా జీవికం కప్పేసి. సో ఏవం దుక్ఖేన వసన్తో పరేసం అపరాధం కత్వా మరణభయేన పలాయిత్వా వనం పావిసి. తత్థ గతట్ఠానే పాటలిబోధిం దిస్వా వన్దిత్వా సమ్మజ్జిత్వా ఏకస్మిం రుక్ఖే తమ్బవణ్ణం పుప్ఫం దిస్వా తం సబ్బం కణ్ణికే ఓచినిత్వా బోధిపూజం అకాసి. తత్థ చిత్తం పసాదేత్వా వన్దిత్వా పల్లఙ్కమాభుజిత్వా నిసీది. తస్మిం ఖణే తే మనుస్సా పదానుపదికం అనుబన్ధిత్వా తత్థ అగమంసు. సో తే దిస్వా బోధిం ఆవజ్జేన్తోవ పలాయిత్వా భయానకే గీరిదుగ్గపపాతే పతిత్వా మరి.

౭. సో బోధిపూజాయ అనుస్సరితత్తా తేనేవ పీతిసోమనస్సేన తావతింసాదీసు ఉపపన్నో ఛ కామావచరసమ్పత్తిం అనుభవిత్వా మనుస్సేసు చ చక్కవత్తిఆదిసమ్పత్తిం అనుభవిత్వా ఇమస్మిం బుద్ధుప్పాదే విభవసమ్పన్నే కులే నిబ్బత్తో వుద్ధిప్పత్తో సత్థు ధమ్మదేసనం సుత్వా పసన్నమానసో పబ్బజిత్వా నచిరస్సేవ అరహా హుత్వా అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో పరకమ్మాయనే యుత్తోతిఆదిమాహ. తత్థ పరేసం కమ్మాని పరకమ్మాని, పరకమ్మానం ఆయనే కరణే వాహనే ధారణే యుత్తో యోజితో అహోసిన్తి అత్థో. సేసం పాకటమేవాతి.

తమ్బపుప్ఫియత్థేరఅపదానవణ్ణనా సమత్తా.